Римӧ 9
9
Израиль да Енлӧн бӧрйӧмаяс
1Кристос водзын висьтала збыльсӧ, ог пӧръясь – менам сьӧлӧмӧй Вежа Ловкӧд ӧтвылысь вынсьӧдӧны менсьым висьталӧмӧс. 2Менам сьӧлӧмӧй ёна шогсьӧ да дугдывтӧг бӧрдӧ. 3Аслам вокъяс вӧсна ме весиг дась лоны ёрӧмаӧн, Кристосысь торйӧдӧмаӧн. 4Израиль войтырӧс ӧд шуӧма Ен пиянӧн, восьтӧма налы Ен дзирдлунсӧ, кӧрталӧма накӧд йитӧдъяс, сетӧма налы Индӧд, сувтӧдӧма найӧс кесъявны Енлы, налы уна кӧсйысьӧма, 5и налӧн эмӧсь батьяс. Тайӧ войтырысь петіс Кристос, Сійӧ чужис морт кодьӧн. Сійӧ став вылас медыджыд Ен. Ошкӧм Сылы нэмъяс чӧж! Аминь.
6Енмыслӧн кывйыс эз вожав. Ӧд абу став израильсаыс Израильлӧн, 7Ӧвраамсянь чужысьяс абу ставныс Ӧвраамлӧн ныв-пи. Вӧлі шуӧма: «Исааксянь чужысьясӧс шуасны тэнад ныв-пиӧн». 8Сідзкӧ, Енлӧн ныв-пиыс абу мортсянь, но Ен кӧсйысьӧмсянь чужысьяс. 9А кӧсйысьӧмыс вӧлі татшӧм: «Дзик тайӧ кадас во мысти Ме бара вола тэ ордӧ. Сэки Сарраыдлӧн лоас пи». 10Тадзи вӧлі тшӧтш Ревеккакӧд. Сійӧ сьӧктіс Исаак батьнымсянь кык пиӧн. 11-12Пияныслӧн чужтӧдз на, бурсӧ-лёксӧ налӧн вӧчтӧдз на, Енмыс шуис Ревеккалы: «Ыджыдджыкыс кутас кесъявны ичӧтджыкыслы». Енмыс тайӧн петкӧдліс, мый бӧрйӧмыс Сы сайын. Сійӧ бӧрйӧ оз мортлӧн уджъяс серти, но Аслас лӧсьӧдӧм да корӧм сертиыс. 13Гижӧма: «Яков вӧлі Меным муса, а Исавӧс Ме мустӧмті».
14Мый шуам? Енмыс абу веськыд? Сійӧ веськыд. 15Мӧисейлы Енмыс шуис: «Код дінӧ кӧсъя бурсьӧлӧмтчыны, бурсьӧлӧмтча. Код дінӧ кӧсъя буравны, бурала». 16Тадзи ставыс Енлӧн буралӧм сайын, абу мортлӧн кӧсйӧм-зільӧм сайын. 17Гижӧдас шуӧма фараонлы: «Ме пукті тэнӧ, мед петкӧдлыны тэ вылын Ассьым вынӧс, медым Менсьым нимӧс тӧдісны став му пасьталаыс». 18Тадзи Енмыс код дінӧ кӧ бур сьӧлӧма, а кодӧскӧ Сійӧ чорзьӧдӧ.
Буралӧмыслӧн дозъяс да скӧрлуныслӧн дозъяс
19Гашкӧ, тэ юалан: «Мыйысь нӧ Енмыс, сідзкӧ, мыжалӧ? Вермас-ӧ кодкӧ паныд сувтны Енмыслӧн кӧсйӧмлы?» 20Мортӧй, коді тэ сэтшӧмыс, мый Енкӧд вензян? Вӧчӧмторйыс ӧмӧй вермас шуны вӧчысьыслы: «Мыйла тэ менӧ татшӧмнас вӧчин?» 21Гырнич вӧчысь абу ӧмӧй вына сёй вылас? Оз-ӧ сійӧ ӧти лятисьыс вермы вӧчны быд лунӧ вӧдитчан и торъя лунъясӧ вӧдитчан доз? 22Тадзи Енмыс кӧсйӧ петкӧдлыны Ассьыс скӧрлунсӧ да вынсӧ. Ыджыд терпитӧмыс вӧсна Сійӧ видзӧ на бырӧдны шуӧм ”скӧрлуныслысь дозъяссӧ”, 23медым петкӧдлыны Ассьыс помасьлытӧм дзирдлунсӧ ”буралӧмыслӧн дозъяс” вылын, кодъясӧс дасьтӧма дзирдавны. 24”Буралӧмыслӧн дозъясыс” – тайӧ ми, ӧд Ен корис миянӧс. Корис эз сӧмын иудейясӧс, но тшӧтш мукӧд войтыръясӧс. 25Осий небӧгын Сійӧ висьталӧ:
– Кодъяс эз вӧвны Менам войтырӧн,
найӧс шуа Аслам войтырӧн,
мустӧмӧс шуа мусаӧн.
26Кӧні вӧлі шуӧма: «Ті абу Менам войтыр», сэні найӧс шуасны ловъя Енлӧн ныв-пиӧн.
27Израиль йылысь Исай тадзи висьталӧ:
– Израиль войтырлӧн лыдыс кӧ лоӧ
весиг саридздор лыа мында,
мездмас сӧмын колясыс.
28Регыд Господь вӧчас Аслас шуӧмыс серти,
му вылын пӧртас олӧмӧ Ассьыс мыждана шуӧмсӧ.
29Исай водзвыв висьтавліс:
– Господь Саваоф кӧ эз видз коляс войтырсӧ,
ми эськӧ бырим Содом моз,
миянӧс эськӧ суис сійӧ жӧ, мый Гомораӧс.
Израильлӧн эскытӧмлун
30Сідзкӧ, мый артмӧ? Ентӧдтӧмъяс эз корсьлыны веськыдлунсӧ, но босьтісны сійӧс эскӧм пыр. 31Израиль войтыр, мӧдарӧ, Индӧд отсӧгӧн корсис веськыдлунсӧ, но тайӧ эз ло сылы. 32Мыйла? Веськыдлунсӧ найӧ зілисны шедӧдны Индӧд серти уджъяснас, эз эскӧмнас. Тадзи найӧ изйӧ крукасисны. 33Та йылысь гижӧма:
– Сионӧ Ме пукта из,
кытчӧ найӧ крукасясны-усясны.
Но Сылы эскысь оз янав.
Kasalukuyang Napili:
Римӧ 9: КБ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(c) Institute for Bible Translation, Finland, amp Finnish Bible Society, 2023