Luk 2
2
Nda bedziya Zezu
1Ndili yayu, kani Ogiste aluma ne utala batu se ilongo dzesi. 2Yedze ni untalu nwen wika. Ndili mene yayu Kilinusi edze ni kani we ilongo dze Sili. 3Ye batu besi betse untalu, mutu ne mutu se ngundu ye bedziya wangu. 4Ne Zozefi atelime ngundu ye Nazaleti, se Galile ne utse ngundu ye Betileyeme se Zude ye bedziya Davidi, ne Zozefi edze we imbisa dze Davidi. 5Zozefi atse bane Maliya witse yikwe nwadzi wedzi, yayu betala ne bangu, Maliya edze ne dzimi. 6Ye bangu bedze Betileyeme, ndili ye Maliya ye udziya ya kalwe. 7Maliya adziya nwana wedzi we wika we ibaka, wangu avungule nwana mikanda ayala wangu se batsi ye bibodzi bidza, ne bangu beke kobise buma se ndaku ye benzenze.
TUMA WE NZAMBI AYA TANDA UNSISILI UNVE NE BEBATI BE BIBODZI
8Se ngundu mene yangu yotu, yedze ne bebati be bibodzi bedze nedze se mekuba ne pindzi, ne ubata bibodzi. 9Tuma we Nzambi aya palikise tima ye bangu ne likuma le Nzambi kwalala, ye bangu beyene bongo amene. 10Tuma we Nzambi ne bangu ati: «Dzikayi yene bongo, memeya ni ye tanda beyi misisili mive, mitse dze itsisa dzineni dze batu besi. 11Lolo se ngundu ye Davidi, badziya beyi unlungisi Klisti we Nzambi etobo, wangu ni kunwu. 12Yenayi ndinvu ye beyi bitse yimba wangu, beyi betse kobise nwana we teketeke bavungule mikanda bayala se batsi ye bibodzi bidza.» 13Palikise, ye boko betuma beyitsi beyinga ikulu, baya kobise we wika ne vutise Nzambi live ati: 14«Likuma le Nzambi we kata ikulu amene, ne itavu se sendze ne batu bedzi itondo.»
Bebati be bibodzi batse Betileyeme
15Ye betuma be Nzambi bevutse ikulu, bebati be bibodzi bawowe tima ye bangu ati: «Tumbayi Betileyeme betse yene me meya, me Kunwu Nzambi ilaka bebe.» 16Bangu batse mesadzi mesadzi, ye bangu bekobise Maliya ne Zozefi ne nwana we teketeke, bayala se batsi ye bibodzi bidza. 17Ye bangu beyene wangu, bangu batanda ne batu besi me tuma we Nzambi etanda bangu se nwana. 18Batu besi bakima, ne me bebati be bibodzi betanda. 19Ni Maliya edze ne bata manvu mesi se unlima, ne utsimene uyitsi. 20Ye bebati be bibodzi bevutse kwele ye bangu bibata dzinvu dze bibodzi bye bangu, ye bangu betse ne yakwe minvu ne kumise Nzambi, utsina ne me bangu beyene, ne me bangu beyuka: «Ni mesi mesuta si nda tuma we Nzambi etanda besu.»
Baluka nwana kunvu
21Vusa ve unwambi ve dzanga, ye bangu bekwise nwana sakwe, baluka nwana kunvu ye Zezu. Kunvu ye tuma we Nzambi eluka nwana, Maliya asande ne bapa dzimi.
22Ndili ye Zozefi bane Maliya bipika itsinda dze maliya ipula ndaku ye vali nda bitsila bye Moyisi eluma bangu pika ya dzanga, ye Maliya bane Zozefi bebapa nwana Zeluzaleme, ne utse laka ne kunwu. 23Ni batende se bitsila bye Kunwu ati: «Nwana we wika tadze ibaka, badzika wangu kwele ne dzandza dze Kunwu.» 24Ye bivele kaba ne mekunda mole, tiya wata vavu bana be bembinga bole, ne upika nda bitsila bye kunwu eluma bangu pika.
25Se Zeluzaleme, yedze ne mutu we kunvu Simeyon, wangu edze ni mutu we unve wedze ne kuna Nzambi, wangu edze ne buka wiya lungise Izayeli, Fudzu ye Umpene yedze nedzi. 26Fudzu ye Umpene, ye tanda nedzi ati: «Wende waa, ti wende yene Klisti we Nzambi iluma.» 27Ye Fudzu ye Umpene ye luma Simeyon se ndaku ye Nzambi, ndili mene mbotu yali ye Zezu ya bapa wangu, ne utse pika bitsila bye Kunwu, nda beluma bangu pika. 28Simeyon aboko nwana se meboko medzi akaba Nzambi live ati:
29«Kunwu, yayu we tuka dzika undzandzi wowe awaa se itavu nda we tanda.
30Misa mami mayene unlungisi wowe meluma.
31Unlungisi wowe eyebise busu ve mekaka mesi.
32Wangu atse dze ni ibanvu dzitse yibise we se melongo mesi, wangu ni witse kaba batu bowe be Izayeli likuma.»
Simeyon atanda misisili mive
33Tata ne mama we Zezu, bakima ne me Simeyon edze ne tanda se nwana. 34Simeyon abondo ne bangu ati: «Nzambi abata beyi.» Wangu ne Maliya mama we Zezu ati: «Utsina ne nwana wowe batu be Izayeli beyitsi betse nawen, boko betse telime, wangu atse dze ni ndinvu mbotu ye Nzambi, ni batu betse lewe wangu, 35ye bitse yiba metsimini me se milima mye batu beyitsi. We mama wedzi, unlima nwowe nwetse yene ubi, nda we beme tsuba pusezunlu.»
Ana avutise Nzambi live
36Yedze ne nwatu we kunvu Ana, nwana we Fanuyele we ikaka dze Azeli, wangu ni Mutu we Nzambi, wangu edze adzuna. Ana etse ibala ni asaka ngondo, bane unlumi wedzi badze bisiwu untsami. 37Yedzi evuka unkwili, wangu edze ne bisiwu meku nwambi ne bisiwu binayi, Ana nde teme ndaku ye Nzambi, adzandza ne musa ne pindzi, ne ukuta utsili ve nzala ne ubondo. 38Ndili mene mbotu, ne Ana akalwe ndaku ye Nzambi, yedzi evutise Nzambi live, Ana avele wowe manvu me se nwana ne batu bedze ne buka wangu ati: «Nzambi alungise Zeluzaleme.»
Zezu anene Nazalete
39Yali ye Zezu yemana pika bitsila byesi bye Kunwu eluma bangu pika, ye bangu bevutse ngundu ye Nazaleti se Galile kwele ye bangu bidze. 40Ye nwana elugwene ne singa yesi, wangu edze ne ukani, ne polo ye Nzambi yedze nedzi.
Zezu adzi ne bisiwu iku ne byole
41Yali ye Zezu yedze netse bisiwu byesi Zeluzaleme, ne utse pika itsinda dze bangu bepula se uyika. 42Ye Zezu ebomo bisiwu iku ne byole, ye yali yedzi ye bapa wangu itsinda Zeluzalame nda bangu bedze ne pika ne kala. 43Bemana itsinda, bangu bavutse ye Zezu evuka Zeluzaleme, ni bangu beke yiba. 44Bangu beyiba nati, nwana adzi tima ye batu bedze ne landa kone bangu. Bangu balanda unyindile nwesi, ye bangu befumba nwana tima ye yali ne bembatsi. 45Nda bangu beke yene nwana, bangu bavutse Zeluzaleme ne utse ne fumba wangu. 46Vusa ve unsatu, ye bangu beyene Zezu se ndaku ye Nzambi, untsitsi, tima ye belakisi be iwowe dze Nzambi. Wangu edze ne yuka, ne ukaba bangu midzitsi. 47Besi bedze ne yuka wangu, bakima ne utsengu vedzi edze ne kalule midzitsi. 48Ye yali yedzi ye yene wangu, bangu bakima. Mama wedzi nedzi ati: «A nwana wami, yowe mepika besu vavu niyi? Besu ne tata wowe beme fumba we ne bayi yesi.» 49Ye Zezu ekalule ne yali yedzi ati: «Ye beyi bifumba me niyi? Beyi nde yiba ati uve madze se ndaku ye Tata wami.» 50Ni bangu beke yuka medzi edze ne tanda bangu. 51Ye Zezu evutse bane yali yedzi Nazaleti, Zezu edze ne kuuna yali yedzi. Mama wedzi edze ne bata manvu mamu se unlima nwedzi. 52Zezu anene ne ukani vesi, ne Nzambi, ne batu, bayene wangu uve.
Поточний вибір:
Luk 2: WUM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES