ረውምየት እቂዝ 1
1
ፈወነ 1
1ክርስቶስ እየሱስት ኣገልጋይ፣ ኻወርየም ኣጠ ጭጝሸው፣ እደረት ወንጌልድየንትም ክንስጠ ማርፅሽተው ባውሎስቲስ። 2እኒን ወንጌሊዝቍዝም እደረ በውርስ ጝነቭያታኒዝ ኣመካይነትዝ ቅዱሳን መፃፋኒዝ ቲስፈ ይው ዊኑ። 3-4እኒን ወንጌልድም ጝዅር ይናኣደረ እየሱስ ክርስቶስት ማጥን ዊግተው የጝ፤ ጘጝ ጝስየይዝ ዳዊትት ዚረይስ እዅርሹ፤ ጝቅድስነይዙ መንፈሲዝ ቈሽ ክርጘይስ ጐነውዝ እደረት ዅር ኣቐነውድ ኻይልዝ ጋልፅሽቱ። 5ክርስቶስት ሽⶔዝቍዝ እጝቅ ኣኽዛቫኒዝ ማኽሊስ ኣምንጝ ኣዚተቍ ችጝሽጛንስ ማጥን ጝቍዝ ፃገዝመ ኻወርየነትዝ ለምርኑን። 6ክትን ክታቕምም እየሱስ ክርስቶስትቍ ኣጥጘ ጭጝሸቊዝ ማኽሊስ ችጝሽርነቅ የጝ።
7እደረስ ቀንሽርነቅ፣ ቅዱሳንም ኣትርነ ጭጝሽርነቅ፣ ረውምየ ፅብርነቂዝቅ እፃሽተው እፃ።
ይናኣይር እደረቲስ፣ ኣደረ እየሱስ ክርስቶስቲስም ፃገዝመ ዲግተዝ ክታጭስ ኣነ።
ባውሎስ ረውምየት ምመናንድዛት ቓልጠ በና ዊነጘ
8ክታእምንትድ ኣልሚሊቅ ወይሽታንስቅ እጝቂስቅ በውርስ ክታእጝቅት ማጥን ይኣምላክት እየሱስ ክርስቶስትውዝ ሚዝየንዘኵን። 9ዊትርቅ ይፀለውቲዝ ክታት ትዝ የር ኣቐጘ ወንጌልድየንት ሲቭከነውዝ ምሉ ይእዘኒዝ ኣግልግለው እደረ ይሚዝር የጝ። 10ነን ኻትሸነይዝ ቈሽ እደረ ጝፍቃድ ኣቕ ክታጐ ተጨ ይጒደነድ ጭቅሻንስ ማጥን ዊትርቅ ፃልየኵን። 11እምንትዝ ፀናትርነ ፃቨው መንፈሳዊ ይውት ነቃንስ ማጥንም ክታት ቓልጨ በነኵን። 12እኒንት የውድም ያን ክታእምንቲዝ፣ ክትንም ይምንቲዝ ይናስ ይናይ ዲበዲብሽትናንስ ማጥን የጝ።
13ይፅንወ! ላጥ ኣኽዛቫኒስ ኣቐጘ ክታጊስም ፍር ችጛንስ ማጥን ክታጐ ተጨ እክሰው ግርየ ኻሊ ዊነጘ ኣርቕትርነ በነኵን፤ ዊገድ ግን ነኳን ኣሽ ሩዲየውም።#ኻወ. 19፡21። 14ግሪካኒዝም ኣነ ግሪካን ኣየቊዝ፣ ጥቨቭኝጢዝም ኣነ ኣስክሳቊዝቅ እጝቅዝቅ ግድየተ ፃቀር የጝ። 15ረውምየ ፅብርነቅ ክታጭስም ወንጌልድ ሲቭክጨ በነውድ እንዝ ምላሰንዝ የጝ።
16ወንጌልዝ ኣይቭጠቅም፤ ምላሰንድም ወንጌል በዊል ኣይዅዳኒዝ፣ ጝዝግረ ቈሽ ኣኽዛቫኒዝ ጝት ኣምነቍድዛትቅ ቓዘው እደረት ኻይል የጝ።#ማር. 8፡38። 17ጝዝ እደረት ፅድቅድ ጋልፅሽትኩ፤ «ፃድቅ እምንትዝ ርዅየዝ ፅብጡ» ይሽት ፃፍሸጘ፣ እኒን ፅድቅድ ችጝሸውድ ጐነይስ ኪርም ኻትሸነይል ኣሽ እምንትዝ የጝ።#እን. 2፡4።
እቀ ዚረይዙ ጭቕቲዚመ ተርጡ እደረት ቍጠይዝ
18እማንድየንት ጝታጭቕቲዝ ኣብልጝ ፃየቊ እቂዝ፣ ጝታኣመፂልቅ ጝታጭቕቲልቅም እደረት ቍጠድ ሲመይስ ጋልፅሽትጡ። 19ምላሰንድም እደረ ጝቕም ጛጭስ ጋልፃንስቅ እደረት ኣርቕጥነ ጥውሸውድቅ ጛጭስ ግልፅ የጝ። 20ኣልም ፋጥርሸት ኪርም እትላው እደረት ባኽሪድ የነትም ዘላልምዙ ጝኻይሊዝመ ጝኣምላክነቲዝ፣ ጝቕም ፋጥረው ፍጥርቲዝ ኣመካይነትዝ ግልፅ ኣቕ እትልኩ፤ ኣቓንስቅም እቅ ጝታጭቕቲዝቍዝ ኣልሰነው ምላሰነም እጀቍ። 21እደረት ኣርቕጝሽም እኳ ጝኣምላክነቲዝ ጥውሸው ክቭርድየንት ጝጭስ ይዊየቍም፤ ሚዝየነም ኣልሲየቍም፤ ዊገድ ግን ጝታኸሰቪዝ ጊነትቍ ኣቕ፤ ኣስክሰነ እጀው ጝታእዘንድም ጥምቱ።#እፊ. 4፡17-18። 22«ይን ጥቨቭኝጥ የጝ» ይጛ ኻጘፃን ኣቕ። 23ክራው እደረት ኪብርዘነው በርጝ ድዘው እጅርዙ ምስልመ ዚለዙ ምስልዝ፣ ሲዘ ልኵጣን ፃየው እንሰሰዙ ምስልዝመ ዝቨዝዝቨ ኻሲተው እንሰሰዙ ምስልዝ ኪብርዝ።#ዘዳ. 4፡16-18።
24እንዝ ማጥን በገዘ ጝታሰውነትድየንት ጛስ ጛይ ኣርክስዝጛንስ ማጥን እደረ ጛት ኽጥያትዝ እቻቐው ጝታእዘኒዙ ምርቕፀይዝ ዲቍስ ይዉ። 25እደረት እማንድየንት ኻሽትዝ ላውጥ፤ ፈጣሪት ፊንተም ፍጥርትድየንት ኣምልክ፤ ኣግልግልም፤ እደረ ግን ዘላልም ሚዝየንሽተው የጝ፤ ኣሚን።
26እንዝ ምላሰንዝ እደረ ጛት ኣይቭሰው ምርቕፀዝ ዲቍስ ይዉ፤ ጝታእቍንድ እኳ ጝታተፈጥረዊዝ ጥውሸው ግልቍ ጅቅ ኽርየነውድየንት በርጝ ጝታተፈጥረዊዝ ጥውሻዊዝ ላውጥ። 27እኒዝጘም ግልቍድ ጝታተፈጥረዊዝ ጥውሸው እቍን ጅቅ ኽርየነውድየንት በርጝ ጛስ ጛይ ሽኵነነውዝ ቃጥልሽ፤ ግልቍድ ግልቊጅቅ ኒውርሰው ዊገ ፋፅም፤ ጝታጭቓ ሰቪዝ ጥውሸው ቕፃርድየንት በገዘ ጝታቕምትል ነስ።
28እንዝ ንየም እደረት ኣርቐነውድ ጣቅማውም ይጝ ኻስቭጛንስቅ፣ ጘጝም ጥውሻው ዊገድየንት ፃቭጛንስ ማጥን ጨቅሸው ኣይምረውዝ ዲቍስ ይዉ። 29እጝቅት ኣይንት ኣመፅዝ፣ ግፍዝ፣ ሲቭርቭረዝ፣ ጭቕትዝ፣ እቻቐቍ ኣቕ፤ ቅንየዝ፣ ኒፍስ ቍወነዝ፣ ክርክርዝ፣ ተኰልዝ፣ ጭቓ ኣምልዝ፣ እቻቐቍ ጛይ፤ እርየቍ፣ 30እቀ ሽ ጨቀቍ፣ እደረት ሽክተቍ፣ እጅር ኣዋርደቍ፣ ትቪትኝጥ፣ ምክኽኝጥ፣ ጛይ፤ ጭቕት ሰራሸነው መለ ደምዝጘኵ፤ ጝታኣቅሊዝ ኣዚታቍም። 31ኣስክሰነ እጀቍ፣ ውል ፋዘቍ፣ ፍቅር እጀቍ፣ ስቝርት እጀቍ፣ ጛይ። 32ውርም እኳ፦ «እኒንት ፃቨቊዝቅ ክርጘ ጥውሸኵ» የው እደረት ኽግድየንት ኣርቕጝሽም እኒንትቅ ፃቭጘኵ፤ ፃቨነው ጭቝም ኣዪጝቀ እኒንት ፃቨቍድዛትም በርታዝጘኵ።
Kasalukuyang Napili:
ረውምየት እቂዝ 1: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in