Gewilde Bybelverse vanaf MUV̄ENULIO 14

Deel

Amwesa tsikia ji lalawa pev̄oni lakorongoa: «Angiha: Waɓarikishiha uwafu, wao wafao rangu av̄asa hari mwa uv̄umoja wa Raɓi.» iRoho isurongoa: «Ewa, nawav̄umuwe na hazi zawo, mana zitrendro zawo zisuwaɗunga.»

V̄av̄o ɗe v̄walazimiwani isuɓira ya watwaharifu wasikao ziãmuri za Mungu na uaminifu wa Insa.

Akorongoa ha ji lendza nguvu: «Namuriye Mungu, tsena mumutukuze, mana uwakati wa uhukumu wahe uwaswili. Namuãɓudu Monyewe uumba uwingu, ishiv̄andre ya tsi, iɓahari na yamatso ya maji.»

Malayika yangina, ya raru, iziɗungu na urongoa ha ji lendza nguvu: «Yotsi aãɓuduo ishinyama mbovu na lisanamwe layo, tsena apara ãlama usoni au muhonoju, atsonwa waye wajau, uushi wa ihadhaɓu ya Mungu watsomolwa ɓila utsanganisiwa, moni na ishikombe ya hadhaɓu yahe. Atsotreswa moni na moro na vu la shidzaha mbeli na zimalayika ndzitwaharifu, na mbeli na uMwana Ɓariɓari. Na umwesi wa matreso yawo usuhea dahari. Kawasina uv̄umuzi, tsi mutsana wala uku, wao waãɓuduo ishinyama mbovu na lisanamwe layo, na yotsi aparao iãlama ya lidzina layo.»

Amwesa tsiono uMwana Ɓariɓari ahima hari mwa uMulima wa Siyuna. Na v̄umoja na waye, v̄uka watru alifu miya wa aruɓaini na nne (144 000), walio amba usoni hawo v̄uka v̄uangihwa lidzina lahe na lidzina la Ɓaɓahe.

Tsiono tsena malayika yangina yakov̄euha hari-hari na uwingu; ikana haɓari ndjema ya daima aijudze ha uwakazi wa ishiv̄andre ya tsi, ha kula nishani, ha kula kaɓila, ha kula luha na ha kula umati.

Sa ile malayika yangina, ya v̄ili, iɗungu na urongoa: «Ikomoha, ikomoha, Ɓaɓiluna iƁole, waye anosa piya zinishani ushi muhali wa uzindzi wahe.»