Yakobo 3
3
Urëmë
1Vaunaanë, në vingë mukhatë anyu vitatendeke asëyi. Mwino chuu mumanyie, sese asëyi guuhanga iramuëywa në iküü nanguu ukëra vangëja. 2Sese soong'e guuhutyaa makhondo mingë. Ëgweeso nësa muntu atiuhutyaa mu urighëti wakwe, uvii, wasuu unë ukhondekekie, na udahëte umibala nkhoo akwe oong'e. 3Sese guuyitendeyaa nyümbu ighava mu moomo wawe gusoko yëdahe uhonga mwino guufenja, na gwa njëa ësëë guudaha uyighoorea goong'e nëguufenja yende.
4Meli njeeso noo, mbesa nküü ino, ëgusuntëëywaa na mpefo në nkharë, igudahwaa ufëëntuwa gwa ifoteo inyuughuu ino, aghooka goong'e kunë nahosa ugufenja ende. 5Vii uvii, urëmë, mbesa wë nongo nyuughuu a mwëërë, ugiküryaa mumantu në maküü ino. Moto unyuughuu ugudaha urungwëërya ihaka në iküü!
6Vii uvii urëmë wëë mwino moto. Wijue ino në mavë, wina iyoma rakwe mu mëërë itu na ugukündanëyaa uvë mu nkhoo yitu yoong'e. Uguruungwerëëryaa uduvi witu woong'e gwa moto nëuguduaa gwa arungu va makhaa. 7Mwaamuntu udahëte uyatugha maimwana, na wadahie utughaa ntundo yoong'e ya maimwana agihaka, nyonyi, njokha nanë ntundo a mumajë. 8Ëgweeso gutie muntu nëwadahie uwutughaa urëmë. Urëmë unë intu në ivë utigibalwaa, na wijue ülülü në uguuraghaa. 9Gwa urëmë sese, guumurumbaa Müküü na Tata witu. Gwa urëmë uruuro uruuro guuvajumaa antu, antu nëvëtundiwe gwa nyinkhori a Muungu. 10Nkhani ya ujumi nanë ya ükürya yiuduaa mu moomo rumwe. Vaunaanë, mantu ayaa ëtinoneye utendeka uvii. 11Wurë, murihë rumwe ugudaha uduya majë në mafoo nanë malülü itambëëmwena? 12Vaunaanë, wurë, mütë wa mutini ugudaha uduya seitunina? Mbesa musabibu ugudaha uvëësya tinina? Murihë wa majë a munyu utiudaha uduya majë në mafoo.
Ihaa nërëfumie gunto gërunde
13Anyu në wina ihaa nanë umanyi mukhatë anyuhe? Uvii araghëëre ihanyo rasëë gwa mweendendo wakwe në uja nanë gwa ntendo yakwe në njija nëyigutendekaa gwa winyumpyi nanë ihaa. 14Ëgweeso nësa nkhoo yanyu yijue wiru, wihuri nanë giraraava muntu mweeso mughonjo uvii, mutagikumanjuee na urëghitya weegheeghe fana tutë. 15Ihaa nërëmwino rasëë rëtiuduaa girunde, ihaa rasëë ra urëmi, ra ufang'ë, kangë unë ra gësetani. 16Gusoko soong'e fana gwina wiru nanë giona muntu mughonjo, faafo gwina faghafagha nanë mu intu në ivë. 17Ëgweeso ihaa nërëdwëëre gunto girunde mwandyo uunë ija rëanjëte majëghana, ufoo nanë uvakeera antu, rijue goonea uvavi na rëufafaa nkhari ya ntendo në njija, rëtina ubaghui mbesa lakuno. 18Uduvi nëuja uunë mbeyu gwa vasaa nëvëyanjëte majëghana vëufandëaa mu majëghana.
Kirimi New Testament © Bible Society of Tanzania, 2008.