Éxodo 39
39
Sacerdotekunapa p'achankunamanta
(Ex 28.1-43)
1Tolderamanta ruwasqa *tabernáculo templopi servinankupaqmi *sacerdotekunapaq p'achankunata sumaq bordasqata ruwaranku azul q'aytumanta, morado q'aytumanta hinallataq nina sansa color puka q'aytumantawan ima. Saynallataqmi Aaronpaqpas ruwallarankutaq tabernáculo templopi servinanpaq sacerdote p'achanta. Chaytaqa ruwaranku Moisesman Señor Diospa kamachisqanman hinan.
Efod nisqa chalecomanta
(Ex 28.6-14)
2Saynallataqmi ruwallarankutaq *efod nisqa chalecotapas. Chaytaqa ruwaranku qoriyoq hilomanta, azul q'aytumanta, morado q'aytumanta, nina sansa color puka q'aytumanta hinallataq fino *linomantawan iman. 3Saynallataqmi martillowan takashaspalla qorita llaspayachiranku. Hinaspan chay qoritaqa q'aytuta hina kuchuspanku, azul q'aytuwan, morado q'aytuwan, nina sansa color puka q'aytuwan hinallataq fino lino q'aytuwan juntaspanku, efod nisqa chalecota ruwaranku. 4Saynallataqmi chay efodpa ishkaynin tirantenkunatapas ruwaranku. Saynapin chay tirantekunaqa *sacerdotepa ishkaynin rikranman juntasqa karan. 5Cinturan watakunanpaq chumpipas ch'ulla piezallan efodwan karan. Chay chumpitan ruwaranku qori q'aytumanta, azul q'aytumanta, morado q'aytumanta, nina sansa color puka q'aytumanta hinallataq fino linomanta ruwasqa q'aytumantawan ima. Chaytaqa ruwaranku Moisesman Señor Diospa kamachisqanman hinan.
6Saynallataqmi ónice nisqa ishkay alhaja rumichakunapa hawanpipas Israelpa chunka ishkayniyoq wawankunapa sutinkunata churaranku, imaynan huk sellopipas sutita churanku chay hinata. Hinaspan chay rumikunata hap'ichiran qorimanta ruwasqanku monturakunapi. 7Chay ishkay alhaja rumikunatan churaranku efod nisqa chalecopa rikran hawapi, saynapi Israelpa miraynin runakuna yuyarinankupaq. Chaytaqa ruwaranku Moisesman Señor Diospa kamachisqanman hinan.
Pectoral nisqa pecheramanta
(Ex 28.15-28)
8Saynallataqmi qasqonpi churakunanpaq *pectoraltapas suma-sumaq bordasqata ruwaran, imaynan *efod nisqa chalecotapas ruwaran qoriyoq hilomanta, azul q'aytumanta, morado q'aytumanta, nina sansa color puka q'aytumanta hinallataq fino *lino q'aytumantawan ima, chay hinata. 9Chay pectoralqa ishkayman doblasqan karan, huk bolsón hina cuadrado. Sapankama ladonmanmi ishkay chunka ishkayniyoq centimetrota mediran. 10Chay pectoralpa hawanmanmi hap'ichiran tawa filapi alhaja rumikunata. Primer kaq filapin karan huk sárdica rumi, huk topacio rumi hinallataq huk carbunclo rumi ima. 11Ishkay kaq filapitaqmi karan huk esmeralda rumi, huk zafiro rumi hinallataq huk diamante rumi ima. 12Kinsa kaq filapitaqmi karan huk jacinto rumi, huk *ágata rumi hinallataq huk amatista rumi ima. 13Tawa kaq filapitaqmi karan huk berilo rumi, huk ónice rumi hinallataq huk jaspe rumi ima. Tukuy kay alhaja rumikunaqa sapankaman qorimanta ruwasqa monturawan hap'ichisqa karan. 14Israelpa chunka ishkayniyoq wawankunapa sutinkuman hinan, chay rumikunaqa chunka ishkayniyoq karan. Chay sapankama rumipin huk sello hina huk *ayllupa sutin grabasqa karan.
15Ruwallarantaqmi qori puromanta simp'asqa cadenachakunatapas. Hinaspan qasqonpi kaq pectoralman churaran. 16Ruwallarantaqmi qorimanta ishkay monturakunata hinallataq ishkay anillokunatapas. Hinaspan chay pectoralpa sapa law puntanpi churaran. 17Chay pectoralpa puntankunapi kaq anillokunapin churaran qorimanta simp'asqa ishkay cadenachakunata. 18Hinaspan chay cadenachakunapa ishkaynin puntankunata hap'ichiran efodpa rikranpi kaq ónice alhaja rumipa monturankunaman. Saynapin chay pectoralqa efodpa qasqon lawpi sujetasqa karan. 19Hinaspapas ruwallarantaqmi qorimanta ishkay anillokunatapas. Hinaspan chay anillokunataqa pectoralpa uran law puntankunapi churaran, efodwan tupanakuq ukhun lawpi. 20Saynallataqmi ruwaran qorimanta ishkay anillokunatapas. Hinaspan chaykunata churaran efodpa ishkaynin tirantenkunapa ñawpaqninpi, cinturanpi watakunan chumpipa tumpa wichayninpi, costurapa kasqan lugarpi. 21Hinaspan pectoralpa anillonkunata hap'ichiran efodpa anillonkunaman azul q'aytuwan. Saynapin chay pectoralqa efodpa chumpinpa tumpa wichayninpi qeparan; hinaspan efodwan juntasqa karan. Chaytaqa ruwaran Moisesman Señor Diospa kamachisqanman hinan.
Sacerdotepa huk p'achankunamanta
(Ex 28.31-43)
22Bezaleelqa awallarantaqmi *efodpa pachanpi kaq mana mangayoq azul tunicatapas. 23Chay azul tunicapa kunkan lawpin uma ustuchinapaq t'oqo karan. Chay t'oqopa muyuriqninpin huk ponchopa kunkanta hina, allin-allinta rebeteran, saynapi ama llik'ikunanpaq. 24Hinaspapas ruwallarantaqmi granadilla hina adornokunata, azul q'aytumanta, morado q'aytumanta, nina sansa color puka q'aytumantawan hinallataq fino *linomantawan ima. Hinaspan chay tunicapa enteron uray law patanpi churaran. 25Saynallataqmi ruwallarantaq qori puromanta campanillakunatapas. Hinaspan azul tunicapa enteron uray law patanpi churaran granadilla adornokunawan chawpinasqata. 26Primertaqa qorimanta ruwasqa campanillatan churaran. Chaypa qepanmanñataqmi churaran huk granadillata, chaypa qepanmanñataq huk campanillata, chaypa qepanmanñataq huk granadillata. Saynatan chay adornokunataqa tunicapa enteron muyuriqnin uray law patanpi churaran, tolderamanta ruwasqa *tabernáculo templopi servinanpaq. Chaytaqa ruwaran Moisesman Señor Diospa kamachisqanman hinan.
27Saynallataqmi ruwallarantaq Aaronpaq hinallataq wawankunapaqpas fino linomanta awasqa sumaq tunicakunata, 28fino linomanta uma wank'ina telata, umanpi churakunan adornota hinallataq calzoncillokunatapas. 29Saynallataqmi cinturan watakunan chumpitapas ruwaran fino linomanta, azul q'aytumanta, morado q'aytumanta hinallataq nina sansa color puka q'aytumantawan suma-sumaq bordasqata. Chaykunataqa ruwaran Moisesman Señor Diospa kamachisqanman hinan.
30Saynallataqmi ruwallarantaq qori puromanta mat'inpi churakunanpaq huk placata. Chay placapin ruwaran huk letrakunata “SEÑOR DIOSPAQ SAPAQCHASQA” nispa niqta. Chay letrakunataqa ruwaran imaynan sellopipas letrata ruwanku chay hinatan. 31Chay letrero placataqa azul cordonwanmi uma wank'ina telaman wataran. Chaytaqa ruwaran Moisesman Señor Diospa kamachisqanman hinan.
Tolderamanta ruwasqa tabernáculo templota ruway tukusqankumanta
(Ex 35.10-19)
32Saynatan Israelpa miraynin runakunaqa Señor Dioswan tupananku *tabernáculo templota tukuy imaymanantinta ruwayta tukuranku. Chaytaqa ruwaranku Moisesman Señor Diospa kamachisqanman hinan. 33Hinaspan Moisesman entregaranku Dioswan tupananku tabernáculo templota tukuy kaykunantinta: Ganchonkunata, marconkunata, tablankunata, postenkunata, chay postekuna tiyananpaq basenkunata, 34carneropa qarankunata pukawan teñisqata, llamp'uy-llamp'u qarakunata, cuartota rakiq cortinata, 35baúl hina *arcata, arcapa varillankunata, arcapa tapanta, 36mesata tukuy serviciokunantinta, Señor Diospaq sapaqchasqanku t'antata, 37qori puromanta ruwasqa mechero hina *candelabrota, filanpi lamparankuna churasqata, candelabropa servicionkunata, lamparakuna k'anchananpaq aceiteta, 38qorimanta ruwasqa *altarta, ch'uyanchana aceiteta, sumaq q'apaq inciensota, tabernáculo templopa punkunpaq cortinata, 39*sacrificio *ofrendata k'ananapaq broncemanta altarta, broncemanta rejillanta, varillankunata, llapallan servicionkunata, mayllikunankupaq lavatoriota basentinta, 40patiopi kaq cortinakunata, pilarninkunata, tiyananpaq basenkunata, patioman haykunanku punkupi cortinata, washk'ankunata, estacankunata hinallataq tabernáculo templopi llapallan serviciokunatapas. 41Saynallataqmi entregallarankutaq tabernáculo templopi servinankupaq p'achata, *sacerdote Aaronpaq ch'uyanchasqa p'achata hinallataq sacerdote Aaronpa wawankunapaq sacerdote p'achakunatapas.
42Tukuy chaykunatan Israelpa miraynin runakunaqa ruwaranku, Moisesman Señor Diospa kamachisqanman hina. 43Señor Diospa kamachisqanman hina tukuy chaykuna ruwasqankuta qawayuspanmi, Moisesqa Señor Diosmanta mañakuran, paykunata bendecinanpaq.
Kasalukuyang Napili:
Éxodo 39: QEAÑT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional