Kha vha ṋee Mudzimu vhuimo ha u thoma预览

U Kunda Nndwa dza Vhutshilo nga Thuso ya Mudzimu

Hu na nndwa ya vhutshilo hoṱhe ine ya khou lwiwa kha vhutshilo hashu. Kha ḽiṅwe sia hu na ṱhuṱhuwedzo ya mvelo ya kale ya tshivhi - nḓowelo dzenedzo dza kale dzine dza dzula dzi hone, milingo na zwivhi zwe zwa vha zwi tshi ri konḓela u zwi kunda. Musi tshifhinga tshi tshi khou ḓi ya ri tshi khou aluwa kha lwendo lwasjhu lwa u tshimbila na Mudzimu, ṱhuṱhuwedzo ya mvelo ya tshivhi i a fhungudzea. Kha ḽiṅwe sia ndi ṱhuṱhuwedzo i khou aluwaho ya u vha hone ha Muya Mukhethwa vhutshiloni hashu. Hezwi ndi zwithu zwivhili zwine zwa lwa sa zwe zwa ṱalutshedzwa kha Vhagalata:

“Ndi tshi ralo ndi ri: inwi tshimbidzwani nga Muya, ndi hone ni sa ḓo ita zwi funwaho nga tsiko yaṋu ya kale. Zwine tsiko ya muthu ya zwi funa a zwi anḓani na zwi funwaho nga Muya; hu ḓi nga zwi funwaho nga Ene Muya zwi sa anḓani na zwi funwaho nga tsiko ya muthu. Hezwi zwivhili a zwi anḓani, zwine zwa amba uri ni nga si sokou ita zwine na funa” Vhagalata 5:16-17

Ipfhi ḽa Mudzimu ḽi ri ṱuṱuwedza uri ri “tshile nga Muya.” Nga maṅwe maipfhi, ri fanela u tendela ṱhuṱhuwedzo ya Muya Mukhethwa i tshi kunda ṱhuṱhuwedzo ya mvelo ya tshivhi vhutshiloni hashu.

Kanzhi, a zwi ngo leluwa sa zwine zwa vhonalisa zwone. Mvelo yashu ya tshivhi i ri ṱuṱuwedza uri ri dzhie phetho u itela u fusha zwipikwa na nyemulo dza u ḓiṱoḓela zwashu. Hezwi zwi vhidzwa mulingo, nahone Yakobo o zwi ṱalutshedza nga heyi nḓila:

“Ndi zwone, hu songo vha na ane a ri a tshi lingea, a ri, “Ndo rewa nga Mudzimu.” Mudzimu ha lingei, nahone Ene muṋe ha xedzi muthu. Ane a lingea u ungiwa nga vhuanzwo ha nyemulo dzawe, a fashwa.” Jakopo 1:13-14

Ndi musi ri tshi dzhia phetho ya u ḓiṋekedza kha mulingo hune zwa vha tshivhi.

“Huno nyemulo musi yo no amara i dzwala vhutshinyi, vhutshinyi ho no aluwa ha guma nga u beba lufu.” Jakopo 1:15

Naho zwo ralo, zwi mangadzaho ndi uri sa tshipiḓa tsha lufuno lwo dzikaho lwa Mudzimu na tshilidzi tsho ṋekedzwaho Vhakhriste vhoṱhe, Mudzimu u a ri hangwela na u ri ṱanzwa zwivhi zwashu zwoṱhe. Ro hangwelwa tshoṱhe 100%.

“Hone arali ri tshi tenda zwe ra tshinya, Mudzimu u a ri hangwela a ṱanzwa vhuvhi hashu hoṱhe; ha khakhi, zwe a ri fulufhedzisa u a zwi ita.” 1 Johanisi 1:9

Fhedzi hu kha ḓi vha na khombo kha u litsha tshivhi tshi songo langea. Naho Mudzimu a tshi ri hangwela na u ri kunakisa, ha thivheli tshinyalelo ya masiandaitwa ane zwivhi zwashu zwa sia zwo i ita. Naho Mudzimu a tshi ḓo dzula a tshi ri thusa zwifhingani zwi konḓaho, naho zwo ḓiswa nga tsheo dzashu, vhukando hashu ha khwine ndi u ita zwoṱhe zwine ra nga kona u itela uri ri songo vhuya rat homa ra dzhia dzenedzo tsheo.

Vhakorinta ya 1 i ṱalutshedza masia mavhili a ndeme a u lwa na mulingo na tshivhi:

“Milingo yoṱhe ye na ṱangana nayo ndi ine muthu a nga i kunda. Mudzimu u a fulufhedzea; a nga si tendele ni tshi lingwa lune na kundwa; musi ni tshi lingwa u ḓo ni ṋea nungo uri ni kone u konḓelela, u ralo ha vha u ni vulela kubuli kwa u ponyoka.” 1 Vhakorinta 10:13

Tsha u thoma ndi uri a ri roṱhe kha nndwa yashu. Vha nga zwi ḓivha uri hu na vhaṅwe Vhakhriste, vhane vha nga vha vho no vha na maḓuvha a 30 kana miṅwaha ya 30 vha tshi khou tshimbila na Mudzimu, vhane vha kha ḓi lwa na tshivhi na milingo ine ya fana na yavho.

Tsha vhuvhili, ndi uri Mudzimu ha nga ḓo ri tendela ri tshi lingwa lune ra nga sala ri sa koni u dzhia tsheo ya u ila tshivhi. U ḓo dzulela u ri ṋea nḓila ya u ponyoka. Mushumo washu, naho u tshi nga vha u na khaedu, ndi u wana yeneyo nḓila vhukati ha mulingo washu.

Khethekanyo i tevhelaho i ṋea nḓila yo tewaho Bivhilini a u lwa na tshivhi na mulingo. U tevhedza pulane iyi ndi iṅwe ya nḓila dza u ṋea Mudzimu vhuimo ha u thoma vhutshiloni havho!