Luk 1
1
Luk alaka sangunvu yedzi
1Kunwu Tofile,
Batu beyitsi bamikise ne utende manvu mesuta tima ye besu. 2Bangu betende ni me besu beyuka ne batu bedze me bandu, beyene manvu mamu ne misa me bangu, ye bangu beyikwe belakisi be iwowe dze Nzambi. 3Nami mayebise sunwunle mesi mesuta, yami meyene uve ne utende we Tofile manvu mamu. 4Yayu nowe we yiba witi bilakisili bye belakise we byedzi ni unbu.
Betse dziya Zanbatisi nivi
5Ndili ye Elodi edze kani we Zude, yedze ne kani we ndaku ye Nzambi we kunvu Zakali, wangu edze ni we yinvu ye Abyas nwadzi wedzi Zabete edze ni we imbisa dze Alon. 6Bangu besi bole bedze ni batu betele busu ve Nzambi, bangu bedze ne ukuna mendondzi mesi ne bitsila byesi bye Kunwu Nzambi. 7Ni bangu bedze nde bana, ne Zabete edze kumba, bangu besi bole bedze badzuna.
8Vusa votu, Zakali edze ne pika sadzi ye Nzambi, yedze ni vusa ve yinvu ye bangu. 9Nda bekani be ndaku ye Nzambi bedze ne upika ne kala, ye betobo Zakali ne unyindzile se liyi ye ndaku ye Nzambi ye umpene, ne utsumba yila ye sulu nda ye paka. 10Ndili ye bedze ne utsumba yila ye sulu nda ye paka, batu besi bedze ituna bedze ne ubondo. 11Palikise, ye tuma we Nzambi eluma elaka Zakali nyulu, untele ne boko ye sangwe ye tsiya ye Nzambi kwele ye bitsumba yila ye sulu nda ye paka. 12Ye Zakali eyene tuma we Nzambi ngazemoyi ya kwata wangu, yedzi eyene bongo. 13Tuma we Nzambi nedzi ati: «Wende yene bongo Zakali, umbondu nwowe Nzambi ayakwe, nwadzi wowe Zabete atse dziya nwana we ibaka, wetse luka wangu kunvu ye Zan. 14Wetse dze ne itsisa dzineni, ne batu beyitsi betse dze ne itsisa, ye bitse dziya nwana wowe. 15Ni wangu atse dze ni mutu we uneni busu ve Kunwu, wangu ndetse noto mekaka me melaku mesi me kanve. Fudzu ye Umpene yetse lundise wangu asake se moyi nwen mama wedzi. 16Wangu atse ye vutise bana be Izayeli beyitsi, kwele ye kunwu Nzambi we bangu. 17Wangu atse ya nda Mutu we Nzambi, ne fudzu ne singa ye Eli, ne uvutise milima mye betata kwele ye bana. Wangu atse yikule milima mye batu bende kuna Nzambi, yayu bangu betsimene tele nda bekani. Wangu atse lakise batu bitse pika sadzi ye Kunwu.» 18Zakali asunwunle ne tuma we Nzambi ati: «Metse yiba nivi? Meni dzunu, ne nwadzi wami dzunu.» 19Tuma we Nzambi akalule nedzi ati: «Meni Gablyeli undzandzi we Nzambi, wangu ni we meluma me, ne uya tanda we unisisili unve. 20Ni nda we mesuna me, wakitse dze ni tsina. Wakitse wowe si vusa ve manvu mami metanda we mitse ya. Ee mami metanda mamu metse ya ni ndili ye Nzambi etanda.» 21Ndili mene yayu, batu bedze ne ubuka Zakali ituna bakima, ne Zakali eyunwen se ndaku ye Nzambi. 22Yedzi epula wangu eke tuka vele wowe ne bangu, ye bangu beyiba ati, Nzambi alaka Zakali yila se ndaku yedzi. Wangu edze ne uwowe ne bangu yani ne milenvu ayikwe tsina. 23Zakali amana dzandza yedzi evutse sombo yedzi. 24Yumana vavu nwadzi wedzi Zabete abapa dzimi, Zabete asodze nyulu besundzi betanyi nde pula. Yedzi etanda ati: 25«Yene me kunwu mepika me, medze ne sonyi busu ve batu bami, ni velolo Nzambi ayene me tsesi wangu ananguse me sonyi.»
Tuma we Nzambi aya tanda nda bitse dziya Zezu
26Zabete adzi ne dzimi dze besundzi untuba, ye Nzambi eluma tuma wedzi we kunvu Gablyeli, se ngundu ye Galile ye kunvu Nazaleti. 27Kwele ye nwana we nwantu we kunvu Maliya witse yikwe nwadzi we Zozefi. Zozefi edze ni we imbisa dze Davidi. 28Tuma we Nzambi anyindzile se ndaku ye Maliya anyusile wangu ati: «Wedzi ne polo ye Kunwu Nzambi adzi nowe.» 29Maliya ayene nganzemoyi, yedzi eyuka me tuma we Nzambi etanda wangu. Ye Maliya etanda ati: «Yedzi inyusile me tu niyi?» 30Tuma we Nzambi ne Maliya ati: «Wende yene bongo, wedzi ne polo busu ve Nzambi. 31Metanda we, wetse bapa dzimi, wetse dziya nwana we ibaka, wetse luka wangu kunvu ye Zezu. 32Wangu atse dze ni uneni, betse banga wangu ni nwana we Nzambi we ikulu amene, kunwu Nzambi atse kaba wangu ukani ve koko wedzi Davidi. 33Wangu atse kuma unbu ne unbu se ikaka dze batu be Izayeli likuma ledzi ndetse siya.» 34Maliya ne tuma we Nzambi ati: «Meni untsuba, ni metse bapa dzimi nivi?» 35Tuma we Nzambi nedzi ati: «Fudzu ye Umpene yetse ya kule yowe ne singa ye Nzambi we ikulu amene, yetse vungule we nda sisiwun, yayu nwana wowitse dziya atse dze ni umpene, betse banga wangu ni nwana we Nzambi. 36Metanda we, ne Zabete we yali yowe adzi ne dzimi dze nwana we ibaka se udzunu, we batu besi bedze ne banga kumba, adzi ne dzimi dze besundzi untuba. 37Ni nde ye Nzambi iwata pika.» 38Maliya ati: «Meni undzandzi we Kunwu, Nzambi apika me nda mowe metanda.» Ye tuma we Nzambi evutse.
Maliya atse yene Zabete
39Bemana vavu, Maliya atse mesadzi mesadzi se bikudzi bye ngundu yotu ye Zuda. 40Maliya anyindzile se ndaku ye Zakali anyusile Zabete. 41Ye Zabete eyuka nda Maliya enyusile wangu, nwana anyingene se moyi, ye Fudzu ye Umpene ye lundise wangu. 42Zabete awowe yangayanga ati: «Nzambi akaba we meve tima ye batu besi, akaba ne nwana wedzi se moyi nwowe. 43Me niza, we mama we kunwu wami iye yene. 44Yowe menyusile me, nwana anyingene ne itsisa dzesi se moyi nwami. 45Wedzi ne itsisa, nowe idzi ne ivukidze ne Kunwu, ne medzi metanda we metse ya.»
Linvu le Maliya
46Maliya ati:
«Mekumise Nzambi ne unlima nwami nwesi.
47Unlima nwami nwedzi se itsisa, utsina ne Nzambi unlungisi wami.
48Wangu ayivile me undzandzi wedzi, wende yulu.
Ee mendili mesi batu betse tanda me, wedzi se itsisa.
49Ni Nzambi we singa apika me manvu meneni,
wangu ni Nzambi we umpene.
50Wangu adzi ne tsesi ye batu bikuna wangu mendili mesi.
51Wangu apika ne singa yiyitsi,
batu bedze ne udzoko ati, bangu batakwe boko,
wangu apanza bangu.
52Wangu ananguse bekani se bibuma bye ukunwu,
Wangu atumbidze be unkuna ikulu.
53Wangu akaba bende untanvu, untanvu,
wangu avutise bedze ne untanvu meboko sanzile.
54Wangu aya yamene batu be Izayeli bedzandzi bedzi,
wangu eke dzimbise ne ulaka meve medzi.
55Yedze si nda wangu edzika ndaka
ne bekoko be besu bekala, Ablaame
ne be imbisa dzedzi unbu ne unbu.»
56Maliya adze bane Zabete besundzi besatu,
yedzi evutse sombo yedzi.
Nda bedziya Zanbatisi
57Ndili ye Zabete ye udziya ya kalwe, wangu adziya nwana we ibaka. 58Batu bidzi konedzi ne yali yedzi, beyuka ati, Kunwu apika wangu manvu meve, ye bangu besi betsisa. 59Bemana dziya nwana, vusa ve unwambi bangu baya kwise nwana sakwe. Bangu bafumba luka nwana kunvu ye tata wedzi Zakali. 60Mama ati: «Nyen, kunvu ye nwana ni Zan.» 61Bangu nedzi ati: «Nde mutu widzi ne kunvu yayu se yali yowe.» 62Ye bangu bewesile tata ne usunwunle ati: «Kunvu yowe iluka nwana ni iza.» 63Zakali adzuka liyi ye ibaya atende kunvu ye nwana ati: «Kunvu ye nwana ni Zan.» Bangu besi bakima. 64Ndili mene mbotu, Zakali wedze tsina awowe, yedzi ekumise Nzambi. 65Batu bedze tima yayu bayene bongo, ne batu bedze se ilongo dze Zude dze bikudzi, bedze ne uwowe ne manvu mamu mesi. 66Besi bedze ne uyuka manvu mamu babata se milima mye bangu, ye bangu betse ne uwowe ati: «Ayu nwana atse dze nivi?» Singa ye Nzambi yedzi nedzi unbu amene.
Linvu le Zakali
67Fudzu ye Umpene ya lundise Zakali tata we nwana.
Yedzi ewowe nda Mutu we Nzambi ati:
68«Yakayi bekumise Kunwu Nzambi, we batu be Izayeli.
Nedzi iya yamene batu bedzi, ne lungise bangu.
69Wangu akaba besu unlungisi we singa, we imbisa dze Davidi undzandzi wedzi.
70Yedzi ni medzi etanda ne kala ne Batu be Nzambi bemipene.» 71Wangu etanda ati:
«Wangu atse lungise besu se meboko me batu biwunda besu, ne bende tondo besu.
72Wangu edze uve ne bekoko be bebe, velolo avele yivile umbatsi ve ndinvu ve umpene, ve bangu bekuta.»
73Yedze ni ndaka ye Nzambi edzika ne koko we besu Ablaame.
74Wangu ekuta ndaka nedzi ati: «Metse pinule bana bowe se meboko me batu biluna bangu,
yayu bangu betse tuka bondo me nde yene bongo.
75Bangu betse tuka dze umpene, ne tele
busu vami masi mesi me libiku le bangu.»
76Zakali avele tanda ati:
«We nwana wami betse banga we ni Mutu we
Nzambi we ikulu amene. Wetse landa busu
ve Kunwu ne uyebise wangu peyi.
77Yene mowe itse tanda ne batu bedzi,
Nzambi alungise beyi, aboloko beyi manvu mebi.
78Ee Nzambi we besu adzi ni kate uve amene.
Wangu aluma besu ukwalala viyinga ikulu nda musa nwibala ne suka.
79Nwangu nwetse ya nanguse batu bidzi se pindzi ne udzika bangu kwalala
ne bidzi ne bongo ve liku. Yayu nwangu nwen bapa bebe se peyi ye itavu.»
80Nwana anene ne sayi ne sayi ayikwe butu, wangu adze ni se ikanye, ndzii ne vusa vedzi ebanda tanda misisili mye Nzambi ne batu be Izayeli.
Поточний вибір:
Luk 1: WUM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES