Malika 15
15
Iesu i vonayavuga Failato 'waineye
(Madiu 27:1-2,11-14; Luke 23:1-5; Ioni 18:28-38)
1'Awa'awaiogose tovelomu yadi to'edakumetavo, to'edakumeta 'au'auveadi, ve'etoboda 'adi tovevo wata me Diu Kanisela 'ifwaidi taiadi i va'auta. Matatabudi i veifufu bega yadi nuanua 'aitamogana Iesu i yogoni i naweni i 'aniveleneni Loma kabemani yadi toveimea Failato 'waineye.
2Bega Failato Iesu i velutolieni i vo, 'Omu me Diu yadi kini?" Iesu i vo, 'Asa'aiana 'u vona bani'odi." 3Siwe tutuyanina tovelomu yadi to'edakumetavo i vevevita-maimaigiga Iesu kebu i da vonavona i veve'wadamo. 4Begaidi Failato i voneni i vo, I vevevitamuga nani tulina tulina 'waidiega 'u noganogai 'alo kebu?" 5Siwe Iesu i baila, kebu nuanuana vonanidi i na tutulidi begaidi Failato nuana i vogani.
Failato i veimea Iesu i na wafa
(Madiu 27:15-26; Luke 23:13-25; Ioni 18:39-19:16a)
6Malamala 'aitamogana 'aitamogana me Diu i sakasakali Uvi'agalatagona faifaina. Sakalinina 'waineye me Diu tamu iadi yogoyogonina i vevenua'ivineni bega kabemani i 'e'etoyavuya vanuga yogona 'wainega. 7Tutuyanina 'waineye tamu tomogo 'ana wagava Balaba i miamia vanuga yogona nageneye, kumanina toluvewafa, ma enavo i vetalaga Loma kabemani taiadi. 8Tutuyanina Iesu i tovotovoi Failato mataneye, tomotoga fuedi i nagoi Failato 'waineye i velu'ui nuanuadi tamu tomogo i na 'etoyavuya Uvi'agalatagona 'ana sauluva bani'odi. 9-10Failato i 'asetai tovelomu yadi to'edakumetavo Iesu i ve'unumagigieni i 'aniveleneni 'waineye begaidi i vonedi i vo, Nuanuami me Diu yami kini a na 'etoyavuya?" 11Siwe tomotoga 'akonadi tovelomu yadi to'edakumetavo i nua'anidi bega Failato i na voneni Balaba i na 'etoyavuya we'e Iesu kebu.
12Failato i velutoli 'waidie i vo, Kumanina 'wa golegoleni me Diu yami kini, bani'odi a na munegi?" 13Nika 'aila'a bwaikina i vegole i vo, 'U tutufwaseni 'ai lagalagana 'waineye bei i na wafa." 14Wata Failato i velutoliedi i vo, Yana sakona ava'ai?" Siwe 'aila'anidi i toke i vegolegole i vo, 'U tutufwaseni 'ai lagalagana 'waineye." 15Failato nuanuana tomotoga i na 'ivenua-agiagidi begaidi Balaba i 'etoyavuya, we'e i veimea tolugaviavo Iesu i na toke i na fitali mulieta i na naweni i na tutufwaseni 'ai lagalagana 'waineye, bega i na wafa.
Tolugavia Iesu i sidibidibieni
(Madiu 27:27-44; Luke 23:26-43; Ioni 19:2-3,16b-27)
16Vonayavuga i 'a'avana, tolugaviavo Iesu i naweni kabemani yadi vanuga bwaikina 'waineye, bei tolugavia matatabudi i va'auta. 17Tolugavianidi talauma yamoyamoinega Iesu i ve'weseni wata 'ou'ou nigodi ma yana 'ibadi i 'etofifini 'unu'ununeye i biuleni. Vaigavunidi kini 'adi vaigavu bani'odi siwe 'wainega Iesu i sidibidibieni. 18Bei i ve'ililibu-vekavekali 'waineye i vo, Kaiwa, 'omu me Diu yadi kini." 19'Uwe 'wainega 'unu'ununa i nikenikei, i 'ikiwakiwali wata igodi ma yadi ve'ililibu i 'odu'odu 'waineye. 20Yadi saidibi i 'a'avana, talaumanina yamoyamoina i yavuya, taunina 'ana talaumayega i ve'weseni, mulieta i vagavaia i naweni i na tutufwaseni 'ai lagalagana 'waineye.
Iesu 'ana tutufwatagi
21 #Lom 16:13 Tutuyanina Iesu i nunaweni 'edeye, tamu tomogo i veluagai 'ana wagava Saimoni, kwedayega i tauya i mimai Ielusalema. Saimoni tomogo Sailini, natunavo 'adi 'ailuga Alekisana wata Lufusa. Tolugaviavo Saimoni i lukakadeni Iesu 'ana 'ai lagalagana i eva. 22Bega i nagoi i le'wa tamu 'awalawa 'waineye 'ana wagava Goligota, 'ana saivila 'Unu'unu. 23Bei oine i 'idewai tamu konini 'ana wagava Mulo taiadi i veleni i na yemu bega 'ana kini'ona kebu i na veviga, siwe i baila veviganina faifaina i tauyeni. 24#Sam 22:18Mulieta i tutufwaseni 'ai lagalagana 'waineye, i 'a'avana tolugaviavo nuanuadi Iesu 'ana talauma i na veusedi begaidi tamu 'wava i 'waveni bani'odi kate. 'Ai'edi aitoi i na kumetaga ava'ai talaumaga nuanuana i na 'ewai.
25Iesu i tutufwaseniga 'awa'awaie, 9 kiloki 'waineye. 26'Ana 'ai lagalagana tabwaneye vonanina 'wainega i vevitaiga i kilumi i tutufwaseni. Vonanina i kilumiga side bani'odi.
TOMOGO DE'E ME DIU YADI KINI.
27 #Ais 53:12 Wata tovainago 'adi 'ailuga i tutufwasedi, tamu Iesu 'ana 'atagiega, tamu 'ana wamayega. 28#15:28 De'e kilumanina kebu i da 'eno'eno buki tuatuaiotogidi 'ifwaidi nagedie.Nika 'ana mogitana i souyeni basenadi Yaubada yana Buki nageneye i kilumi vonanina i vo,
Tomotoga i vo 'ako taunina tamu tosakona."
29-30 #Sam 22:7, 109:25; Mak 14:58; Ion 2:19 Tomotoga 'ai lagalagana lilivaneamo i nunagoi i veugalewalewa wata Iesu i yagayagaia i vo, 'Amu 'isa. 'Omu igodi Vanuga 'Eba Velu'ui 'u da sigeuya wata 'aiata 'aitonu nagedie 'u da vetovoia. 'Ai'edi vonanina mogitana, nika taunimu 'u na 'ita'ita'iemu, 'u na obuma 'ai lagalagana 'wainega."
31-32Wata bani'odi tovelomu yadi to'edakumetavo wata ve'etoboda 'adi tovevo 'aise'avadi i sidibidibieni i vo, Tomotoga 'ifwaidi i 'ita'ita'iedi, we'e taunina kebu 'ana fata i na 'ita'ita'ieni. Igodi Yaubada 'ana Venua'ivina wata me Isileli yada Kini. 'Ai'edi 'asiauotoga i da obuma 'ai lagalagana 'wainega ta da 'iseni ta da ve'awamogitana." Wata tovainagonidi taiadi i tutufwasediga ma fuedie i manini.
Iesu i wafa
(Madiu 27:45-56; Luke 23:44-49)
33'Aiata 'ana utukamwana 'waineye fwayafwaya matatabuna i dudubali, i nagoga 'ana tugusa lavilavie 3 kiloki i magetai. 34#Sam 22:1'Awasasanina 'waineye Iesu i toke i vegole me Diu bonadiega i vo, Iloi, Iloi, lema sabakitani?" 'Ana saivila i vo, Yaku Yaubada, yaku Yaubada, awale 'u bailaotogeku?" 35'Ifwaidi tomotoga i tovotovoiga bonana i nogai i vo, 'Wa nogai? Ilaitia i golegoleni, nuanuana abamayega i na mai i na 'ivaiseni." 36#Sam 69:21Tamu tomogo i lilide i nago kikifa i lu'utuvi oine yuyuna 'waineye, tamu 'ai 'waineye i velugaganeni i 'iyoyoeni 'waineye, nuanuana Iesu i na yemu. Nika 'ifwaidi i vo, 'U ve'wada, nagami ta na 'iseni voke Ilaitia i mimai i na 'ita'ita'ieni."
37Mulieta Iesu i toke i vegole nika yawaina i 'awatagoni.
38 #Sou 26:31-33 Vanuga 'Eba Velu'ui nageneye tamu saiboda kaleko badubaduna 'wainega Yaubada yana tutudaba tabutabuotogina i sisibodai. Tutuyanina Iesu yawaina i 'a'avaga saibodanina i 'anilabu'alugedi,#15:38 'Eba 'isa 'awa i sibaleni 'eba luku Yaubada 'waineye. tabwanega i obu dibuneye.
39Tolugavia 'adi to'edakumeta Iesu 'ana 'ai lagalagana lilivaneye i tovotovoi, i nogai Iesu yana vegole wata i 'iseni bani'odi i munega i wafa nika i ve'awamogitana i vo, Vona mogitana, taunina Yaubada Natuna."
40 #Luk 8:2-3 Wata 'ifwaidi vevine 'ani'ieyega i 'i'isanago 'ai lagalagana 'waineye. Vevinenidi 'waidiega, Salome, Meli 'atamana Magidala 'wainega wata tamu Meli, Iosese wata Iemesa inadi, Iemesa tamu 'ana wagava Nigolalaga. 41Vevinenidi 'adi 'aitonu Iesu 'ana to'aivaita tutuyanina i folofolova Galili. Wata 'ifwaidi vevine Iesu taiadi i maia Ielusalema 'waineye, ma fuedie i 'i'isanago.
Iesu 'ana ve'ufa
(Madiu 27:57-61; Luke 23:50-56; Ioni 19:38-42)
42-43'Akonadi i lavia Iosefa tomogo Alimadia i le'wa. Taunina tamu me Diu yadi Kanisela, tomotoga fuedi i ve'ililibuyeni wata Yaubada yana veimea yana mai fwayefwayeye i lulukamaseni. 'Aiatanina 'waineye Iesu i wafaga, Diu yadi 'Aiata 'Idewadewa, we'e 'awa'awai yadi tafalolo. Avinodi 'eba ilagi, siwe Iosefa tomogo Alimadia i vemata'ai'ai bega i nago Failato 'waineye, i velu'ui Iesu tomogona 'ana ta'i faifaina. 44Tutuyanina Iosefa yana velu'ui Failato i nogai nuana i vogani i vo, Iesu 'akonadi i wafa?" Begaidi vona i vetunei tolugavia 'adi to'edakumeta 'waineye i mai i velutolieni i vo, Iesu 'akonadi i wafa?" 45Tutuyanina Failato i 'asetai 'akonadi Iesu i wafa i tauyeni Iesu i na ta'ia. 46Bega Iosefa i nago talauma 'avu'avuna i kimwanei, mulieta Iesu tomogona i ta'ia talaumanina 'wainega i fania, i 'a'avana taumata basenadi i ala-vagaseni matumatu 'waineye bei Iesu i ve'ufai, kileu bababanega i vetubodai. 47Vevine 'adi 'ailuga matadie Iesu i ve'ufai, Meli 'atamana Magidala 'wainega wata tamu Meli Iosese inana.
Kasalukuyang Napili:
Malika 15: YML
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Copyright © 1984, 1988, 2025 Wycliffe Bible Translators, Inc., and SIL Papua New Guinea; CC-BY-ND-NC
