Gewilde Bybelverse vanaf 1 Timoti 2

Deel

Tai Waratoɂo ke. Ma Karaesi Tisasi, ne ɂe noni waraɂimori, ɂi naia maraana, ɂe taua uraruruha matorana Waratoɂo ma rikimana noni. Tisasi ɂe wate moosia ɂi naia maraana hana suruha tarana rikimana noni maania waɂiha tona ɂana mae senaha. Suruha ɂe taua nena, ɂe haataɂania raena Waratoɂo ɂe hana haɂamauri ana rikimana noni.

Ɂaiɂene, haɂapura ɂai, na ka naɂa soɂona ɂare ɂe paina taroriu. Raeku ɂe hana taɂaa Waratoɂo kira ka hoɂasia Waratoɂo hana haipooni ana rikimana noni. Kira ka sukaa hana ɂe ka haipooni kira ma nanamataɂani kira. Ma ɂe rete hana taɂaa Waratoɂo hana kira ka watea raemanoha ke raɂo hana Waratoɂo. Ɂe rete hana kira ka hoɂa tarea Waratoɂo hana hii houra ma rikimana mane ne painaha ɂe ana. Kira ka hoɂasia hana kira ɂuna, hana koru ɂoni ana ɂaisuuha haɂi roɂoha soɂona Waratoɂo ma ɂoniha ana totoraha ɂe otooto.

Raeku ɂe hana hii mane ana rikimana rokota ni taɂaa Waratoɂo, ana rikimana hanua, kira ka hoɂa. Raeku ɂe hana kira ka ɂoni apunaɂa, hana raetaɂaaha ma haitaririha ɂe si ɂoni ana kira ana horoɂa kira ka ahonaɂania ɂaiɂaina kira tarea Waratoɂo ana hoɂaha. Ma ɂua ruɂu, hii keni, ɂe hana kira ka hokosia kareko ɂe hatonana keni norutoɂoha ɂe ana. Tamai, kira si hokosia kareko hana rahe ana kira, taɂa hana haataɂani ana niɂiraeha manamanata ɂe ana kira na. Ma kira si niɂirae paina hana rauniha ana hiro ana ɂihihuna pauna kira, moa rauta ni ɂare toɂi aɂi ɂe rau ana kooru, moa kareko horitaɂi ɂe hane rikaɂa, moa rauniha ana pata. Taɂa, ɂe hana kira ka rauniha ana toɂiha rete kira ka haɂe tau tauɂi, marisiina hii keni ne kira iria kira haɂapainaa ma roɂo soɂona Waratoɂo.