1 Коринфӧ 14
14
Пророкалӧм да мукӧд кывъяс вылын сёрнитӧм
1Зільӧй кутчысьны муслунас, тӧждысьӧй босьтны Ловсянь сетӧмторъяс, торйӧн нин, медым верминныд пророкавны. 2Коді сёрнитӧ мукӧд кывъяс вылын, сійӧ сёрнитӧ Енмыскӧд, а оз йӧзкӧд. Сійӧс некод оз гӧгӧрво, ӧд сійӧ висьталӧ гусяторъяссӧ Лов вынӧн. 3А пророкалысь висьталӧ йӧзыслы. Сійӧ ёнмӧдӧ, ышӧдӧ да бурӧдӧ найӧс. 4Мукӧд кывъяс вылын сёрнитысь ёнмӧдӧ сӧмын асьсӧ, а пророкалысь ёнмӧдӧ вичкосӧ. 5Ме кӧсъя, медым ті быдӧн сёрнитінныд мукӧд кывъяс вылын. Но вӧлі эськӧ бурджык, ті кӧ пророкалінныд, ӧд пророкалысь ыджыдджык мукӧд кывъяс вылын сёрнитысь дорысь. Но мукӧд кывъяс вылын сёрнитысь кӧ вермӧ гӧгӧрвоӧдны ассьыс висьталӧмсӧ, и тайӧ ёнмӧдӧ вичкосӧ, сэки сійӧ оз ло ичӧтджык пророкалысь дорысь.
6Вокъяс, ме кӧ локта тіян дінӧ да кута сёрнитны мукӧд кывъяс вылын, но ог вай тіянлы Енсянь восьтӧм да тӧдӧмлун, ог пророкав да ог велӧд тіянӧс – тайӧ нинӧм оз сет тіянлы. 7Шуам, босьтны кӧ ворсанторъяс, пӧлян либӧ арфа, и ворсіганыс найӧ ӧткодь шы сетӧны, сэки ми огӧ тӧдӧй, мыйӧн ворсӧны. 8А труба кӧ сетӧ гӧгӧрвотӧм шы, коді дасьтысяс тышӧ петны? 9Тадзи артмӧ тшӧтш тіянкӧд: ті кӧ кутанныд сёрнитны гӧгӧрвотӧм кывйӧн, сэки коді гӧгӧрвоас тіянӧс? Тіян сёрниныд лоӧ весьшӧрӧ. 10Му вылас сёрнитӧны унапӧлӧс кывйӧн, но быд кыв позьӧ гӧгӧрвоны. 11А ме кӧ ог гӧгӧрво сёрнитысьлысь висьталӧмсӧ, сэки ме сылы бокыса морт кодь, сійӧ меным тшӧтш.
12Ті ёна кӧсъянныд босьтны Ловсянь сетӧмторъяс, сідзкӧ, тӧждысьӧй унджык босьтны сетӧмторсӧ, медым найӧ ёнмӧдісны вичконытӧ. 13Та вӧсна мукӧд кывъяс вылын сёрнитысьлы колӧ кевмысьны, медым сійӧ вермис гӧгӧрвоӧдны ассьыс висьталӧмсӧ. 14Ӧд ме кӧ кевмыся мукӧд кывъяс вылын, сэки кевмысьӧ сӧмын лолӧй, а вежӧрӧй нинӧм оз гӧгӧрво. 15Сідзкӧ, мый меным вӧчны? Кута кевмысьны лолӧн, кута кевмысьны тшӧтш вежӧрӧн. Кута сьывны лолӧн, кута сьывны тшӧтш вежӧрӧн. 16Тэ кӧ кутан ошкыны Енсӧ сӧмын ловнад, сэки орччӧн сулалысь морт гӧгӧрвотӧгыс оз вермы шуны ”аминь” тэнад ошкӧм вылӧ. Сійӧ ӧд оз гӧгӧрво тэнсьыд висьталӧмтӧ. 17Гашкӧ, тэ бура ошкан, но мӧд мортлы тайӧ нинӧм оз сет. 18Ошка Енмӧс, ме быдӧн дорысь на ёнджыка сёрнита мукӧд кывъяс вылын. 19Но мукӧдсӧ туйдӧдӧм могысь бурджык лоӧ, шуа кӧ вичкоын вит гӧгӧрвоана кыв уна сюрс гӧгӧрвотӧм кыв дорысь.
20Вокъяс, энӧ мӧвпалӧй челядь моз, мӧвпалӧй верстьӧ моз. Но лёксӧ вӧчны лоӧй кага кодьӧсь. 21Индӧдас гижӧма:
– Кута сёрнитны тайӧ войтырыскӧд мукӧд кывъяс вылын,
локтысь йӧз вомӧн,
но весиг сэки найӧ оз кывзыны Менӧ,
– висьталӧ Господь.
22Сідзкӧ, мукӧд кывъяс вылын сёрнитӧмыс – тайӧ эскытӧмъяслы пас, абу эскысьяслы. А пророкалӧмыс – эскысьяслы пас, абу эскытӧмъяслы. 23Ті кӧ ставныд ӧтвыв чукӧртчанныд вичкоӧ, да быдӧн кутас сёрнитны мукӧд кывъяс вылын, и сэтчӧ пырасны тӧдтӧм йӧз да эскытӧмъяс, сэки найӧ шуасны, ті пӧ йӧйталанныд. 24Но ті кӧ быдӧн пророкаланныд, да пырас тіян дінӧ эскытӧм либӧ тӧдтӧм морт, сэки Енмыс быдӧн пыр янӧдас да мыждас сійӧс, 25сэки сылӧн гуся мӧвпъясыс воссясны. Тайӧ мортыс копыртчас Ен водзӧ да шуас: «Енмыс збыльысь тіянкӧд!»
Вичкоын ставсӧ колӧ вӧчны колана ногӧн
26Вокъяс, мый нӧшта шуны тіянлы? Ӧтлаӧ чукӧртчигӧн быдӧн тіян пиысь вермӧ мыйкӧ вӧчны: кодкӧ сьылӧ, кодкӧ велӧдӧ, кодлӧнкӧ эм Енсянь восьтӧм, кодкӧ сёрнитӧ мукӧд кывъяс вылын, кодкӧ гӧгӧрвоӧдӧ сійӧс. Но ставыс мед лоӧ вичко ёнмӧдӧм могысь. 27Эмӧсь кӧ тіян пӧвстын мукӧд кывъяс вылын сёрнитысьяс, мед сёрнитӧны ӧта-мӧд бӧрсяыс кык либӧ куим морт, а кодкӧ мед гӧгӧрвоӧдӧ налысь сёрнисӧ. 28Абу кӧ гӧгӧрвоӧдысьыс, сідзкӧ, вичкоын мукӧд кывъяс вылын мед оз сёрнитны, а сёрнитӧны ас кежас да Енмыскӧд. 29Пророкъяс пиысь мед тшӧтш висьтавлӧны кыкӧн либӧ куимӧн, а мукӧдыс мед донъялӧны налысь висьталӧмсӧ. 30Пукалысьяс пӧвстысь кӧ кодлыкӧ лоӧ Енсянь восьтӧм, сэки воддза висьталысьыс мед дугдас сёрнитнысӧ. 31Ті быдӧн верманныд пророкавны сьӧрсьӧн-бӧрсьӧн, медым быдӧнӧс мыйӧкӧ велӧдны-ышӧдны. 32Пророкъяс вермӧны веськӧдлыны асланыс пророкалӧмнас, 33ӧд Енмыс абу торкалысь Ен, Сійӧ – лӧньлунсӧ сетысь Ен.
Вежа войтырлӧн вичкоясын тадзи лӧсьӧдӧма: 34вичкоӧ чукӧртчигӧн аньясныд мед чӧла пукалӧны. Налы оз позь сёрнитны, ӧд Индӧдыс велӧдӧ найӧс кывзысьны. 35Найӧ кӧ кӧсйӧны тӧдмавны мыйкӧ, та йылысь мед юалӧны гортаныс асланыс верӧслысь. Аньяслы абу лӧсьыд вичкоын сёрнитны. 36Гашкӧ, чайтанныд, Енлӧн кывйыс тіянсянь петіс? Гашкӧ, сӧмын тіянӧдз воис?
37Коді лыддьӧ асьсӧ пророкӧн либӧ Лов серти олысьӧн, сійӧ мед тӧдӧ, мый тайӧ велӧдӧмыс – Господьлӧн тшӧктӧм. 38Коді оз кӧсйы гӧгӧрвоны тайӧс, мед оз гӧгӧрво. 39Вокъяс, тӧждысьӧй, медым ті верминныд пророкавны, но энӧ ӧлӧдӧй мукӧд кывъяс вылын сёрнитӧмысь. 40Ставсӧ колӧ вӧчны бура да колана ногӧн.
Kasalukuyang Napili:
1 Коринфӧ 14: КБ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(c) Institute for Bible Translation, Finland, amp Finnish Bible Society, 2023