Yakobo 4
4
Unyambuya na urëmi
1Fëta nanë wituki woong'e mukhatë anyu ëgudwëëraafehe? Ëgudwëëraa münkümbü yanyu nëmbë yasëë nëigikhuvaa matungo oong'e mukhatë anyu. 2Mwina nkümbü na mantu na gusoko mutiuyahangaa muufenja guuragha, mwina nkümbü ino uhanga mantu, gweeso mutiuyahanga, uvii mugituka nanë gikhuva. Mutiurëhangaa rasëë nëmuurëfenja gusoko mutiurërombaa kunë Muungu. 3Kangë, nëmuuromba mutiuhangaa gusoko murombaa gwa isëgho në ivë muurombaa gusoko mudahe uyanjisya nkümbü yanyu. 4Nyenye mwë antu nëvëtiuhuvëwa mwino afümbu. Wurë, mutighune mwino utenda unyambuya na urëmi uu në utenda mürüghü na Muungu na? Muntu gëkaku nëugufenja utenda unyambuya na urëmi ugitenda mürüghü na Muungu. 5Mutasëghee Maandëko në Meru ëguhanyaa nkhani ya usoo fana ëguhanyaa: “Mwahu wasuu në Muungu wamüvëkie mükhatë itu una wiru üküü ino.” 6Ëgweeso, mboto nëgwafewa na Muungu ina nguu ino, mwino ëguhanyaa Maandëko: “Muungu uguvafëngaa anya giona ëgweeso uguvafaa mboto nëvëginyumpyaa.”
7Uvii, ifunyi kunë Muungu, mufëngi Ibilisi mweesonoo ugumutigha. 8Ihumbeeyi kunë Muungu, mweesonoo ujie fifë fana nyee. Oyi mëkhono anyu nyee anya mahutye! Oyi nkhoo yanyu nyee anyalakuno! 9Oni uvavi, küti nanë uhongeeya, iheka ranyu rëtendeke gëëro, uyanjo utendeke gëëro nëgëküü. 10Inyumpyi usonge amwa Müküü, mweesonoo ügümühümbüa.
Ryonyo ra umuramuëya munyandughu
11Anyandugughu vanë, mutagënang'ane nyenye gwa nyenye. Wasuu nëugumunang'anaa muunaakwe nanë umuramwëya, uguminang'ana vivë na umëramwëya Seria. Nësa ugumëramuëëya Seria uvii, veve utiumekwatëra Seria, ëgweeso ugumëramuëëya. 12Muungu mweeso umwendu wasuu unëwamëvëkie Seria na uramuëëya. Uu në mweeso umwenedu gutufu nëudahëte utyoa nanë ukhalanga. Uvii, veve wëë anyuhe nëugumuramuëëya mwaamuntu muuyako?
Ryonyo gwa giona
13Uvii, itungwee tegheeyi nyee nëmuuhanyaa: “Rio mbesa fadiu gwëënjë ümuji wa gëtuunga na gëkhaa kuuko mwakha woong'e sa guutenda nsuruje na gihangëa nsao.” 14Nyenye mütighune mbesa uduvi wanyu naa ugutendeka würi fadiu! Nyee mwëë mwino üküngü nëugudwëëraa gwa itungo ikufë gütüfü na uwüra kangë. 15Aja imunoneye uhanya: “Në Müküü wayanja ugufa guurëtenda ërëë mbesa ëroo.” 16Ëgweeso itungwee mugiona na gighooghonja, wighooghonji wasuu uvë.
17Uvii, muntu wasuu nëatiurëtendaa intu në ija nëumanyie mwino chuu imononeye arëtende, ugutenda ihutye.
Kirimi New Testament © Bible Society of Tanzania, 2008.