1 Коринфӧ 16
16
Ерусалимса вежа войтырлы сьӧм чукӧртӧм
1Ӧні сёрнитышта вежа войтырлы сьӧм чукӧртӧм йылысь. Та йылысь ме висьтавлі нин галатса вичкоясын. Сідзкӧ, вӧчӧй менам висьталӧм серти: 2вежонса медводдза лунӧ быдӧн торйӧдӧй сьӧмнытӧ мыйта верманныд да видзӧй сійӧс ас орданыд. Сэки менам локтігкежлӧ тіян лоӧ чукӧртӧма нин. 3Бӧрйӧй ас пӧвстсьыныд некымын мортӧс. Кор воа тіянӧ, сета налы эскӧдан гижӧд да мӧдӧда найӧс Ерусалимӧ, медым нуасны сэтчӧ чукӧртӧм сьӧмнытӧ. 4Ковмас кӧ аслым сэтчӧ муннысӧ, накӧд тшӧтш муна.
Павел мӧдӧдчӧ туйӧ
5Македония кытшовтӧм бӧрын локта тіян дінӧ, ӧд ме бӧрсӧ кӧсъя локны Македония пыр. 6Гашкӧ, мыйтакӧ олышта тіян дінын, гашкӧ, тӧвъя весиг. Сэсся водзӧ менӧ мӧдӧданныд. 7Ме ог кӧсйы аддзӧдчывны тіянкӧд сӧмын пырмунігмоз. Господь кӧ сетас, кӧсъя дырджык олыштны тіян дінын. 8Ефес карӧ ме кольчча Ветымынӧд лунся гажӧдз, 9ӧд Енмыс меным паськыда восьтіс ӧдзӧсъяс уджавны. Дерт, и паныд сувтысьыс уна.
10Локтас кӧ тіян дінӧ Тимофей, тӧждысьӧй сы вӧсна, медым сылы нинӧмысь эз ковмы майшасьны, ӧд сійӧ ме моз кесъялӧ Господьлы. 11Энӧ увтыртӧй сійӧс! Отсалӧй сылы лӧнь сьӧлӧмӧн бӧр локны ме дінӧ. Тані мукӧд вокъяскӧд ме виччыся сійӧс.
12Ме ёна кори Аполос вокӧс, медым вокъяскӧд тшӧтш муніс тіян дінӧ, но ӧні оз на кӧсйы. Вермыны кутас да, локтас.
Павеллӧн туйдӧдӧм
13Лоӧй дасьӧсь да зумыда эскӧй! Лоӧй вынаӧсь да повтӧмӧсь! 14Ставсӧ вӧчӧй мусапырысь!
15Вокъяс, ті тӧданныд, мый Степан да сылӧн гортсаыс лоины Акайяын медводдза эскысьясӧн. Найӧ сетісны асьнысӧ кесъявны вежа войтырлы. Кора тіянӧс: 16кывзысьӧй налысь, тшӧтш накӧд ӧтвыв уджалысьяслысь да кесъялысьяслысь. 17Меным нимкодь, мый Степан, Фортунат да Акаик воисны татчӧ, ӧні найӧ тіян пыдди. 18Найӧ кыпӧдісны менсьым лолӧс, тшӧтш тіянлысь. Вылӧ пуктӧй татшӧм йӧзсӧ!
Чолӧмъяс
19Тіянлы ыстӧны чолӧм асияса вичкояс. Господь нимӧн сьӧлӧмсяньныс чолӧмалӧны тіянӧс Акил, Прискилла да на ордӧ чукӧртчысьяс. 20Тіянлы ыстӧны чолӧм став вокъяс. Чолӧмалӧй ӧта-мӧднытӧ вежа окыштӧмӧн!
21Ме, Павел, аслам киӧн гижа тіянлы чолӧмӧс. 22Коді оз радейт Господь Исус Кристосӧс, сійӧс лоӧ ёрӧма. Маран-афа#16:22 Маран-афа – арамей кывъяслӧн вежӧртасыс ”Господьным локтас”.. 23Миян Господь Исус Кристослӧн буралӧмыс тіянкӧд. 24Менам муслунӧй ставныдкӧд, кодъяс Исус Кристос пытшкынӧсь. Аминь.
Kasalukuyang Napili:
1 Коринфӧ 16: КБ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(c) Institute for Bible Translation, Finland, amp Finnish Bible Society, 2023