लूका 2

ईसू को जनम

(मत्ती 1:18–25)

1वाँ दनाँ में ओगुस्तुस केसर आदेस दिदो के, हाराई रोम देस का लोगाँ का नाम लिक्या जावे। 2या पेली जनगणना ही जद्याँ कुरीनियस सिरिया परदेस को राजपाल हो। 3अन हंगळा लोग नाम लिकाबा का वाते आपणाँ-आपणाँ गाम ग्या।

4युसुप, गलील देस का नासरत नगरऊँ यहूदा परदेस में दाऊद का सेर बेतलेम ग्यो, काँके वो दाऊद का बंस को हो। 5वो आपणी हगई किदी तकी मरियम का हाते नाम लिकाबा का वाते ग्यो, ज्या गरबवती ही। 6वीं वटे हा, वीं दाण मरियम का मिना पूरा वेग्या। 7मरियम आपणाँ पेला बेटा ने जनम दिदो अन वींने गाबा में लपेटन ठाण में मेल्यो काँके, वाँका वाते हरई में जगाँ ने ही।

गवाळा ने हरग-दुताँ को संदेस

8अन वीं देस का कतराई गवाळ्याँ हा, जीं काकड़ में रात की टेम में आपणाँ गारा का टोळा की रुकाळी कररिया हा। 9वीं टेम परमेसर को एक हरग-दुत वाँका हामे परगट व्यो अन परबू परमेसर की मेमा को तेज वाँका च्यारूँमेर चमक्यो अन वीं घणा दरपग्या। 10तद्याँ हरग-दुत वाँकाऊँ क्यो, “दरपो मती अन देको। मूँ थाँका वाते हव हमच्यार लायो हूँ, जणीऊँ हारी मनक जात घणी राजी वे जाई। 11आज दाऊद का नगर में थाँका वाते एक मुगतीदाता को जनम व्यो हे अन वोईस परबू मसी हे। 12वाँकी ओळकाण आ हे के, थाँ एक बाळक ने गाबा में लपेट्यो तको अन वींने ठाण में हूँतो तको पावो।”

13वणीस दाण एकाएक वाँ हरग-दुत के लारे हरग-दुताँ की फोज परमेसर की बड़ई करती तकी दिकी, वीं ओ केरिया हा, 14“हरग में परमेसर की बड़ई अन धरती पे वाँ मनकाँ ने सान्ती मले, ज्याऊँ वो राजी हे।”

15जद्याँ हरग-दुत वाँका नकेऊँ पाच्छा हरग में पराग्या। गवाळ्याँ एक-दूजाऊँ केबा लागा के, “आपीं बेतलेम में चाला अन ज्या बात परबू परमेसर आपाँने बताई हे, वींने देका।” 16वीं तरत वटे पराग्या मरियम अन युसुप ने देक्या अन बाळक ने ठाण में हूँतो तको देक्यो। 17गवाळ्याँ ओ देकन ज्या बात हरग-दुत की ही, हाराई ने बता दिदी। 18ईं बात ने जणा भी हूणी। वीं अचम्बो करबा लागग्या। 19पण, मरियम अणा हंगळी बाताँ आपणाँ मन में राकन होचबा लागी। 20गवाळ्याँ ने जस्यान क्यो ग्यो हो वीं वस्यानीस देकन परमेसर का गुणगान गाता तका अन बड़ई करता तका आपणाँ घरे पराग्या।

बाळक को नाम राकणो

21 # लूका 1:31 आटमें दन, जद्याँ बाळक का खतना को टेम आयो। जद्याँ वींको नाम ईसू राक्यो ग्यो। ज्यो नाम बाळक के मरियम के पेट में आबाऊँ पेल्याई हरग-दुत बता दिदो हो।

ईसू ने मन्दर में ले जाणा

22अन जद्याँ मूसा का नेमा का हस्याबूऊँ वाँके पुवितर वेबा का दन पूरा व्या, तद्याँ वीं बाळक ईसू ने यरूसलेम का मन्दर में परबू परमेसर का हामे हाजर करबा ने लाया। 23#निर 13:2,12परबू की वेवस्ता का हस्याबूऊँ, “हरेक पेलो नर बाळक परबू परमेसर का वाते अरपण किदो जाई।” 24अन परबू की वेवस्ता का जस्यान, “कमेड़ी की एक ज्योड़ी कन कबुतराँ का दो बच्याँ लेन बली चड़ाया जावे।”

समोन को दरसण

25वीं टेम यरूसलेम में समोन नाम को एक मनक हो, वो धरमी अन भगत हो। वो इजराएल की सान्ती की वाट नाळरियो हो अन पुवितर आत्मा वींका हाते ही। 26पुवितर आत्मा वींने बतायो हो के, “जद्याँ तईं थूँ परबू का मसी ने देक ने लेई, तद्याँ तईं थारी मोत ने वेई।” 27अन जद्याँ वो समोन परमेसर की आत्मा का हिकाऊँ मन्दर में आयो तद्याँ ईसू का बई-बापू वींका वाते मूसा का नेमा के जस्यान करबा ने वींने मन्दर में लाया। 28तद्याँ समोन वींने आपणाँ खोळा में लिदो अन परमेसर की बड़ई करते तके क्यो,

29“परबू जी, थाँ थाँका बचन ने पूरो किदो हे,

अबे थाँको दास आपणाँ नके सान्तीऊँ बला लो।

30काँके मारी आक्याँ थाँरी मुगती ने देक लिदी हे।

31जिंने थाँ हंगळा लोगाँ का हामे त्यार किदो हे।

32 # यसा 42:6; 49:6; 52:10 वो जी यहूदी ने हे, वाँका वाते थाँकी मुगती को गेलो बताबावाळो उजितो

अन थाँका इजराएल का मनकाँ ने मेमा देबावाळो हे।”

33अन वींका बई-बापू ईंका बारा में ज्यो कई क्यो ग्यो हो वणीऊँ वाँने अचम्बो व्यो। 34जद्याँ समोन वींने आसिरवाद दिदो अन वींकी बई मरियमऊँ क्यो, “देक, यो बाळक इजराएल में घणा लोगाँ का नास अन भला को कारण बणी, अन परमेसर ईंने एक अस्यो हेन्याण बणायो हे, जिंको विरोद करियो जाई। 35जणीऊँ घणा जणा का मना का बच्यार परगट वेई अन थाँरी आत्मा घणी दकी वेई।”

परमेसर का आड़ीऊँ बोलबावाळी हन्ना की गवई

36असेर गोत में फनुएल की बेटी परमेसर का आड़ीऊँ बोलबावाळी ही। वींको नाम हन्ना हो अन वाँ डोकरी ही। वाँ पन्याँ केड़े आपणाँ धणी का लारे खाली हात वर तईं री ही। 37वाँ अबाणू विदवा ही अन चोरासी वर की ही। वाँ मन्दर मेंईस रेती ही। वा एकाणा अन परातना का हाते रात-दन परमेसर की सेवा करती ही। 38वीं टेम में वाँ भी वटे अई। वणी परमेसर को धन्नेवाद दिदो अन ज्यो मनक यरूसलेम ने छुड़ाबा की वाट नाळरिया हा। वणा हाराई ने बाळक ईसू का बारा में बताबा लागगी।

युसुप अन मरियम को पाछो नासरत जाणो

39 # मत्ती 2:23 जद्याँ युसुप अन मरियम परबू की वेवस्ता का जस्यान ज्यो भी करणो हो वो हाराई करन गलील परदेस में आपणाँ नगर नासरत में आया। 40अन वो बाळक डिल-डोल में जोरावर अन अकल में बड़तो ग्यो अन परमेसर को दया वींपे ही।

41 # निर 12:1–27; वे.वि 16:1–8 वींका बई-बापू हर साल फसे का तेवार पे यरूसलेम जाता हा। 42जद्याँ ईसू बारा वर का व्या तद्याँ तेवार की रीत की तरियाँ वीं यरूसलेम ग्या। 43अन जद्याँ तेवार का दन वीत ग्या। तद्याँ वी पाच्छा आबा लागा। पण, बाळक ईसू यरूसलेम मेंईस रेग्यो हो। ईंको वींका बई-बापू ने पतो ने हो। 44वणा यो होच्यो के, वो आपणाँ हण्डाळ्याँ का हाते वेई अन वी चालता रिया एक दन वेग्यो, पण वो वाँका नके ने आयो तो पसे वी वींने आपणाँ हगा-होई अन ओळकाण वाळा में होदबा लागा। 45पण वो तो कटेई ने मल्यो। तो वीं वींने होदता-होदता पाच्छा यरूसलेम में आया। 46तीन दन केड़े वणा वींने मन्दर में धरम गरुवा का हाते बेटो तको वाँकी बाताँ हामळतो अन वाँकाऊँ सवाल-जवाब करतो तको दिक्यो। 47ज्यो लोग-बाग बाळक ईसू की बाताँ ने हुणरिया हा, वी हाराई वींकी हमज अन वींका जबावऊँ अचम्बा में पड़ग्या हा। 48वींका बई-बापू वींने देकन अचम्बो में आग्या। अन वींकी बई वणीऊँ क्यो, “हे मारा बेटा, थें कई लेवा माँकाऊँ अस्यो किदो? देक, थाँरा बापू अन मूँ कतरा परेसान वेन थने होदरिया हा।”

49ईसू वणाऊँ क्यो, “थाँ मने कई लेवा होदरिया हो? कई थाँ यो ने जाणता हा के, मारा बाप का घर में मारो रेणो जरूरी हे?” 50पण, वणा ईं बात ने ने हमजी।

51तो पसे वो वाँका हाते नासरत में पाछो आयो अन वाँकी आग्या को पालण करतो रियो। वींकी बई अणा हारी बाताँ ने आपणाँ मनईंमन में राकी। 52#नि.व 3:4ईसू अकल अन डील में, परमेसर अन मनकाँ की करपा में बड़तो ग्यो।

Kasalukuyang Napili:

लूका 2: एम टी आर

Haylayt

Ibahagi

Kopyahin