Génesis 38
38
Judá yafi Tamar
1Nantian Judá ahuun yorafo anoashu mai futsa ari cani. Nanno nocofunu ahuun anu Hira pushu muran iyoni. Nan Hira icano pushu rasi ahuun anu Adulam. 2Arishon Cananeo ahuun anu Súa ahuun facu Judá fu fiananni. 3Chipo ahuinin facu nanuni. Caiano anuni Er. 4Ascashon afanan futsari nanuni. Caiano futsari anuni ahuun anu Onán. 5Ascashon afanan futsari nanuni. Quezib mai anoashu caini. Nanrifi anuni Sela. Furonanfacufosi.
6Judá ahuun facu Er pushcoano ahuin fishoni. Ahuun anu Tamar. 7Ascafia nocon Ifon Diosin oinni Er chaca huafafainaiton oinpaiquima Diosin namani.
8—Min ochi ahuin sharahuashu a fu fiananhuun. Ascan min ochihuunshon aqui facu oni huahuun. Min asca huaino ochin ahuun funafo caitiroran, —ishon apa Judá yoini.
9Ascafia Onán tapini a futan facu oni huaiton ascano iyoa oni huashoin shinantsancoin ani. Ascacun a fu ifiano ocon nanushotama chipacumupaoni. Ascacun ahuunshon ahuun ochi funafo cai huapaonima. 10Diosin oian sharamacun fuchipainima. Ascacun Onánri namani. 11Ascatan Judá ahuun facahuan yoini,
—Min funuoma iyotiro uhuun facu yosiyoaitian mi fu fiananshquin. Natian min upa pushuano min cayotiroran, —ishon Judá Tamar yoini.
Ascashon ahuun nomuran shinanni, —Uncai uhuun facu Sela fimapaima arifi amaqui natiroran —ishon shinanni. Ascano Tamar apa pushu ano cani.
12Fari ranan finontan Judá ahuin nani. Ahuin manoquin unutan mai futsa ari cani. Nan pushu rasi ahuun anu Timnat. Nannoshon nocofunufoan aton chashoanfo aton rani shatushon sahuuti huanifo. A fu rafua Hira a fu cani. Nan Hira Adulamitafo aton caifo ini. 13Ascano Tamar tapini ahuun fafahuanun pushu rasi Timnat ano caa ahuun chashoanfoan rani shatushon 14Nan funuomaton sahuumisi cuscaran pucashon futsa sahuumani. Maracomucain fufopomuni tsoan onanonma. Asca huatan Enaim pushu rasi ahuun caincaiti ano tsaoni. Nan caincaiti fai cai Timnat ari nocotiro ini. Judá yoini cuscan ayamaiton Tamar asca huani. Judá yoini ahuun facu Sela yosiaitian a fu fianantiro. Ascafiacai yosishon finima.
15Judá finonfainquin oinni fufopomui futsua. Ascaiton shinanni, —Na ainfo furomacoinran, —ishon. Fufopomucuncai onannima fafahuanfiacun. 16Ascano fafahuanfiacun fai cusumunri aqui cani yocaicain,
—¿Un mi fu itiromun? —ishon yocaiton.
—Ai. ¿U fu oshashon mian ahua inantiromun? —huani.
17—Uhuun chashoan futsan un mia inantiroran, —ishon yoiaiton.
—Shara. Minmain icoincai ua ahuara inanyoquin tauhuahuun, —huani. 18—¿Ahuamun min fipaicain un mia inanyonon? —huaiton.
—Min sello yafi ahuun rusfi non min poquitiri mian inanyotiroran, —ishon yoiaiton.
Nansca huano afu yamu oshani. Asca huaquin facu nanumani. 19Asca huafaini Judá caino Tamar ahuun fufopomua pucani funuomaton ahuun sahuuti afanan sahuuni.
20Chipo Judá chashoan cahua shara a fu rafua Adulamita Tamar foshoni ahuun sello yafi rusfi non poquiti inanyoa cuscan nasonon. Judá a fu rafuatocaiyainfo fuchinima. 21Ascano nan Adulamita nanno icafo yocani isca huaquin, —¿Ranimun a ainfo furomacoin Enaim ano icaquin. Nanno fai cusumun tsaomisi? —ishon yocaiton.
—Nunocai tsoa furomacoinmafinquin, —huanifo.
22Ascano Judá icano nasoni. Ascashon yoini,
—Uncai nan ainfo furomacoin un fuchiama. Nanno icafoan ua yoiafo, “Nunocaiyainfo furoma yamairan,” ishon ua yoiaforan, —huaiton.
23—Ascacun uhuun ahuarafoya nitunonhuun. Non funairiaino nocoqui cashupaitirofoquin. Man non chashoan cahua shara fomafiacai non fuchiama. Noncai afanan ahuusca huatiromaran, —ishon yoini.
24Ascano oshu rafunon fusti finoanno futsan Judáqui chanini,
—Min fafahuan Tamar natian man facu nanua. Furomacoinshon facu nanuriscaran, —ishon yoiaifoan.
—Achitan coacufoancahuun, —ishon Judá oi ashcafinin yoini.
25Achiaifoanno —Uhuun fafahuan tsain fomacufoancahuun. Nan sello non rusfi non poquiti ato ifo nan ua facu nanumana. ¿Nafo minamun? —ishon yoitacahuun. 26Judá man tapia ini nanfo ahuunacoincun. Ascashon yoini isca huaquin, —Aacai ua cuscarama. Aafin shara finacoianquin. Mun yoiyoni uhuun facu Sela yosiaitian a fu fiananfiatiro yosifiacucain un inannimaran, —ishon yoini. —Afanancai un a fu fistanainmaran, —ishon yoini.
27Tamar facu cainyaitian rafanacani. 28Nan cain tauai ahuun mucu cain taucurani. Ascashon yomun oshininpanton munushuni. Ascashon yoini, —Naafin cain tau aquin, —ainfoan Tamar fu ica yoini. 29Caiantaima musufimupacucahuani. Ascatanaino futsan cain tauni. —Min cainriscaran, —ishon na ainfo yoini. Ascacun anuni Fares. 30Ascatapaiyaino futsari cainni. Naan yomun oshininpanton munushumua. Ascacun anuni Zera.
Kasalukuyang Napili:
Génesis 38: mcd
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2008, Wycliffe Bible Translators, Inc. All rights reserved.