Luke 11
11
Velu'ui faifaina Iesu i ve
(Madiu 6:9-13, 7:7-11)
1Tamu tutuya Iesu i vevelu'ui tamu 'awalawa 'waineye. Tutuyanina i ve'a'ava, tamu yana tovetutuyama i voneni i vo, 'Auvea, nuanuama velu'ui 'u da vema, bani'odi Ioni Tobafitaiso yana tovetutuyamavo velu'ui i vedi." 2Iesu i vonedi i vo, Side bani'odi 'wa na vevelu'uiedi 'wa na vo,
Tamama,
'omu magemagetamu,
nuanuama tomotoga fuema 'a na ve'ililibuyemu.
Nuanuama 'u na veveimeyema,
3Nuanuama 'ama'ama 'u na velevelema 'aiata 'aitamogana 'aitamogana faifaidi.
4Mali tomotoga i vesauluva sakoina 'waimeye 'a nuatavunidi,
'omu wata bani'odi yama sakona 'u da nuatavunidi.
'Eba sailubu 'waidie kebu 'u na tauyema.>"
5-6Wata Iesu i ve yana tovetutuyamavo 'waidie velu'ui 'ana 'aseta faifaina. I vo, 'Ai'edi tamu aitoi 'waimiega 'u da 'eno'eno nika tamu iamu i da le'wa lovana 'ana utukamwane siwe 'ani'ani kebu, bega 'u da nago wata tamu iamu yana vanuge 'u da vo, Iaku, tamu tomogo 'ani'ieyega i mai siwe 'ani'ani kebu begaidi a mai 'waimuye 'ani'ani 'aitonu 'u na veleku bola a na tutulidi.> 7We'e 'ai'edi iamu i na vo, Kebu 'u na vematakaki, 'akonadi a saiboda ma yaku 'aila'a 'a 'eno'eno, kebu 'aku fata a na tovoi a na velemu.> 8Siwe a na vonemi, kebu veiana faifaina i na 'ivaisemu, yamu velu'ui-vaivaitugana faifaina i na velemu ava'ai nuanuamu.
9Wata 'omi bani'odi. 'Wa na vevelu'ui bega Yaubada i na velemi, 'wa na lalaualaga 'wa na veluagai wata 'wa na velutolitoliga i na nogayemi saiboda i na sibaleni. 10Vona mogitana, egavo i vevelu'uiga Yaubada i na veledi, egavo i lalaualaga i na veluagai wata egavo i velutolitoliga i na nogayedi saiboda i na sibaleni. 11We'e 'omi kwakwama tamadiavo, 'ai'edi tamu natumu igana i na velu'uiemuga, kebu 'ana fata 'o'olo 'u na veleni. 12'Alo 'ai'edi fou i na velu'uiemuga, dinigala weweda#11:12 'Ana mogitana vona Ibeliu 'waineye, bwa'o'o'o, siwe yadi 'awalaweye bwa'o'o'o tomotoga yadi 'eba wafa, we'e 'ida 'waideye bwa'o'o'o sai'afo mweadi. 'u na veleni? A nuani kebu i da lubwaineniga. 13'Omi tosakona siwe tutuya fuedi ava'ai natumiavo nuanuadi nani 'atumaidi 'wa veleveledi, we'e egavo Tamada abame i na velu'uieni, mogitana 'Anu'anunu Magemagetana i na veledi."
Ava'aiega Iesu yana toketokena i veluagai
(Madiu 12:22-30; Malika 3:20-27)
14Tamu tomogo, basenadi yaiaina i ageiga kebu 'ana fata i na welava, Iesu i veluagai yaiaina i voneni i 'awa'a'ia. Tomotoga fuedi i nogai i welava begaidi nuadi i voganidi. 15#Mad 9:34, 10:25We'e tomotoga 'ifwaidi i vo, Seitani,#11:15,18,19 'Ana mogitana Bielisibabi, Seitani tamu 'ana wagava. yaiaina yadi to'edakumeta, Iesu i agei bega yana toketokena 'wainega i vonavona yaiaina i 'a'awa'a'idi." 16#Mad 12:38, 16:1; Mak 8:11Tomotoga 'ifwaidi nuanuadi Iesu i na silubuya bega i vo, Nuanuama tamu 'eba nuavogana wata 'eba nua'ewa 'u na 'idewai bega 'a na 'asetamu ma yamu veimea Yaubada 'wainega." 17Iesu 'akonadi yadi nuanua i 'asetai begaidi i vonedi i vo, 'Ai'edi 'eba veimea 'aise'avadi i na 'idia i na vevetalaga bola 'eba veimeanina i na velovi. 'Ai'edi vanuga 'ana tomia yadi ve'ikwayekwayega 'wainega 'idi i na souyeni, nika i na yavula. 18'Wa vonaga Seitani yana toketokena 'wainega a vona tamu yana tomotoga i 'awa'a'ia, siwe 'ai'edi Seitani yana 'aila'a 'aise'avadi i da 'idia i da vevetalaga, kebu 'ana fata i na miamia i na 'a'avaotoga. 19We'e yami tomotoga 'ifwaidi i vonavona yaiaina i 'a'awa'a'idi, vetuma 'wa da velutoliedi ava'aiega yadi toketokena i veluagai. Nika i na vo, 'Wa vekali, kebu Seitani 'wainega.> 20We'e mogitana Yaubada yana toketokena 'wainega yaiaina a vonevonedi i 'a'awa'a'idi, 'wa da 'asetai Yaubada yana veimea i souyeni 'awasasamie.
21'Ai'edi tamu tomogo toketokena bani'odi Seitani ma yana 'eba vetalaga fuedi, yana vanuga i lulumadu'aieni bega kebu tamu aitoi yana kukua i na 'ivesakoidi. 22We'e 'ai'edi tamu tomogo toketokeotogina#11:22 Tomogo toketokeotogina, 'asa'aiana taunina Iesu Keliso. i na mai tomogonina taiadi i na vetalaga, i na vetoketoke 'waineye yana kukua wata yana 'eba vetalaganidi i vevetumaganediga i na eloi enavo i na veutadi.
23 #
Mak 9:40
'Ai'edi aitoi kebu taiadi 'a na folofolovaga, taunina 'aku gavia, we'e 'ai'edi aitoi kebu yau taiadi tomotoga 'a na vavagavaidi 'a na mimaiedi Yaubada 'waineye, kumanina tomotoga i sogisogiedi, taunina yaku folova 'ana to'ivesako.
Yaiaina yana 'eba mia 'ana lauvai faifaina
24'Ai'edi yaiaina i na 'awa'a'ia tamu tomogo 'wainega, i na nago 'awalawa sakoineye bei i na lalauala-vuvua tamu yana 'eba mia. 'Ai'edi kebu i na veluagaiga i na vo, A na vilaku yaku 'eba mianina basenadi a 'iaweniga 'waineye.> 25Bega i na vilai, i na mai 'eba mianina i na 'iseni 'akonadi i 'idewai 'atumaina wata vunavunagina i 'eno'eno siwe nage'avana.#11:25 'Anu'anunu Magemagetana kebu tomogonina i da agei. 26Fai kebu 'ana veluvaiga i na souyeni i na nago wata yaiaina sakoiotogidi 7 i na vagavaidi i na miedi taiadi i na luku 'eba mianina 'waineye. Tomogonina i na 'ivesakootogi mogitana, basenadi kebu bani'odiga."
Sosoana mogitana
27Tutuyanina Iesu i vona'a'ava, tamu vavine 'aila'a 'waidiega bonadi bwaikinega i toke i vona i vo, 'Eba sosoana inamu 'waidie fai i venatunemu wata i vesusumu." 28Iesu i vonedi i vo, 'Wa vonaga mogitana siwe wata egavo Yaubada yana Vona i na nogai wata i na vevematayakeyakeni 'eba sosoana mogitana 'waidie."
Tomotoga nuanuadi 'eba 'isa Iesu 'wainega
(Madiu 12:38-42)
29-30 #
Ioa 3:4; Mad 16:4; Mak 8:12 'Aila'a bwaikina Iesu i tovififineni bega i vonedi i vo, Tutuya de'e 'ana tomotoga yami sauluva sakoidi, yami nuanua bwaikina 'eba nuavogana wata 'eba nua'ewa a na 'idewai matamie 'wa na 'iseni 'wa na ve'awamogitana yau Yaubada 'wainega a mai. We'e tamu nani a na veifufuyeni yami 'eba 'isa. 'Eba 'isanina 'asa'aiana Iona, taunina Yaubada yana tolu'ivona, igana bwaikina kamoneye i miamia 'aiata 'aitonu, mulieta i souyeni. Naninina i souyeni Iona 'waineye me Ninive yadi 'eba 'isa Yaubada i vetunei. Wata bani'odi yau a vetomotogaotoga naninidi i na souyedi 'waikuye yami 'eba 'isa Yaubada i vetuneku.
31 #
1Ki 10:1-10; 2If 9:1-12 Basenadiotoga me Siba yadi toveimea bwaikina Kwini Siba#11:31 'Ana mogitana Kwini i mai bolimanayega. 'ani'ieyega i mai bega Kini Solomoni yana nuamageta i na vinenegeni. 'Awaie Vonayavuga 'ana 'Aiata 'waineye, Kwini Siba wata tutuya de'e 'ana tomotogavo taiadi 'wa na tovoi Yaubada mataneye, kwininidi i na matawa'ulimi fai kebu nuanuami nuamageta. Siwe a na vonemi, Kini Solomoni tomogo bwaikina, we'e tomogonina#11:31 Tomogonina 'asa'aiana taunina Iesu. 'awasasamie i tovotovoi kumanina bwaikaotogina siwe 'wa baila, kebu nuanuami 'wa na vinenegeni. 32#Ioa 3:5Wata bani'odi Vonayavuga 'ana 'Aiata 'waineye me Ninive wata tutuya de'e 'ana tomotogavo taiadi 'wa na tovoi Yaubada mataneye, tomotoganidi i na matawa'ulimi fai tutuyanina Iona i lau'age 'waidie i nuaviladi. A na vonemi, Iona tomogo bwaikina we'e tomogonina 'awasasamie i tovotovoi kumanina bwaikaotogina siwe 'wa baila, kebu nuanuami 'wa na nuavilami.
Mageta 'ana vona-awatabai
33 #
Mad 5:15; Mak 4:21; Luk 8:16 Kebu tamu aitoi mageta i da kabukabuni nika i da givegiveni wata 'aivoeyega i da tatalafwaseni. We'e mogitana mageta 'ana 'eba yato 'waineye i lulutalauleni bega egavo i lukuluku vanuganina nageneye i magemagesedi. 34Matami bani'odi nuami 'ana mageta. 'Ai'edi nani 'atumaidi 'wa na 'ise'isediga, nuami matatabuna magemagetadi, we'e 'ai'edi nani sakoidi 'wa na 'ise'isediga, nuami matatabuna i na dudubalidi. 35'Wa na 'isa'isa i na nunago yami magetanina i na 'weu nuami i na dudubalidi. 36'Ai'edi mageta i na magemagesemi 'ami fata nani fuedi 'wa na 'isedi, wata bani'odi 'ai'edi nuami magemagetadi kebu tamu nuami i na dudubalidi, nani matatabuna magemagetadi 'waimie."
Falisi wata ve'etoboda 'adi tovevo Iesu i tolimatanidi
(Madiu 23:1-36; Malika 12:38-40)
37Tutuyanina Iesu i vona'a'ava, tamu Diu totafalolo Falisi Iesu i tayegi 'ani faifaina bega i nago i miabui i na 'ani. 38Falisinina Iesu i 'iseni kebu nimana i da 'ivevunavunagidi yadi sauluva bani'odi begaidi nuana i vogani. 39Iesu tomogonina yana nuanua i 'asetai begaidi i voneni i vo, 'Omi Falisi, tomogomi 'wa 'ivivigavudi we'e inagemi vainago 'ana ve'isakololo wata veumokai, yami sauluva bani'odi vedi wata 'aivoe, dumwedi 'wa tamatamadi we'e inagedi yoke 'anikudana. 40'Omi 'wava'wavami. Yaubada tomogomi i 'idewadi wata inagemi. 41We'e i lubwainemi 'wa na 'anivelena-maimaiga tovewekowekoma 'waidie 'wa da vo yami nuanua inagemie 'wa da 'ivevunavunagidi sauluva sakoidi 'waidiega, nika nani matatabuna 'waidiega 'omi vunavunagimi wata magemagetami.
42 #
Vei 27:30
'Omi Falisi nuakalikalimi, fai 'awaie vita bwaikina 'wa na veluagai Yaubada 'wainega. Veimea siaidi 'wa veve'ililibuyedi we'e veimea bwaikidi 'wa baibailedi. 'Ai'edi 'ani'ani 10 'waimie 'aitamogana 'wainega 'wa na 'anivelena-maimaiga Yaubada 'waineye. Wata nani saiotogidi bani'odi matasilisilili 10, 'aitamogana 'wainega 'wa na 'anivelena-maimaiga Yaubada 'waineye. 'Atumaina, bani'odi 'wa na vevesauluvedi, siwe wata veimea bwaikidi 'wa da vematayakeyakedi, bani'odi sauluva tonovidi wata Yaubada 'wa da nuakalikalieni.
43'Omi Falisi nuakalikalimi, fai 'awaie vita bwaikina 'wa na veluagai Yaubada 'wainega. Nuanuami to'edakumeta bwaikidi taiadi 'wa na mimiabui 'eba miava'auta 'waidie, wata nuanuami 'atamanafouye tomotoga ma yadi ve'ililibu i na vevekaiwa 'waimie.
44Nuakalikalimi, 'omi bani'odi taumata, inagena sakoina we'e tabwana 'atumaina. Tomotoga tabwaneamo i baba i nunago siwe kebu i da 'asetai 'ageyafayafadie bokana i 'eno'eno. Wata 'omi bani'odi, 'ami 'isa 'atumaidi we'e inagemi sakoidi."
45Tamu ve'etoboda 'adi tove Iesu i voneni i vo, Tove, yamu vonanina 'wainega 'ima wata 'u falisakoyema." 46Iesu i vo,
'Omi ve'etoboda 'adi tovevo nuakalikalimi, 'awaie vita bwaikina 'wa na veluagai Yaubada 'wainega. Tomotoga 'wa lulukakadedi bega yami ve wata ve'etoboda i vevematayakeyakedi, 'wa da vo venuana vitadi 'wa da veve'ewadi, siwe kebu tamu sai'afo 'wa da 'i'ivaisedi.
47Nuakalikalimi. Basenadiotoga tubumiavo Yaubada yana tolu'ivonavo i luvewafadi. We'e 'omi, taumata 'atumaidi 'wa 'idewadi matumatu 'waidie tolu'ivonanidi luludi faifaidi. 48Tubumiavo tolu'ivonanidi i luvewafadi we'e 'omi luludi 'wa 'idewadi, 'eba 'isa yadi sauluvanina 'wa awave'atumaieni. 49Yaubada yami nuanua i 'asetadi begaidi ma yana nuamageta i vo, Yaku tolu'ivonavo wata yaku tomata'aulelevo a na vetunedi 'waidie, tofolovanidi 'ifwaidi veviga i na veledi we'e 'ifwaidi i na luvewafadi.> 50-51#Nag 4:8; 2If 24:20-21Tutuyanina Yaubada fwayafwaya i 'idewavauyeni 'wainega i maiga 'asiau tubumiavo tolu'ivona fuedi i luluvewafadi. Basenadiotoga Keni taina Ebeli i luvewafai, nika bei tubumiavo 'ainike i velamuya i nagoga Sekalaia 'waineye, kumanina i luvewafai 'eba velomu wata Vanuga 'Eba Velu'ui kamwadie. A vona mogitana tutuya de'e tomotoganimi to'ainikenidi 'adi vematavuloga 'omi 'wa na tovoieni, kebu 'ami fata 'wa na dega veviganina bwaikina 'wainega.
52'Omi ve'etoboda 'adi tovevo nuakalikalimi. Yaubada yana Buki 'ana 'aseta 'ana 'awa 'wa sibodai. Kebu nuanuami 'wa na luku 'asetanina 'waineye we'e mali tomotoga nuanuadi i na luku siwe 'wa sibodai."
53-54Tutuyanina Iesu i vona'a'ava nika i tauya vanuganina 'wainega. Ve'etoboda 'adi tovevo wata Falisi ma yadi nuasako i siloloi velutoli fuedi 'waidiega, 'ai'edi kebu i na tutula-dewadiga to'edakumetanidi 'adi fata i na lu'ivoneyeni Loma kabemani 'waidie bega Iesu i na 'ive'avini.
Kasalukuyang Napili:
Luke 11: YML
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Copyright © 1984, 1988, 2025 Wycliffe Bible Translators, Inc., and SIL Papua New Guinea; CC-BY-ND-NC
