Yakobo 2
2
Rionyo gwa ubaghui
1Anyandughu vanë, nëmumuhuvëe Müküü Yesu Kiristo, Müküü wa weru, mutavabaghue antu mbanduvë. 2Guhanye muntu umwe nëuriee madisa a sahabu na masaa në maja wingëa mu mwirundo wanyu, na muu gënyafaafo wingëa muntu mütuki nëuriee masaa mavë. 3Nësa müümukeeraa nanguu wasuu nëuriee masaa në maja na umwëëra: “Ikhaa afaa fana guja,” na umükhanëa mütuki uyoo, “Veve, imëka ukoo,” mbesa “ikhaa afaa fangë mumëghuu anë,” 4wurë wasuu ti ubaghui mukhatë anyunahe! Wurë, na ubaghui wanyu wasuu ti ufumie mu masëgho anyu në mavëna?
5Ayanjwi vaunaanë, tegheeyi! Muungu waahwaaniye antu në atuki mu urëmi uruu vëdahe utenda aghwarë mu uhuvëi na ughenyifa Utemi nëwawafee iraghano vasaa nëvëmwaanjëte. 6Ëgweeso nyenye muuvahoryaa antu në atuki! Wurë, aghwarë ti vëumwonyatëyaa ino na umutoa ubarasa na? 7Wurë ti avaavo avaavona nëvëurëtukaa rina ranyu rasëë në ija nëmwafewe na?
8Nësa muutenda mwino ihanyiye seria ëyoo në a Utemi mwino ëandëkiwe mu Maandëko në Meeru: “Muyanjë mwaamuntu muuyako mwino veve mughonjo wianjëte,” ësa muutenda vija ino. 9Ëgweeso nëmwavabaghuwa antu, uvii, muutenda ihutye, na Seria ëgumuramwëëya mwino mwahutyaa. 10Wasuu nëwagwa u seria ëmwe, ugutenda wagwa seria oong'e. 11Gusoko uyuuyo uyuuyo nëwahanyiye, “Utalehadee,” wahanyiye noo “Utauraghee.” Gwa uvii, mbesa winalehada gweeso wauraghaa, veve watendaa hiya na seria. 12Uvii, hanyi na utenda mwino antu nëvëjie uramuiywa gwa seria nëëgeetaa uhaghaaro. 13Gusoko, Muungu atiudaha goonëëa uvavi nëikwë voomuramuëya muntu wasuu nëatigonëaa uvavi vangëja. Ëgweeso goonëa uvavi ëguhuma iramuëya.
Uhuvëi nanë ntendo
14Vaunaanë, gwina gëhabanga kë muntu uhanya ukweti uhuvëi gweeso atiuraghëëra gwa ntendo? Wurë uhuvëi wasuu ugudaha umutyoana? 15Guhanye muunaako mbesa muhajaa ako atikweti masaa mbesa malëwa. 16Ivanoneye ntuni në nyee mwavëëra vasaa: “Endi na majëghana mwende goota moto na gikuta,” gwa udëa uvafa asaa nëvëuyafënja muuduvi wawe? 17Uvii uvii, uhuvëi weeso utufu nëutina ntendo wakure.
18Ëgweeso muntu udahëte uhanya: “Veve ukweti uhuvëi, nene nkweti ntendo!” Ari! ndaghëëri mwino muntu ugudaha utendeka wina uhuvëi na uwürya ntendo, nenenoo nguguraghëëra uhuvëi wanë gwa ntendo yanë. 19Wurë, veve uhuvëe mwino chuu Muungu urëfo umwedu na? Vija! Ëgweeso nanë vinyonyinyonyi vëhuvëe rasëë, na ukhakhata gwa wova. 20Müfütu vee! Wurë, ugufenja uraghëërwa mwino uhuvëi në utina ntendo wakure? 21Wurë, Iburahimu tata witu agayanjëka wurë usonge a Muungu? Gwa ntendo yakwe, itungo nënaa agamuduya mwanakwe Isaki ikumbëko mumasabahu. 22Woona, mwino uhuvëi wakwe naa wihongie na ntendo yakwe, uhuvëi wakwe ugakhondekeka gwa ntendo yakwe, 23uvii ëgakhondekeka Maandëko në Meru nëëguhanyaa: Iburahimu agamuhuvëa Muungu, na gwa uhuvëi wakwe agatendeka unoneye utendeka muntu në muja, na uvii Iburahimu agataanwa munyambuya wa Muungu. 24Mwoona uvii, mwino muntu ugutendekaa ayanjëke usonge a Muungu gwa ntendo yakwe na ti gwa uhuvëi wakwe gutufu.
25Naa gwëë uvii uvii kunë müfümbu Rahabu, mweeso agatendeka muntu muja gusoko agavaghenyifa amahi avoo na uvaarëëya vende kunë vinjë gwa ukëëra njëa ëngëja. 26Uvii, mwino chuu mwëërë nëutikweti nkhoo wakure, vii uvii uhuvëi nëutina ntendo ukure.
Kirimi New Testament © Bible Society of Tanzania, 2008.