Levítico 11
11
Mikhunapaq otaq mana mikhunapaq kaq animalkunamanta
(Dt 14.3-21)
1Señor Diosmi Moisesta hinallataq wawqen Aarontawan khaynata niran:
2—Israelpa miraynin runakunata nimuychis khaynata: Campopi kaq animalkunamantaqa kaykunatan mikhuwaqchis: 3mikhusqanta mullaypaq hinallataq ishkayman partisqa p'alqa chakiyoq animalkunata. 4Ichaqa mikhusqanta mullaypaq mana p'alqa chakiyoq animalkunataqa aman mikhunkichishchu. Chay animalkunaqa kaykunan: Camello; kay animalqa mikhusqanta mullaypaqmi, ichaqa manan chakinqa p'alqachu. Chayraykun camellotaqa ama mikhunkichishchu, mana mikhuna qenlli animal kasqanrayku. 5Aman conejotaqa mikhunkichishchu. Conejoqa mikhusqanta mullaypaq animalmi, ichaqa manan chakinqa p'alqachu. Chayraykun conejoqa mana mikhuna qenlli animal qankunapaq kanqa. 6Aman mikhunkichishchu vizcachataqa. Vizcachaqa mikhusqanta mullaypaq animalmi, ichaqa manan chakinqa p'alqachu. Chayraykun vizcachaqa mana mikhuna qenlli animal qankunapaq kanqa. 7Aman khuchitapas mikhunkichishchu. Khuchiqa p'alqa chakiyoq animalmi, ichaqa mikhusqantaqa manan mullaypanchu. Chayraykun khuchiqa mana mikhuna qenlli animal qankunapaq kanqa. 8Saynaqa chay qenlli animalkunapa aychantaqa aman mikhunkichishchu. Nitaqmi chay animalkuna wañuqtinpas tupaykunaykichishchu. Chay animalkunaqa mana mikhuna qenlli animalmi qankunapaq kanqa.
9Lamar qochapi kaq otaq mayupi kaq raphrayoq hinallataq escamayoq kaq animalkunataqa mikhunkichismi. 10Ichaqa aman mikhunkichishchu lamar qochapi otaq mayupi lliw kawsaq mana raphrayoq otaq mana escamayoq animalkunataqa, hatun kaqtinpas otaq uchuylla kaqtinpas. 11Aman chay animalkunapa aychantaqa mikhunkichishchu. Nitaq chay animalkuna wañuqtinpas aychantaqa tupaykunkichishchu. Chay animalkunaqa mana mikhuna nishu qenlli animalmi qankunapaq kanqa. 12Unupi kawsaq mana raphrayoq otaq mana escamayoq llapallan animalkunan qankunapaqqa mana mikhuna nishu qenlli animalkuna kanqa.
13Phawaq animalkunamantaqa kay animalkunatan qankunaqa ama mikhunkichishchu. Aswanmi chay animalkunataqa nishuta millakunkichis: Ankata, tullu p'akiq nisqa ankata, lamar qochapi kaq ankata, 14k'illinchuta hinallataq tukuy clase ankakunatapas, 15tukuy clase *cuervo nisqa phawaq yana animalkunata, 16*avestruz nisqa raphrayoq hatun animalkunata, ch'useqta, tukuy clase gaviotakunata, tukuy clase wamankunata, 17tukuta, avetoro sutiyoq phawaq animalta, 18cisneta, pelicanota, aycha mikhuq buitreta 19cigüeñata, tukuy clase garzakunata, abubillakunata hinallataq tukuy clase masukunatapas.
20Saynallataq pampanta tawa chakinpa puriq raphrayoq urukunatapas aman mikhunkichishchu. Chay urukunaqa mana mikhuna nishu qenlli animalmi qankunapaq kanqa. 21Ichaqa kanmi tawa chakinpa puriq raphrayoq urukunaqa. Chay urukunapa ishkay chakinqa largon hinallataq doblasqa iman kanan, saynapi chaykunawan saltanankupaq. Chayraykun chay urukunataqa mikhuwaqchis. 22Sayna clase urukunamantan kaykunata mikhunkichis: Tukuy clase langostakunata, ch'illikukunata hinallataq tukuy clase saltamontekunatapas. 23Ichaqa tawa chakinpa puriq raphrayoq wakin urukunataqa aman mikhunkichishchu. Chay urukunaqa mana mikhuna nishu qenllin qankunapaq kanqa.
24Sichus pipas wañusqa animalpa cuerponta tupaykunqa chayqa, asta tardeykuykaman qenlli qepanqa. 25Sichus pipas chay wañusqa animalkunapa cuerponta hukllatapas oqarinqa chayqa, p'achantan t'aqsakunan; hinaspan tardeykuykama qenlli qepanqa.
26Llapallan tawa chakiyoq animalkunamanta sichus chakin mana p'alqachu nitaq mikhusqantapas mana mullaypanchu chayqa, chay animalkunaqa mana mikhuna qenlli animalkunan qankunapaq kanqa. Sichus pipas chay animalkunapa wañusqa cuerponta tupaykunqa chayqa, qenllin qepanqa. 27Tawa chakiyoq llapallan animalkunamanta sichus chaki pampanwan otaq sillunwan puriq animalkunaqa qenllin qankunapaq kanqa. Sichus pipas chay animalkunapa wañusqa cuerponta tupaykunqa chayqa, qenllin qepanqa asta tardeykuykama. 28Saynallataq sichus pipas chay animalkunapa wañusqa cuerponta oqarinqa chayqa, p'achantan t'aqsakunqa. Hinaspapas chay runaqa asta tardeykuykaman qenlli qepanqa. Chay animalkunaqa mana mikhuna qenllin qankunapaq kanqa.
29Pampanta puriq animalkunamantaqa kaykunan qenlli animalkuna qankunapaq kanqa: Unchuchuku, huk'ucha, hinaspa tukuy clase k'ayrakuna ima. 30Saynallataq qenlli kanqa tukuy clase wiksanpalla puriq qalaywakuna, erizokuna, cocodrilokuna hinallataq camaleonkuna ima. 31Chay qasqonpallan puriq llapallan animalkunan qankunapaqqa mana mikhuna qenlli animalkuna kanqa. Sichus pipas chay animalkunapa wañusqa cuerponta tupaykunqa chayqa, asta tardeykuykaman qenlli qepanqa.
32Sichus chay wañusqa animal urmaykunqa k'ullumanta ruwasqa ima cosasmanpas otaq p'achamanpas, qaramanpas, costalmanpas chayqa, chay tupaykusqan cosaskunaqa qenllin qepanqa. Hinaspan chay tupaykusqan cosaskunaqa unuwan mayllisqa kanan. Saynapin chay cosaskunaqa qenlli qepanqa asta tardeykuykama. Chaymantañan ichaqa ch'uya kanqa.
33Sichus qenlli animalkunamanta mayqen animalpas wañuruspa allpa manka ukhuman urmaykunman chayqa, imapas chay manka ukhupi kaqqa qenllin qepanqa. Chayraykun chay mankaqa p'akisqa kanan. 34Sichus chay mankapi unu ima mikhunamanpas hich'aykukunqa chayqa, chay mikhunaqa qenllin qepanqa. Saynallataq sichus chay mankapi imapas tomanapaq kanqa chayqa, qenllillataqmi qepanqa.
35Sichus imapa hawanmanpas chay wañusqa animalpa cuerpon urmaykunqa chayqa, manan servinqañachu, qenllichasqa kasqanrayku. Saynallataq horno hawaman otaq q'oncha hawaman chay wañusqa cuerpo urmayunqa chayqa thuñichisqa kanan. Chaykunaqa qenlli kasqanraykun qankunapaqpas qenlli kanqa. 36Sichus chay wañusqa animalkunata imapas tupaykunqa chayqa qenllin qepanqa. Ichaqa unu orqonaykichis pukyupas hinallataq pozopas limpion qepanqa.
37Sichus ima wañusqa animalpas urmaykunqa tarpunapaq separasqa mukhuman chayqa, chay mukhuqa limpiollan qepanqa. 38Sichus chay mukhu unupi chullushaqtin ima wañusqa animalpas chay mukhu hawaman urmaykunman chayqa, chay mukhuqa qenllin qepanqa.
39Sichus mikhunapaq kaq ima animalpas wañunqa chayqa, chay wañusqa animalta tupaykuq runaqa tutayamunankaman qenlli qepanqa. 40Saynallataq sichus pipas chay wañusqa animalpa aychanta mikhunqa otaq oqarinqa chayqa, chay runaqa p'achantan t'aqsakunan. Hinaspan payqa tutayamunankama qenlli qepanqa.
41Aman wiksanpalla puriq animaltaqa mikhunkichishchu. Chay animalkunaqa mana mikhuna nishu qenlli animalkunan. 42Saynaqa aman mikhunkichishchu wiksanpalla puriq animalkunataqa, tawa chakinwan puriq otaq ashka chakinwan puriqkunatapas. Saynaqa aman mikhunkichishchu wiksanpalla puriq animalkunataqa. Chay animalkunaqa mana mikhunapaq nishu qenlli animalkunan. 43Saynaqa amayá qankunaqa qenllichakuychishchu sayna clase animalkunawanqa. Aswanmi chay animalkunataqa millakunkichis. Chay animalkunaqa mana mikhunapaq qenlli animalkunan. 44Noqan Señor Diosnikichisqa kani. Saynaqa ch'uyanchakuspayá limpio kaychis. Noqa Señor Diosnikichisqa ch'uyan kani. Saynaqa amayá wiksanpalla puriq animalwanqa qenllichakuychishchu. 45Noqa Señor Diosmi Egipto *nacionmanta orqomuraykichis, saynapi qankunapa Diosniykichis kanaypaq. Saynaqa ch'uyanchakuspayá limpio kaychis, noqa Señor Diosqa ch'uyay-ch'uyan kani. Chayraykun qankunapas ch'uya kanaykichis.
46Kay kamachikuy leykunan allpapi puriq lliw animalkunamanta, llapallan phawaq animalkunamanta, unu ukhupi kaq animalkunamanta hinallataq wiksanpalla puriq animalkunamantawan ima. 47Saynapin qankuna allinta reqsinkichis qenlli kaq animalkunata hinallataq limpio kaq animalkunatapas, saynallataq mayqen animalkunas mikhunapaq hinallataq mayqen animalkunas mana mikhunapaq kasqanta, nispa.
Kasalukuyang Napili:
Levítico 11: QEAÑT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional