Gewilde Bybelverse vanaf मति 6

Deel

बाकि तोहरा पहिला परमेस्‍वरक राज हसे हुनेक धारमिकताक खोजि करिह हसे इअ जम्‍मे चिजुवा फेनि तोहराके दियतइ।

उहेसे तोहरा यनदिनेक तहिँया फिकरि झिन करिह, केहकेकि यनदिनेक फिकरि उअ यपनहिँ करबिय। याजुक दुःख याजुक तहिँया बहुत बडइ।”

“उहेसे मुइ तोहराके कहबहिँ, तोहरा यापन प्रानक तहिँया कथि चिजु खाएके, कथि पिएके हसे कथि पेहरेके कहके फिकरि झिन करिह। कथि प्रान जेउनासे हसे देहिया लुगाफाटासे बडके हइने हखइ त?

बाकि जब तुइ परथाना करबहि, यापन कोठवा भितरा जइसि हसे केउरिया लगाके गुप्‍तमा रहलाहर तोर पिताके परथाना करसि, तब गुप्‍तमा देखलाहर तोर पिता तोरके इनाम देबसि।

उहेसे तोहरा यसके परथाना करिह: ‘हे हमार स्‍वरगमा रहलाहर पिता, यपनहुँक नाउँ पवितर हखइ। यपनहुँक राज यवइ, यपनहुँक इछा स्‍वरगमा पुरा भेल नहिँया इअ धरतियामा फेनि पुरा हखइ।

हमार दिन-दिनक चाहि लगना जेउना याजु फेनि हमराके देहुँ।

हमार अपराधसभ छमा कर देहुँ, जसने हमरा फेनि हमार विरोधमा पाप करलहरानिके छमा देले बडहुँ।

हमराके परिछासे बचोहुँ, बाकि दुस्‍टसे हमराके रछा करहुँ।’ [केहकेकि राज, सक्‍ति हसे महिमा सबदिन यपनहुँक हखइ। आमेन।]

“यगर तोहार विरोधमा पाप करलहरानिके छमा करबह जउँ, स्‍वरगमा रहलाहर तोहार पिता फेनि तोहराके छमा करबसि।

यकसवामा उडियाहि चेरइयानिके हेरह। हुनुका नत बिया छिटसइ, न यन्‍न कटसइ हसे न बखरियामा बटियोसइ ताफेनि तोहार स्‍वरगमा रहलाहर पिता हुनुकाके खियोससि। कथि तोहरा हुनुकरसे फेनि बहुत मोलक हइने बडह?

“तोहरा यापन तहिँया इअ धरतियामा धन-सम्‍पति जामा झिन करिह, केहकेकि यहवाँ जामा करलि धन-सम्‍पतियाके किरवा खेसइ, किटवा नास पारदेतइ हसे चोरवाह चोराके लिगसइ। बाकि तोहरा यापन तहिँया स्‍वरगमा धन-सम्‍पति जामा करिह, जहवाँ किरवा हइने खेसइ कि किटवा नास हइने पारसइ हसे चोरवाह फेनि हइने चोरोसइ। केहकेकि जहवाँ तोर धन-सम्‍पति हसइ, वहवाँहिँ तोर मन फेनि हसइ।

“कुनहुँ फेनि दु जन मालिकक सेवा करे नाहिँ सकबह। केहकेकि उअ एक जनके हेला करबिय हसे दोसरिके माया करबिय, नत उअ एक जनके यादर करबिय हसे दोसरिके हेला करबिय। वसने करके तोहरा परमेस्‍वर हसे धनक सेवा करे नाहिँ सकबह।

जुन घसवा याजु बडइ हसे यनदिने यगियामा फकेतइ, यगर यसनुक घाँसके त परमेस्‍वर यसके कछोससि जउँ, अरे इचिके विस्‍वास भेल मन्‍से, कथि हुने बहुते तोहराके नाहिँ पेहरोबसि त?

तुइ ककरहुँके किहो देइखुनि, तोर दहिनि हथवाक देलि लबडि हथवा थाह झिन पवइ। ताकि तोर देलि गुप्‍तमा हतइ हसे तोर पिता जुने गुप्‍तमा तोरके देखइ बडसि, हुने तोरके इनाम देबसि।

येसुजि कहते गेलसि, “चेतले रहिह, तोहरा मन्‍सावानिके देखावेके तहिँया कथियो काम झिन करिह। यगर वसने करबह जउँ स्‍वरगमा रहलाहर तोहार पितासे किहो इनाम फेनि नाहिँ पउबह।

“हसे जब तोहरा उपास रहबह, तब कपटियानि नहिँया मलिन मोहडा झिन देखोइह। केहकेकि हुनुका हमरा उपास रहल बडहुँ कहके मन्‍सावानिके देखावेके तहिँया यापन मोहडा मलिन बनोसइ। मुइ तोहराके सदियो कहबहिँ, हुनुका यापन इनाम पासकले बडइ। बाकि तुइ उपास रहइखुनि यापन मुडियामा तेल लगोसि हसे मुहवा धउसि, ताकि तुइ उपास रहल कहके याको मन्‍सावाह थाह झिन पवइ, बाकि गुप्‍तमा रहलाहर तोर पिता देखबसि हसे गुप्‍तमा देखलाहर पिता तोरके इनाम देबसि।