Mga Popular na Bersikulo sa Biblia mula sa Romanos 8

Utz qootzajle aas u bꞌaꞌnil nitul tiꞌ kajay qꞌuꞌl tzꞌejel taanima tiꞌ u Tioxh. Ayaꞌ qꞌuꞌl sikꞌlemal taqꞌo tiꞌ ibꞌanax vitxumbꞌal.

Ech tiira nunnima aas yeꞌxhkam koꞌxh saꞌeesankaꞌoꞌ tiꞌ u Tioxh vaꞌl tiira tii qiꞌ tiqꞌaqꞌal u kuBꞌaal Cristo Jesuus: nikoꞌxh u kamchil; nikoꞌxh u vatz kuqꞌii kusaj; nikoꞌxh qꞌu aanjel; nikoꞌxh tioxhil txꞌiꞌliꞌinaj; nikoꞌxh aanxel tetz kam; nikoꞌxh qꞌu kam tu u tiempo cheel tzaꞌ utz; nikoꞌxh qꞌu kam qꞌuꞌl tuleꞌ; nikoꞌxh qꞌu kam tzian jeꞌnaj utz; nikoꞌxh qꞌu kam tzian koꞌp utz; nikoꞌxh maꞌj tu qꞌu kam ibꞌanoꞌm u Tioxh.

Tan aꞌ lochol qetz u Tioxhla Espiiritu tiꞌ qꞌu kam qꞌuꞌl yeꞌ niqoleꞌ tiꞌ. Tan yeꞌ nikutxꞌol ijajax sukujunal. Echaꞌ tziꞌ aas sakujaj maꞌj kam tu u Tioxh tu kuqꞌilat kusikꞌletaꞌ, yeꞌ qootzaj kam chit ech ijajleꞌ. Pek nitoksa tibꞌ u Tioxhla Espiiritu qiꞌ. Niꞌxhijelun qiꞌ vatz Tioxh; saꞌkojtxꞌolax talax vaꞌl niꞌan qiꞌ.

Ech ¿kam bꞌoj saqal tiꞌ u kam tziꞌ? Aꞌ saqaleꞌ aas untzꞌoj atil u Tioxh qiꞌ, yeꞌxhabꞌil koꞌxh tech qiꞌ. Tan aꞌ kumol Tioxh.

Uncheeꞌ aatz cheel, yeꞌkan saꞌalax ikuꞌ u choobꞌal paav tiꞌ qꞌu aanima qꞌuꞌl okyu tiꞌ u Cristo Jesuus. Ayaꞌ qꞌuꞌl yeꞌxhkam niꞌan qꞌu tachaꞌv u chiꞌl. Pek aꞌ niꞌan qꞌu kam isaꞌ u Tioxhla Espiiritu.

Ech oj txoxeloꞌ tiꞌ ibꞌanax qꞌu kam qꞌuꞌl isaꞌ u Tioxhla Espiiritu, aꞌ kukanaal u tiichajil tu bꞌenqꞌii bꞌensaj utz, tuchꞌ u paas. Pek oj aꞌ txoxeloꞌ tiꞌ ibꞌanax qꞌu kam isaꞌ u kuchiꞌl, aꞌ iyaꞌebꞌal u kamchil vatz Tioxh.

Loqꞌ kꞌuxh ech qꞌu tzaꞌl tziꞌ, bꞌaꞌn saelkꞌoꞌ. Tan aatz oꞌ, tiqꞌaqꞌal u Jesucristo vaꞌl niꞌan tii qiꞌ. Kaana kubꞌantu kanaal, paalchu vatz qꞌu aa kanaal tu u vatz amlika txꞌavaꞌ tzaꞌ.

Ech nival sete, aas yeꞌ koꞌxh qeonex tu qꞌu tzaꞌl nipaalkꞌoꞌ tu u tiempo tzaꞌ. Tan pitzꞌkin kuꞌen atziꞌ. Pek aꞌ tiira techal u mam bꞌaꞌnil sataqꞌvoꞌ u Tioxh toj iꞌaneꞌ.

Echixeꞌat yeꞌxhkam koꞌxh saꞌeesanoꞌ tu u kutzꞌejtu qaanima tiꞌ u Cristo. Nikoꞌxh qꞌu il tzaꞌl; nikoꞌxh qꞌu kꞌaxkꞌo; nikoꞌxh qꞌu chiꞌkꞌulan qetz; nikoꞌxh u meꞌbꞌaꞌil tiꞌ echbꞌubꞌal, tiꞌ oksaꞌm; nikoꞌxh qꞌu xoꞌebꞌalla chaj kam. Utz nikoꞌxh u kamchil.

Pek aꞌ ootzajin tetz u Tioxh vaꞌl nipichꞌun taanima qꞌu aanima. Utz aꞌ ootzajin tetz kam vaꞌl nijaj u Tioxhla Espiiritu te qiꞌ. Tan nitoksa tibꞌ u Tioxhla Espiiritu tiꞌ qꞌu niman tetz u Jesuus, tiꞌ ijajax tu u Tioxh kam nisavsa. Tan aꞌ ootzajin tetz vitxumbꞌal u Tioxh.

Tan aꞌ ikꞌaol imeꞌal Tioxh qꞌu aanima qꞌuꞌl ninima kam nital u Tioxhla Espiiritu te.

Tan aatz qꞌu aanima qꞌuꞌl bꞌanol tetz tachaꞌv vichiꞌl, taꞌxh nititzꞌa ibꞌanax bꞌenamen qꞌu tachaꞌv. Pek aatz qꞌuꞌl atil kꞌatz u Tioxhla Espiiritu, aꞌ niꞌan qꞌu kam qꞌuꞌl isaꞌ u Tioxhla Espiiritu.

Tan aal yeꞌt imaj tibꞌ u Tioxh tiꞌ taqꞌax viKꞌaol tu kamchil qiꞌ. Ech oj taqꞌ viKꞌaol qiꞌ, ¿oj chixh yeꞌ sataqꞌ kajay tereꞌn bꞌaꞌnla chaj oya qe?

Tan u Tioxhla Espiiritu atkoꞌxh ninachpixsan tu u qaanxelal aas nojchit oꞌ ikꞌaol imeꞌal Tioxh. Ech ela tek saetzanoꞌ tuchꞌ u Cristo tiꞌ qꞌu kam xeꞌ Tioxh. Tan bꞌennajtekꞌoꞌ sikꞌaol Tioxh. Taꞌxhtzii oj nikuqꞌiꞌ qꞌu tzaꞌl echaꞌ qꞌuꞌl paalku u Jesuus. Ech soꞌokꞌoꞌ kꞌatza tu vitechalil tu Amlika.

Tan aatz qꞌu tachaꞌv u chiꞌl, koontraibꞌ tuchꞌ Tioxh. Tan nikojinima viyolbꞌal u Tioxh. Utz saꞌkojoleꞌi sinima majte.

Tan aal antu kajay qꞌu kam qꞌuꞌl icheesa u Tioxh tu u vatz amlika txꞌavaꞌ tzaꞌ nichꞌianeꞌ, vaꞌl ichꞌiataꞌ aas sikꞌuch qꞌul ikꞌaol imeꞌal u Tioxh aas jalpixsamal tek tu vitechalil u Tioxh.

Tan qootzajle aas niꞌxhijelun qꞌu kam bꞌanel tu u Tioxh tu u vatz amlika txꞌavaꞌ cheel. Kaana tzaꞌl kꞌaxkꞌo nipaalka. Techal tok tu peena, echaꞌ ichiꞌon maꞌl ixoj aas saꞌtekatin titzꞌin.