ረውምየት እቂዝ 3
3
ፈወነ 3
እደረት ኣምንሽንድ
1እደስለ ኣይዅዳነው ኣቐነዊዙ ኣርወድ ወረጘ የጝ? ግርዝሽተነዊዙ ወየድስ ወረጘ የጝ? 2ኣውማው ዊገይዝቅ ጝኣርወድ ንቕፀው የጝ፤ እጝቂስቅ በውገ እደረት ቃልድ ኽድር ይውሽተውድ ኣዅዳኒዝ የጝ። 3እደስለ ጛጊስ ላው ላው ኣምናቍ ዊንጛን ጛይ ኣምናቍ ኣቐነውድ እደረት ኣምንሽንድ እዳዝጠመ? 4ፍፅምዝ ኣቓውም፤
«ክቃሊዝቍዝ እማንተው ኣትር፤
ፍርድል ጥውራንድም ለጣትር»
ይሽት ፃፍሸጘ፣ እጅርቅ ኻሽወረ ኣቕሽም እደረ እማንተው ኣነ።#መዝ. 51፡4።
5ዊገድ ግን ይናኣመፅድ እደረት ፅድቅድየንት ጋልፅ ቓሊሰው ኣቐውዝየ ወረጘ ይነ ቸልንቅ? እደረ ይናግል ጝቍጠድ ነሳን ትክክል ኣየውም ይሽትጠመ? እኒንት እቀ ልምዲዝጘ ዊግጠኵን። 6ፍፅም ኣቓውም፤ እነየው ኣቐውዝየ እደረ ኣልሚል ኣወይ ፊርድጣ? 7ያን ኻሽወረ ኣቐነውድ እደረቱ ኣምንሽንድየንት ጋልፀው፣ ጝጭስም ክቭር ችጝሰው ኣቐውዝየ ያን ኽጥያትኘ ይሽጥ ፊርድጨውድ ውር ቃጥ የጝ? 8እኒንመ፦ « ‹ቀሰው ተራንስ ማጥን ጭቓ ሰራሽነ› ይጘኵ» ይጛ ላው ላው እቅ ይናት ዛሽጛንትጘ የጝ፤ እንዛይ እቂል ተረው ፍርድድ ጭቅየው የጝ።
እጅር እጝቅ ኽጥያትኘ ኣቐጘ
9ነስየ ወረጘ ይና? ይን ኣይዅዳንድ ኣኽዛቫኒስ ቺዝነቅመ? እረ ኣየውማ! ኣይዅዳንድም ኣጝነ ኣኽዛቫንድ እጝቅቅ ኽጥያትኝጥ ኣጘጘ በውርስን ኪስንኵኑን። 10እንም እንት ይሽት ፃፍሸጘ የጝ፦
«ላው እኳ ፃድቅ እጀውም፤ ላውም እኳ እጀውም።
11ኣስክውም እጀውም፤
እደረትም ደምዘው ላው እጅርም እጀው።
12እጝቅቅ እደረት ጒደነይስ ፍጝኵ፤
ላው ኣቕጝም ጣቅማቍ ኣቕጝኵ፤
ቀሰው ሰቭ ሰራሸውም እጀውም፤
ላው እጅር እኳ እጀውም፤#መዝ. 14፡1-3፤ 53፡1-3።
13ጝታኻረጅድ ቢተው መቃቭሪዝጘ የጝ፤
ጝታላቒዝ ኻጝስጘኵ፤
ጝታኪፍሪል ሲቭረይዙ መርዝ እኩ።#መዝ. 5፡9፤ 140፡3።
14ጝታምቸድ እፀዝመ ማረዝ እቻቕኩ።#መዝ. 10፡7።
15ጝታልኵጣንድ ብር ቅብሰነውዝ ቀልጣፋን ጛይ፤
16ድዘርዝመ ጕስቝልነዝ ጝታጒደነይል እኩ።
17ዲግተዙ ጒደነድየንት ኣርቓቍም።#እሳ. 59፡7-8።
18ስሪስቅ እደረት ጐውታቍም።»#መዝ. 36፡1።
19ነስየ ምቸ እጝቅ ዲቭሽታንስ፣ እጝቅ ኣልምድም እደረት ፍርድዝ ሳይል ኣቓንስ ማጥን ኽግ ዊግተውድቅ ኽግዝ ሳይል ፅበቊዝ ኣቐጘ ኣርቕነኵን። 20እንዝ ማጥን ኣውማው እጅርቅ ኽግ ፋፅመነውዝ እደረት በዊል ፃድቅ ኣጠ ቸላውም፤ ኽሽስ እጅር ኽጥያትኘ ኣቐነውድ ኽግዝ ኣማካነትዝ ኣርቕሽተኵ።#መዝ. 36፡1።
ፅድቅ ችጝሸውድ እምንትዝ ኣቐጘ
21ነን ግን ኽግዝመ ነቭያታንዝ ሚዝርድጘው እደረት ፅድቅድ ኽግ እጀው ጋልፅሽትኩ። 22እን ፅድቅድ ችጝሸውድ እየሱስ ክርስቶስት ኣምነነውዝ የጝ፤ የነትም እጝቅ ኣምነቊዝቅ የጝ፤ ምላሰንድም ቲተ እጀውም።#ገላ. 2፡16። 23እጝቅቅ ኽጥያት ሰራሽጝኵ፤ እደረት ክቭርድም ጛጊስ ጒድልኩ። 24እየሱስ ክርስቶስ ቺ ኣቐነውዝ ኻርነይዝ ጝፃገይዝ ፃድቅጘኵ። 25ጝት ኣምነቍድቅ ጝብሪዝ ጝታኽጥያቲስ ይቅርተ ችጛንስ ማጥን እደረ እየሱስ ክርስቶስት ምስዋይት ፃቭ ኣልስኩ፤ እኒንት ፃቨውድም በውገ ሰራሽተው ኽጥያትድ ቐፃቒጝቀ ኣቕልዝ ዲቈነውዝ ጝፅድቅድየንት ቓሊሳንስ ማጥን የጝ። 26እደረ እን ዚምኒዝ እኒንት ፃቨውድ ጝፅድቅድ ቓሊስጠ የጝ፤ ምላሰንድም ጘጝ ጝቕም ፃድቅ ኣቕ እየሱስ ክርስቶስት ኣምነቍድዛት ፃድቅዘኵ።
27እደስለ ማክኽሽነ ጥውሸው ዊገ ወረጘ እኩ? ጘጝመ እዳቕኩ፤ ማክኽሸነውድ እዳቐውድ ወረጘዝ የጝ? ኽግድ ፋፅመነውዝመ? ኣየውም፤ ዊገድ ግን እምንትዝ የጝ። 28እጅር ኽግ ፋፅመነውዝ ኣዪጝቀ እምንትዝ ፃድቅጠጘ ኣርቕነኵን። 29እደረ ኣይዅዳኒዝ ኣምላክ ጭቝመ ውረ? ኣኽዛቫኒዝስ ኣምላክ ኣየውቀ? የይ! ኣኽዛቫኒዝ ኣምላክም የጝ። 30ጊርዝሽተውድየንት እምንትዝ፣ ጊርዝሽቲየውድየንትም ጘጝት እምንትዝ ፃድቅዘው እደረ ላው የጝ።#ዘዳ. 26፡4፤ ገላ. 3፡20። 31እደስለ እምንትዝ ምላሰንዝ ኽግድ ሸርንቅ የነትመ? ኣየውም፤ ኽግድ ፀናዝንቅጚ።
Kasalukuyang Napili:
ረውምየት እቂዝ 3: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in