Génesis 37
37
Joséhuunoa cununi cuscan
1Jacob ahuun apa Canaán mai ano iyopaoni arifi nanno iyopaoni. 2Jacob ahuun yorafohuunoa natian cunui.
José yafi ahuun ochifo non ahuun ushtohuunoa
José ahuun fari diecisiete fariashon ahuun ochifo futan apan chashoanfo cushunifo. Ahuun ochifo ato uhua rafu Bilha yafi Zilpa. Aton apa ahuin rafu ini. Ahuun ochifo chaca hua cuscan José apaqui chanini.
3Ascan Israel ahuun anu futsa Jacob ahuun facu Joséhuun fasi noicoinni atirifohuuncai noicoinnima. Israel anifoaino ahuun facu José cainni. Ascacun ahuun fasi noicoinni. Israel ahuun facu José tari fasi sharashtacoin inanni. 4Asca huaiton oincani ahuun ochifo fasi aqui sinacoinnifo tsoancai oinpainima nan fustihuun apan noiaiton.
5Ascano nan nama cuscan ahuun ochi iyoafofo yafi chipocun fusti tapimani finacaiquin noicasmaifoan.
6Ato yoini isca huaquin, —Ua nicacahuun ua namapan yoia cuscan un mato yoinon. 7Non nantifi mau muran yonoi arroz cuscaran tashtui. Uhuunna fusti cayacafi niano matona fonhuinfafainaran, —ishon José ato yoini.
8Nannori ato yoiaiton nicacaquin iyoa rananun cumanifo,
—¿Minmun nocon niaifo iishquicai noco yonoshquin? —ishon yoinifo.
Fasicoin noicasmacoinnifo ahuun namapan ato yoiai cuscan nicacani.
9Ascashon afanan José nama futsashon ahuun ochi iyoafofo yafi chipocun tapimani isca huaquin,
—Ua nicacahuun un nama futsa un mato yoinon. Un fari non oshu non once fishifo un oian. Ua focushonaifoan, —ato huani.
10José apa yafi ahuun ochi iyoafofo yafi chipocun anori yoiaiton apa Jacob yoini,
—Upan, ascayamahuu. ¿Na namapan min oian cuscan raquiri mia yoiamun? ¿Iconmainquin un non min uhua non min ochifo non ushto non afoan non mia focushoniran? —ishon yoini.
11Ahuun ochi iyoafofo fasi aqui sinanifo ato niaifo ishquiai nicacanashu. Ascafiaino apan fasi shinanpaini.
Ahuun ochifoan José inanmitsanifo
12Ascano shafa futsa José ahuun ochifo Siquem chaimashta fonifo aton apan chashoanfo fasi funununshon ato pimai focani. 13Ascashon Israel José yoini isca huaquin,
—Upashtan, man min tapia min ochifo Siquem chaimashta nocon chashoanfo fasi funununshon ato pimai. Natian un mia ato ano nichin, —huaiton.
—Un catiroran, —ishon José apa cumani.
14—Shara. Casharatahuun min ochifo non chashoanfo ahuu cuscarafomainquin. Nasocura ua yoishquin, —apan huani.
Ascano apa José machihuan tunanman ahuun anu Hebrón anoshon nichini. Siquem ano nocoshon ato funafoanfafainni. 15Funafoanfafainnaino nocofunu aqui noconi,
—¿Tsoa min funafoanfafainnimun? —huaiton
16José cumani, —Uhuun ochifo un funafoanfafainni. ¿Mian yoitiromun raqui foafomun chashoanfo cushuaforaca? —huaiton.
17—Man nunoashu foafo. Mun nica, “Dotán ari non canon,” ishon yoiaifoan, —huaiton.
Nicatan ari cani ahuun ochifoqui nocoicai. Ascano atoqui Dotán ano noconi. 18Caiton chaicunoa iyoa rananun fuchinifo. —Non rutunon oiquin, —icashu yoinannifo.
19—Nan namamisifin man nocoqui oiquin. 20Nocotanaiton rututan non pozonoa muran potanon. Ascashon non yoinon masharonun man piaran non huanon. Non tapinon ahuun namapan ahuuscaimancai, —icashu yoinannifo.
21Ascaifoan nicain iyoa futsan ahuun anu Rubén ahuun ramapaiquin chipocun numapaini. Ascashon iyoa ranan yoini,
—Noncai ushto rutuima. 22Nocon imifinquin. Pozo muran potafiaquin ahuusca huayamacahuun, —ato huani.
Ascano chipo nushfinshon chipocun apa ari iyopaini. 23-24Ascashon nocotanaiton iyoa rananun achinifo ahuun tari sharashta shoricashon quishtu fustia pozo muran potanifo. Nan pozo muran unu yamai ini. 25Asca huatan tsaoshon pinifo.
Nan piyanan oianfo Ismaelitafo camello camaqui tsaoashu funifo. Ininti fufain inin futsa cuscara ahuun anu bálsamo fufain ininti futsa ahuun anu mirra Egipto ari inanmitsai fonifo. 26Ascaiton Judápan a fu nanuafo yoini,
—¿Ushto rutuashu non ahuuscaimun? ¿Ushto rutufain fomanshon non ahua fimun? 27Non rutuimacai non Ismaelitafo inanoncahuun non ahuun rafanan pui finon. Aafin nocon yoraquin noncai rutuimaran, —ishon yoini.
Iyoa rananunri yoinifo nanscarafin sharaquin inifo. 28Mafo inanmitsamisifo ohuaiton pozo murannoa nushficashon inanmitsanifo. Veinte toro pui ahuun rafanan finifo. Ascano Egipto ari José iyonifo.
29Man iyoafoanno iyoa Rubén chipo nocotan pozo ano funani. Funafiaquicai fuchinima. Ascatan fasi uaiyanan ahuun camisa fashnuqui futsani. Oinmashquin a chipocun fasi noicoin ai. 30Nasocuran iyoa ranan yoini,
—Anocai ushtomafinquin ¿Unmun ahuuscaicain? —ishon ato yoini.
31Ascashon iyoa rananun José ahuun tari mania fishon chashoanun facu rutushon ahuun imin raishaquin futsashon. 32Apa foshonifo. —¿Nan naamun ushton ahuun tari? —ishon apa yocanifo. Parancaquin.
33Nansca huaifoan apan furunfo yoini, —Naafinquin uhuun facu ahuun tari. Man fashnui futsua man masharonun piaran, —ishon yoini. 34Ascatan ahuun camisa shara fashnuqui futsatan chocashta sahuuni. Ascashu uaiqui unupaonima. 35Nantifi ahuun facufoan yoisharapaifiaifoanno ahuuncai fasi uaiqui finacoini. —Uncai uhuun facu manoquin unuima. Naan un naitian, —ishon Jacob ahuun facufo yoini.
36Egipto anoshon Madianitafoan Potifar José inanni. Nan Potifar ranushumuafoan ahuun niaifocoin ini. Egipcio ato niaifo uhuapacoin anunifo Faraón. Potifar ranushumuafo aton niaifo. Ahuun niaifo Faraón cushumisi.
Kasalukuyang Napili:
Génesis 37: mcd
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2008, Wycliffe Bible Translators, Inc. All rights reserved.