मती 2
2
पुरुब देसरिकुःआ कनहूनदारकू
1हरदोस, राजाय दोहोन मेला, एहूदिया छतरराः बेतलहेम सहररे ईसू जनमावनेना। दो तोनोंग दिन तयोमरे एहूदिया छतरराः पुरुब होराः देस अते एरुसलेम सहररे तोनोंग तोनोंग कनहूनदारकू सेनेडा। 2हँकू हंडा सोदोरनेनखनकू होंबोरतेड, “एहूदाकूरीग राजा करेय जनमावकिया? अले हाँयरीग इपील सेरमोरेले ञेलतिरिया अरू हाँय सलामगेय लगाले वेगकिया।”
3नाःआ कता हरदोस राजा अरू एरुसलेमरिकुःआ होड़कू अयूमतेड दो हँकूराः जीव मुरुक बोरोयान। 4हनते हाँयग हरदोस राजा, जमा मरंग पुजउरीकू अरू भगवानराः नियम चेडदार होड़कूय एचे जुमावतेडकुःआ अरू हँकू एचेरेय होंबोरतेरा, “मसीराः जनम करे होयाःता?” 5दो हँकू हाँय एचेरेकू कतातेड, “एहूदिया छतरराः बेतलहेम सहररे होयाःता। भगवानराः बड़रा कतायीग होड़ नाःआ इयाय ओजाःतेरा;
6एहूदिया छतरराः बेतलहेम सहररिकुःआ होड़कू,
अपे अते मी होड़ मनारंग राजाय बड़ाँःता,
अरू हाँय ईंगरिकुःआ इसराएल होड़कूय अगुवाइवाकूता।
हनालगा अपेराः सहर एहूदिया छतरराः एटाः सहरकून अते मरंगकू ओंगलेता।”#मीका 5:2
7हनते हरदोस राजा हँकुःआ कनहूनदारकू कलेकाले राःतेडकुःआ अरू हँकू एचेरेय होंबोरतेरा, “इपील तुमीसपे ञेलतिरिया?” 8हनते हाँय हँकू, बेतलहेम सहर अगी नाःआ इया कतावातेडकूखने वारगोतेडकू, “अपे नपायते डेंबापे ञाम अरू हाँयराः सरवन ईंग एचेरेपे उदुःगे, जेमहा ईंग हों सेनेकियानखन हाँयिंग सलाम अवे।”
9हँकू हरदोस राजाराः कता अयूमतेडखनकू सेनेडा। अरू सेनेन सेन मेला हँकू मड़ंगकू ञेलतिरिया हाँयग इपील सेरमोरे हँकू मड़ंग मड़ंगे सेना। हाँयग डेंबा दोहोना हना ततेररेकू सोदोरयान दो हाँयग इपील रोंकावयान। 10इपील रोंकावयान दो कनहूनदारकू मुरुक बडेतेकू बहालयान।
11हनते हँकू ओड़ाःरेकू बोलोयान अरू हाँयग लँइग, एंगात मरियम सुदाकू ञेलतिरिया अरू हँकू ईसू मड़ंगरे उकुड़ोमनेनखनकू सलामतिरिया। हनते हँकू बकसाकून गीगतेडखन सोना, लसा अरू गंदरस हाँय लगाकू दहिनतेरा।
12दो सेरमो देसरीग बराहील हँकू एचेरे सपनारे सेतावतेडकूखने कताया, अपे हरदोस राजा एचेरे अलोपे कुदा सेन, माःआन। हनालगा हँकू एटाः दूरते अँकूराः देसकू कुदा सेनेडा।
मिसिरी देस अगीकू सेना
13हँकुःआ कनहूनदारकू कुदायान, हना तयोमरे परबू भगवानरीग बराहील सपनारे उसूप एचेरे सेनेडखने कताया, “रिमुःमे, लँइग अरू एंगात गोःकेडखन मिसिरी देस अगीम ञीर। हरदोस राजा लँइग ञेड गोजेय लगाय ओंगलेतना। हनालगा ईंग आम एचेरेयिंग कतायता हना बेला वरी हंडाम दोहोन।” 14दो हाँय रेमनेनखन रनइत रइतरे लँइग अरू एंगात सुदा मिसिरी देसकू ञीरयान। 15अरू हँकू हरदोस अरीने गुजुः वरी हंडाकू दोहोना। नाःआ कता भगवानराः बड़रा कता होड़राः कता इया होयानेना,
“मिसिरी देस अते ईंगरीग बेटायिंग राःकेरा।”#होसे 11:1
16तयोमरे हरदोस राजा सुदीगोतेडे, “हँकुःआ कनहूनदार होड़कू ईंगकू अडिगकेरा।” दो हरदोस राजा मुरुके रीसनेन अरू हाँय आँयगरिकुःआ होड़कू बेतलेहेमरेय वारगोतेडकू। हाँय कनहूनदारकू अतेय सुदीतेरा हना बेला इया बेतलहेम सहररिकुःआ बार बरिस अते हुडिंग हुडिंग जमा हेरेल होनकूय एचे ञेड एंडा गोतेडकू। 17दो नाःआ कता भगवानराः बड़रा कतायीग होड़ इरमिया कतातेरा हनन इया होयानेना,
18“रामाह सहर अते अरोकू अयूमतेरा,
इयाम अरू मुरुक फिकीरराः अरो,
राहेल आँयगरिकुःआ लइंकू लगाय इयामाः।
हँकुःआ लइंकू गोएगयान।
हनालगा तोनोंगीग हाँय मेरकू कता बहाल अवेगडीग।”#इर 31:15
19तोनोंग बरिस तयोमरे हरदोस राजा गोएगनेना। हनते परबू भगवानरीग बराहील मिसिरी देसरे उसूप एचेरे मीटोंग सपनारेय कतातेरा, 20“ने उसूप, डेंबा एचे ञेड एंडागेय लगाकू ओंगलेःआ, हँकू दो गोएगयनाकू। हनालगा आम रिमुःमे अरू लँइग अरू एंगात सुदा इसराएल देसरेम कुदा सेन।”
21दो उसूप रेमनेन अरू डेंबा अरू एंगात सुदा इसराएल देस तोराकू। 22अरकिलाउस आँयगरीग अपात हरदोस राजाराः बदलारे एहूदिया छतररे राइजगेतना, माःआन उसूप अयूमतेरा। दो हाँय एहूदिया छतर सेन लगाय बोरा। एटाः सपनारे भगवान हाँये सेतावतेरा दो, हाँय गलील छतर अगीय सेनेडा। 23हनते हाँय नसरत सहररेय सेनेडखन हंडाय बसावनेना। मड़ंगरे भगवानराः बड़रा कता होड़कू कतातेरा,
“हाँय नसरतरीग होड़ माःआनकू कतावायता,”
हनन इया नाःआ होयाकिया।
Kasalukuyang Napili:
मती 2: kfp
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© (Active) Wycliffe Bible Translators, Inc. All rights reserved.