Génesis 33
33
Jacob yéetel Esaue' cu ca'a bisicuba'ob
1Le ca tu yilaj Jacob láakinta'an Esaú tumen cuatro cientos máaco'obe', tu t'oxla'antaj le paalalo'ob ichil x Lea, x Raquel yéetel le ca'a túul x palitzilo'ob. 2Tu dzaj táanil le x palitzilo'ob yéetel u yaalo'obo', cu dzo'ocole' x Lea yéetel u yaalo'ob, tu pachale' x Raquel yéetel José. 3Cu dzo'ocole' ca j máan táanil ti'ob; ca j noclaj tac cóojic siete u téenel u táan jo'olal j lu'um, bey tu beetilaco' tac ca j náadz tu yicnal u sucu'un. 4Ba'ale' Esaue' áalcabnaj u nactáante, tu méekaj, tu súut dzaj u kab tu caal, tu méekaj ca xan tu dzu'udzaj. Tu ca'a túulalo'ob okolnajo'ob. 5Cu dzo'ocole' Esaue' tu sen pactaj le co'olelo'ob yéetel le paalalo'obo', ca tu káatchi'itaj:
Le lo'oba' ¿máaxo'obi?
Ca tu núucaj Jacob:
Lelo'oba' in paalal u dzaamaj Ku ti' le a palitzila'.
6Le x palitzilo'ob túuno' j náadzo'ob yéetel u paalalo'obe' ca j noclajo'ob lu'um; 7cu dzo'ocole' j náadzo'ob x Lea yéetel u paalal ca j noclajo'ob xan, tu dzoocbalaque' j náadzo'ob José yéetel x Raquel, bey xan noclajo'ob. 8Esaue' tu téec káatchi'itaj:
¿Ba'ax ca tucultic a beetic yéetel tuláacal le much'lan múuch' aalako'ob tin sen nactáantajo'?
Ca tu núucaj Jacob:
U ti'al in najmatic a wutzil óolal.
9Ca tu núucaj Esaú:
Ma' tzai' in láak; tene' sen yaan teni', p'áaten yéetel ba'ax a ti'al.
10Ba'ale' Jacobe' tu sen a'alaj ti':
Ma', wa dzo'oc in najmatic a wutzil óolale', beet utz a kamic le siibala', tumen iquil in wiliqueche' o'oli' bey táan in wilic Kue', u jaajile' teche' dzo'oc a kamiquen sen utz. 11Quin káat óoltic ca a kam le siibal tin taasaj techa', tumen Kue' tu ayikalcuntajen, mix ba'al cu bineltic teen.
Tu yo'olal sen káat óolnajic Jacobe', Esaue' yanchaj u kamic le siibalo'; 12ba'ale' tu ya'alaj:
Ma'alob, co'one'ex, lukco'on waye'. Teen quin bin táanil ti' teech.
13Jacobe' tu ya'alaj ti' xan:
In nojoch suuc'uun, teche' táan a wilic, le paalalo'oba' ma' jach mu'uka'ano'obi', cu dzo'ocole' yaan xan in canantic le j tamano'ob yéetel le wacaxo'ob yaan u mejenilo'obo'; wa cu sen ca'analo'obe' je'el u láaj quíimilo'ob le j tamano'ob ti' jun p'éelili' kiine'. 14Ma'alob wa ca xi'iquech táanil ti' teen; tene' cháanbelil quin j bin, je'el bix cu bin u xíimbalo'ob le aalako'ob cu bino'ob táanil ti' teno', je'el bix xan chaanbéelil u xíimbalo'ob le paalala', tac quéen kuchuco'on Seir u ti'al c nupicbáa ta wéetel.
15Esaue' tu ya'alaj: Ma'alob cha' in p'atic teech dze'edze'ec le máaco'ob cu taalo'ob tin wéetela'.
Ba'ale' Jacobe' tu núucaj ti':
¿Ba'ax o'olal ca chéen chi'ichnactal, utz tin wóol ca xi'ico'ob ta wéetel?
16Ti'ili'e' kiino' Esaue' j suunaj tu caajil Seir. 17Ba'ale' Jacobe' j p'áat Sucot, te'elo' tu beetaj jun p'éel naj u ti'alinte, tu beetaj xan máacano'ob u ti'al u yaalako'ob. Let o'olal tu dzaj u kaaba'int le cúuchilo' Sucot.#33.17 Sucot, u káat u ya'al: máacano'ob.
18Le ca j luk Padan-arame', tooj u yóol yéetel ma'alob kuchic Canaán ca j cajlaj actáan ti' u nojoch caajil Siquem. 19Yéetel cien taakine' tu manaj jun xéet' lu'um ti' u paalal Hamor, u taata Siquem, te tu dzaj u cajtali'. 20Cu dzo'ocole' tu beetaj jun p'éel u multuunil kultaj, ca tu dzaj u kaaba'int El-Elohe-Israel.#33.20 El-Elohe, u káat u ya'al: Kue', Junab Ku.
Kasalukuyang Napili:
Génesis 33: MAYADC
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Biblia Maya de Yucatán © Sociedades Bíblicas Unidas, 1992.