ਪਰਮੇਸ਼ੁਰ ਨੂੰ ਪਹਿਲਾ ਸਥਾਨ ਦਿਓ预览

“ਪਰਮੇਸ਼ੁਰ ਦੀ ਮਦਦ ਨਾਲ ਜੀਵਨ ਦੀਆਂ ਲੜਾਈਆਂ ਨੂੰ ਜਿੱਤਣਾ”

ਇੱਕ ਜੀਵਨ ਭਰ ਦੀ ਲੜਾਈ ਹੈ ਜੋ ਸਾਡੇ ਜੀਵਨਾਂ ਦੇ ਲਈ ਲੜੀ ਜਾ ਰਹੀ ਹੈ। ਇੱਕ ਪਾਸੇ ਉਸ ਪੁਰਾਣੇ ਪਾਪੀ ਸੁਭਾਅ ਦਾ ਪ੍ਰਭਾਵ ਹੈ - ਉਹ ਪੁਰਾਣੀਆਂ ਸੁਸਤ ਪ੍ਰਵਿਰਤੀਆਂ, ਪਰਤਾਵੇ ਅਤੇ ਪਾਪ ਜਿਨ੍ਹਾਂ ਉੱਤੇ ਜਿੱਤ ਪਾਉਣਾ ਸਾਡੇ ਲਈ ਔਖਾ ਹੈ। ਸਮੇਂ ਦੇ ਨਾਲ ਜਿਵੇਂ-ਜਿਵੇਂ ਅਸੀਂ ਪਰਮੇਸ਼ੁਰ ਦੇ ਨਾਲ ਚੱਲਣ ਵਿੱਚ ਪਰਿਪੱਕ ਹੁੰਦੇ ਜਾਂਦੇ ਹਾਂ, ਪਾਪੀ ਸੁਭਾਅ ਦਾ ਪ੍ਰਭਾਵ ਕਮਜ਼ੋਰ ਹੁੰਦਾ ਜਾਂਦਾ ਹੈ। ਦੂਜੇ ਪਾਸੇ ਸਾਡੇ ਜੀਵਨ ਵਿੱਚ ਪਵਿੱਤਰ ਆਤਮਾ ਦੀ ਮੌਜੂਦਗੀ ਦਾ ਵੱਧ ਰਿਹਾ ਪ੍ਰਭਾਵ ਹੈ। ਇਹ ਦੋ ਵਿਰੋਧੀ ਤਾਕਤਾਂ ਹਨ ਜਿਵੇਂ ਕਿ ਗਲਾਤੀਆਂ ਵਿੱਚ ਵਰਣਨ ਕੀਤਾ ਗਿਆ ਹੈ:

“ਪਰ ਮੈਂ ਆਖਦਾ ਹਾਂ, ਤੁਸੀਂ ਆਤਮਾ ਦੁਆਰਾ ਚੱਲੋ ਤਾਂ ਸਰੀਰ ਦੇ ਵਿਸ਼ਿਆਂ ਨੂੰ ਕਦੇ ਪੂਰਿਆਂ ਨਾ ਕਰੋਗੇ। ਕਿਉਂ ਜੋ ਸਰੀਰ ਆਤਮਾ ਦੇ ਵਿਰੁੱਧ, ਅਤੇ ਆਤਮਾ ਸਰੀਰ ਦੇ ਵਿਰੁੱਧ ਲੋਚਦਾ ਹੈ ਕਿਉਂ ਜੋ ਏਹ ਇੱਕ ਦੂਏ ਦੇ ਵਿਰੁੱਧ ਹਨ ਤਾਂ ਜੋ ਤੁਸੀਂ ਜੋ ਚਾਹੁੰਦੇ ਸੋ ਨਾ ਕਰੋ।” ਗਲਾਤੀਆਂ 5:16-17

ਪਰਮੇਸ਼ੁਰ ਦਾ ਬਚਨ ਸਾਨੂੰ “ਆਤਮਾ ਦੁਆਰਾ ਜੀਉਣ” ਲਈ ਉਤਸ਼ਾਹਿਤ ਕਰਦਾ ਹੈ। ਦੂਜੇ ਸ਼ਬਦਾਂ ਵਿੱਚ, ਸਾਨੂੰ ਪਵਿੱਤਰ ਆਤਮਾ ਦੇ ਪ੍ਰਭਾਵ ਨੂੰ ਸਾਡੇ ਜੀਵਨ ਵਿੱਚ ਪਾਪੀ ਸੁਭਾਅ ਦੇ ਪ੍ਰਭਾਵ ਉੱਤੇ ਜਿੱਤ ਪਾਉਣ ਦੀ ਇਜਾਜ਼ਤ ਦੇਣੀ ਚਾਹੀਦੀ ਹੈ।

ਕਈ ਵਾਰ, ਇਹ ਕਰਨ ਨਾਲੋਂ ਕਹਿਣਾ ਸੌਖਾ ਹੈ। ਸਾਡਾ ਪਾਪੀ ਸੁਭਾਅ ਸਾਨੂੰ ਸੁਆਰਥੀ ਇੱਛਾਵਾਂ ਅਤੇ ਸ਼ੌਂਕ ਪੂਰੇ ਕਰਨ ਲਈ ਫ਼ੈਸਲੇ ਲੈਣ ਵਾਸਤੇ ਉਕਸਾਉਂਦਾ ਹੈ। ਇਸ ਨੂੰ ਪਰਤਾਵਾ ਕਿਹਾ ਜਾਂਦਾ ਹੈ ਅਤੇ ਯਾਕੂਬ ਇਸ ਦਾ ਵਰਣਨ ਇਸ ਤਰ੍ਹਾਂ ਕਰਦਾ ਹੈ:

"ਕੋਈ ਮਨੁੱਖ ਜਦ ਪਰਤਾਇਆ ਜਾਵੇ ਤਾਂ ਇਹ ਨਾ ਆਖੇ ਭਈ "ਮੈਂ ਪਰਮੇਸ਼ੁਰ ਵੱਲੋਂ ਪਰਤਾਇਆ ਜਾਂਦਾ ਹਾਂ" ਕਿਉਂ ਜੋ ਪਰਮੇਸ਼ੁਰ ਬਦੀਆਂ ਤੋਂ ਪਰਤਾਇਆ ਨਹੀਂ ਜਾਂਦਾ ਹੈ ਅਤੇ ਨਾ ਉਹ ਆਪ ਕਿਸੇ ਨੂੰ ਪਰਤਾਉਂਦਾ ਹੈ; ਪਰ ਹਰ ਕੋਈ ਤਦੇ ਪਰਤਾਇਆ ਜਾਂਦਾ ਹੈ ਜਦੋਂ ਆਪਣੀ ਹੀ ਕਾਮਨਾ ਨਾਲ ਲੁਭਾਇਆ ਅਤੇ ਭੁਚਲਾਇਆ ਜਾਂਦਾ ਹੈ।" ਯਾਕੂਬ 1:13-14

ਜਦੋਂ ਤੱਕ ਸਾਡੇ ਵੱਲੋਂ ਕਿਸੇ ਪਰਤਾਵੇ ਅੱਗੇ ਝੁਕਣ ਦਾ ਫ਼ੈਸਲਾ ਨਹੀਂ ਲਿਆ ਜਾਂਦਾ ਉਦੋਂ ਤੱਕ ਇਹ ਪਾਪ ਨਹੀਂ ਬਣਦਾ।

“ਤਦ ਕਾਮਨਾ ਜਾਂ ਗਰਭਣੀ ਹੋਈ ਤਾਂ ਪਾਪ ਨੂੰ ਜਣਦੀ ਹੈ, ਅਤੇ ਪਾਪ ਜਾਂ ਪੂਰੇ ਵਿੱਤ ਨੂੰ ਪੁੱਜਦਾ ਹੈ ਤਾਂ ਮੌਤ ਨੂੰ ਜਨਮ ਦਿੰਦਾ ਹੈ।" ਯਾਕੂਬ 1:15

ਪਰ, ਹੈਰਾਨੀ ਦੀ ਗੱਲ ਹੈ ਕਿ ਸਾਰੇ ਮਸੀਹੀ ਲੋਕਾਂ ਲਈ ਪਰਮੇਸ਼ੁਰ ਦੇ ਡੂੰਘੇ ਪਿਆਰ ਅਤੇ ਕਿਰਪਾ ਦੇ ਰੂਪ ਵਿੱਚ, ਪਰਮੇਸ਼ੁਰ ਸਾਨੂੰ ਮਾਫ਼ ਕਰਦਾ ਹੈ ਅਤੇ ਸਾਨੂੰ ਸਾਡੇ ਸਾਰੇ ਪਾਪਾਂ ਤੋਂ ਸ਼ੁੱਧ ਕਰਦਾ ਹੈ। ਸਾਨੂੰ ਬਿਲਕੁਲ 100% ਮਾਫ਼ ਕੀਤਾ ਗਿਆ ਹੈ।

"ਜੇ ਅਸੀਂ ਆਪਣਿਆਂ ਪਾਪਾਂ ਦਾ ਇਕਰਾਰ ਕਰੀਏ ਤਾਂ ਉਹ ਵਫ਼ਾਦਾਰ ਅਤੇ ਧਰਮੀ ਹੈ ਭਈ ਸਾਡੇ ਪਾਪਾਂ ਨੂੰ ਮਾਫ਼ ਕਰੇ ਅਤੇ ਸਾਨੂੰ ਸਾਰੇ ਕੁਧਰਮ ਤੋਂ ਸ਼ੁੱਧ ਕਰੇ।" 1 ਯੂਹੰਨਾ 1:9

ਪਰ ਪਾਪ ਨੂੰ ਬਿਨਾਂ ਰੋਕ-ਟੋਕ ਜਾਰੀ ਰਹਿਣ ਦੇਣ ਵਿੱਚ ਅਜੇ ਵੀ ਇੱਕ ਖ਼ਤਰਾ ਹੈ। ਜਦ ਕਿ ਪਰਮੇਸ਼ੁਰ ਸਾਨੂੰ ਮਾਫ਼ ਕਰਦਾ ਹੈ ਅਤੇ ਸਾਨੂੰ ਸ਼ੁੱਧ ਕਰਦਾ ਹੈ, ਉਹ ਜ਼ਰੂਰੀ ਤੌਰ ਤੇ ਨਤੀਜਿਆਂ ਅਤੇ ਹਾਲਾਤਾਂ ਦੇ ਵਿਨਾਸ਼ਕਾਰੀ ਮਾਰਗ ਨੂੰ ਖਤਮ ਨਹੀਂ ਕਰਦਾ ਜੋ ਪਾਪ ਪਿੱਛੇ ਛੱਡ ਜਾਂਦਾ ਹੈ। ਜਦ ਕਿ ਪਰਮੇਸ਼ੁਰ ਹਮੇਸ਼ਾ ਮੁਸ਼ਕਲ ਸਮਿਆਂ ਵਿੱਚ ਸਾਡੀ ਮਦਦ ਕਰੇਗਾ, ਭਾਵੇਂ ਇਹ ਸਾਡੇ ਆਪਣੇ ਫ਼ੈਸਲਿਆਂ ਕਰਕੇ ਸਾਡੇ ਤੇ ਆਏ ਹੋਣ, ਸਾਡੇ ਲਈ ਸਭ ਤੋਂ ਵਧੀਆ ਕੰਮ ਇਹ ਹੈ ਕਿ ਅਸੀਂ ਪਹਿਲਾਂ ਹੀ ਉਹ ਫੈਸਲੇ ਲੈਣ ਤੋਂ ਬਚਣ ਦੀ ਹਰ ਸੰਭਵ ਕੋਸ਼ਿਸ਼ ਕਰੀਏ।

1 ਕੁਰਿੰਥੀਆਂ ਨੇ ਪਰਤਾਵੇ ਅਤੇ ਪਾਪ ਨਾਲ ਪ੍ਰਭਾਵਸ਼ਾਲੀ ਢੰਗ ਨਾਲ ਨਜਿੱਠਣ ਲਈ ਦੋ ਮਹੱਤਵਪੂਰਣ ਪਹਿਲੂਆਂ ਦਾ ਵਰਣਨ ਕੀਤਾ ਹੈ:

“ਤੁਹਾਡੇ ਉੱਤੇ ਇਹੋ ਜਿਹਾ ਕੋਈ ਪਰਤਾਵਾ ਨਹੀਂ ਪਿਆ ਜੋ ਮਨੁੱਖ ਤੋਂ ਨਹੀਂ ਝੱਲਿਆ ਜਾਂਦਾ ਪਰੰਤੂ ਪਰਮੇਸ਼ੁਰ ਵਫ਼ਾਦਾਰ ਹੈ ਜੋ ਤੁਹਾਡੀ ਸ਼ਕਤੀਓਂ ਬਾਹਰ ਤੁਹਾਨੂੰ ਪਰਤਾਵੇ ਵਿੱਚ ਨਹੀਂ ਪੈਣ ਦੇਵੇਗਾ ਸਗੋਂ ਪਰਤਾਵੇ ਦੇ ਨਾਲ ਹੀ ਬਚ ਜਾਣ ਦਾ ਉਪਾਓ ਵੀ ਕੱਢ ਦੇਵੇਗਾ ਭਈ ਤੁਸੀਂ ਝੱਲ ਸੱਕੋ।” 1 ਕੁਰਿੰਥੀਆਂ 10:13

ਪਹਿਲਾ ਇਹ ਕਿ ਅਸੀਂ ਆਪਣੀ ਜੱਦੋ ਜਹਿਦ ਵਿੱਚ ਇਕੱਲੇ ਨਹੀਂ ਹਾਂ। ਤੁਸੀਂ ਜਾਣ ਸਕਦੇ ਹੋ ਕਿ ਹੋਰ ਮਸੀਹੀ ਲੋਕ ਵੀ ਹਨ, ਭਾਵੇਂ ਉਨ੍ਹਾਂ ਨੂੰ 30 ਦਿਨ ਜਾਂ 30 ਸਾਲ ਪਰਮੇਸ਼ੁਰ ਦੇ ਨਾਲ ਚੱਲਦਿਆਂ ਹੋ ਗਏ ਹੋਣ, ਜੋ ਅਜੇ ਵੀ ਤੁਹਾਡੇ ਵਾਂਗ ਪਾਪ ਅਤੇ ਪਰਤਾਵੇ ਨਾਲ ਜੱਦੋ ਜਹਿਦ ਕਰਦੇ ਹਨ।

ਦੂਜਾ, ਇਹ ਹੈ ਕਿ ਪਰਮੇਸ਼ੁਰ ਸਾਨੂੰ ਉਸ ਸੀਮਾ ਤੋਂ ਪਰੇ ਪਰਤਾਏ ਜਾਣ ਦੀ ਇਜਾਜ਼ਤ ਨਹੀਂ ਦੇਵੇਗਾ ਜਿੱਥੇ ਅਸੀਂ ਪਾਪ ਤੋਂ ਬਚਣ ਦਾ ਫ਼ੈਸਲਾ ਕਰਨ ਵਿੱਚ ਅਸਮਰੱਥ ਹੋਈਏ। ਉਹ ਹਮੇਸ਼ਾ ਬਚਣ ਦਾ ਉਪਾਓ ਕੱਢ ਦੇਵੇਗਾ। ਸਾਡਾ ਕੰਮ, ਭਾਵੇ ਇਹ ਕਿੰਨਾ ਵੀ ਚੁਣੌਤੀਪੂਰਨ ਹੋਵੇ, ਸਾਡੇ ਪਰਤਾਵੇ ਦੇ ਵਿੱਚ ਉਹ ਉਪਾਓ ਲੱਭਣਾ ਹੈ।

ਹੇਠਾਂ ਦਿੱਤਾ ਭਾਗ ਪਾਪ ਅਤੇ ਪਰਤਾਵਿਆਂ ਨਾਲ ਪ੍ਰਭਾਵਸ਼ਾਲੀ ਢੰਗ ਨਾਲ ਨਜਿੱਠਣ ਲਈ ਬਾਈਬਲ-ਆਧਾਰਿਤ ਰਣਨੀਤੀ ਪ੍ਰਦਾਨ ਕਰਦਾ ਹੈ। ਇਸ ਯੋਜਨਾ ਨੂੰ ਅਮਲ ਵਿੱਚ ਲਿਆਉਣਾ ਤੁਹਾਡੇ ਜੀਵਨ ਵਿੱਚ ਪਰਮੇਸ਼ੁਰ ਨੂੰ ਪਹਿਲਾ ਸਥਾਨ ਦੇਣ ਦਾ ਇੱਕ ਹੋਰ ਤਰੀਕਾ ਹੈ!