ปะทมมะกาน 2
2
1เจออันก็ปันอังกิออยะ ทังมะลัง ทังกะแตะ กับญิกูเนวนาก็เบินอัอดนึงโลกอะไน พูซางก็ซางมมญิเจอ 2ตัอะมือทีเจ็ด พูซางเลิดละลู อันก็ซางมมญิเจอ เวียะนาก็อันตาะก็มมญิกูอันกูเนวเจอ 3เจอพูซางก็อวยพอนมือทีเจ็ดอะไน ต็างอะดอะออ์นปันมือพิเซด ปันมือนาก็พูซางละลู เวียะงานนาก็อันตาะก็มมญิเจอ
พูซางซางกวยคูแรก
4ตีตีแม็ดอะเลอ บัดเยโฮวาพูซางซางโลกซางมะลังอะไน เรืองคองอันก็ปันอังกิ 5-6แก็ลอะลูองนึงกะแตะก็นังตัอกัอดนังตัอเบินอัมปิน เจอบ็าดบายนาก็อัอดนึงตงนีานึงซวนก็นังตัอดาฮอัมปิน พอะปายกวยทีซีตาะซวนตาะนีาก็นังตัอเบิน เจอเยโฮวาพูซางนังตุนตาะออ์นมีาอัมปิน ฮักเบินดัอะนำบอจะล็ากอะซอฮตีกะแตะ ตาะออ์นกะแตะจุม 7เจอฮาไนเยโฮวาพูซางก็เอดกะแตะมอ์ดตาะปันตอ์กวย ตาะออ์นปันกวยกอ์น เจอพูซางก็ปลงละงึฮนาก็ออ์นกวยเบินซีวิด จอ์ะฮองมุฮคองกวยอะกี กวยกอ์นอะกีเลิดเบินละงึฮเบินมิดเบินซีวิดตับ
8เจอเยโฮวาพูซางก็ตาะซวนอะดอะมูบอน ตาะนึงกะแตะเอเดน อัอดยาฮมะนางลอฮ เยโฮวาออ์นกวยนาก็อันซางอะดอะอะกีออยะ อัอดนึงซวนอะไน 9เจอเยโฮวาพูซางก็ตาะออ์นเบินแก็ลอะลูองซะเอยเนวดาฮอัอดนึงซวนอะกี แก็ลนาก็ปันตาเฮะปันตาจีาเบินกบญิ เจอนึงทะเนซวน เบินมูแก็ลนาก็ค็านกวยจีาไปลอันเจอ ซีเบินซีวิดตะลอด เจอเบินแอนมูแก็ลนาก็อัอดแจะตีกี ค็านจีาไปลตูไนเจอ ซีด็างโลยฮด็างมีน
10เจอนึงกะแตะเอเดนอะไนเบินโตมดัอะ พาทะเนซวน ตาะออ์นซวนอะกีจุม บัดแว็ดซวนอะกีเจอ อันก็แยกอะลอฮปันโปนโตม 11โตมทีนึงละมึฮปาย ปิโซน โตมปิโซนอะไนก็กะตีปัอะรูอบปะเทดฮาวิลา นึงปะเทดฮาวิลาอะกีก็เบินทองคำ 12ทองคำนาก็อัอดตีกีปันทองคำนาก็ก็ากอะเลอ เจอก็เบินเซียดอะลูองนาก็พวมนืยะ เจอก็เบินทังเพ็ดพลอยนาก็ปันละกีาอะเลอ 13โตมทีซองละมึฮปาย กิโฮน โตมกิโฮนอะไนกะตีปัอะรูอบปะเทดคูด 14โตมทีซามละมึฮปาย ไทกริด โตมไทกริดอะไนกะตีปัอะยาฮมะนางลอฮคองปะเทดอัซซีเรีย เจอโตมทีซีละมึฮปาย ยูเพรติด
15เจอฮาไนเยโฮวาพูซางเลิดเอดกวยกอ์นนาก็อันซางอะกี อะดอะนึงซวนเอเดน ออ์นปันพูกรัวพูอะเฮะซวนอะกี 16อะดอะเจอเยโฮวาพูซางก็อะตัองปาย "ไปลอะลูองนึงซวนอะไนไมจีาดายญิ 17ฮักไปลอะลูองตูมูแก็ลอะกี ไมซูจีาเดอ! แก็ลนาก็ด็างโลยฮด็างมีนอะกี ค็านไมจีามือลาะ ไมก็ซีกะเจดมือกี"
18เจอเยโฮวาพูซางเวาปาย "นาก็กวยกอ์นอะไนซีอัอดมะนาะก็ตัอก็ากมะลาะ กึเลิดซีออ์นเบินมูเบินกูนาก็ซีมอะซีละกลับกับอัน"
19เจอเยโฮวาพูซางก็เอดซัดเอดจมกูเนว นาก็นาวซางอะตัอะตีกะแตะอะกี เอดอะปัอะออ์นกวยกอ์นต็างละมึฮออ์น กวยกอ์นอะกีละมึฮปาย อาดัม เจออาดัมต็างละมึฮออ์นจุมซัดอะดอะแบบลาะ อันก็เบินละมึฮแบบกีจนเตาจะนูอ 20เจออาดัมก็ต็างละมึฮออ์นซัดนาก็ไฮตัก กับจมนาก็อัอดปัอะปัอง เจอทังซัดนาก็อัอดนึงจะรึงเต อาดัมต็างละมึฮออ์นซัดกูเนว ฮักพูนาก็ซีปันมูปันกูมอะกับอาดัมพัด นังตัอเบินอัมปิน
21เจอฮาไนเยโฮวาพูซางเลิดออ์นอาดัมบายะละแงด บัดอันบายะละแงดก็ากเจอ พูซางก็เอดอะฮางบลานคองอันอะลอฮมะลำ เจอก็ออ์นซายะมูดละแต็ดอัอดกือเตียะแอน 22อะฮางบลานนาก็เยโฮวาพูซางเอดอะลอฮตีอาดัมอะกี นาวตาะออ์นปันกวยกัน เจอก็มูอบออ์นอาดัม 23อาดัมเลิดเวาปาย "อะไนออยะ นาก็ซีปันมูปันกูคองอังกอะ พอะอันก็ตัอะตีซายะตีอะฮางคองอังกอะ อังกอะซีอะโรอันปาย กวยกัน พอะปายกวยกันอะไนก็ตัอะตีกวยกอ์น" 24-25เจอกะยากกับละกวยอะไน อะไลอัอดมัวอะลืย ฮักตุนกะมาลนังนึ
ไนเมือพูซางซางกวยกันอะตัอะตีกวยกอ์นแบบไนเจอ ฮาไนกวยกอ์นก็ซีดิตาฮอัมเปะตาฮอัมปูอ ปัอะอัอดมะนืยกับละกวยแอน เจอบาลนาะอะกีก็ซีปันซำกวยมะนาะ
Kasalukuyang Napili:
ปะทมมะกาน 2: Bru Bible
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in