If you have would like a copy of this version please contact info@davarpartners.org

Text: Kayort New Testament, CC-BY-SA-4.0, The Love Fellowship. -- Audio: Kayort New Testament Audio Bible, CC-BY-SA-4.0, Davar Partners International, The Love Fellowship, 2022

Kayort New Testament

Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.

येशू ख्रीष्ट अब्राहम आर दाऊद राजाके सन्तान रहै। येशू ख्रीष्टके बाप-पुर्खाके नामके सूची यी छै: अब्राहमके बेटा इसहाक रहै। इसहाकके बेटा याकूब रहै, याकूबके बेटासब यहूदा आर ओकर भ्यासब रहै। यहूदाके बेटासब फारेस आर जाहेर रहै। ओकरसिके मयाँ तामार रहै। फारेसके बेटा हेस्रोन रहै, हेस्रोनके बेटा अराम रहै। अरामके बेटा अम्मिनादाब रहै, अम्मिनादाबके बेटा नहशोन रहै, नहशोनके बेटा सल्मोन रहै। सल्मोनके बेटा बोअज रहै। बोअजके मयाँ राहाब रहै। बोअजके बेटा ओबेद रहै। ओबेदके मयाँ रुथ रहै। (रुथ आर राहाब यहूदी जनानीमे से नैरहै) ओबेदके बेटा यिशै रहै। यिशैके बेटा दाऊद राजा रहै। दाऊद राजाके बेटा सुलेमान रहै। सुलेमानके मयाँ दाऊद राजासे बिहा करैसे पहेला उरियाहके पतनी रहै। सुलेमानके बेटा रहबाम रहै, रहबामके बेटा अबिया रहै, अबियाके बेटा आसा रहै। आसाके बेटा यहोशापात रहै, यहोशापातके बेटा यहोराम रहै, यहोरामके बेटा उज्जियाह रहै। उज्जियाहके बेटा योताम रहै, योतामके बेटा आहाज रहै, आहाजके बेटा हिजिकिया रहै। हिजिकियाके बेटा मनश्शे रहै, मनश्शेके बेटा अमोन रहै, अमोनके बेटा योशियाह रहै। योशियाहके पोतासब यकोनियस आर ओकर भ्यासब रहै। ऊसब बेबिलोन देशमे यहूदी आदमीसिके बन्दी बन्याके लजाबैसे पहेला जनमलै रहे। बेबिलोन देशमे बन्दी बन्याके लजैलसे येशूके जनमतक येशूके पुर्खासिके नामके सूची यीसब रहै: यकोनियसके बेटा शाल्तिएल रहै, शाल्तिएलके बेटा यरुबाबेल रहै। यरुबाबेलके बेटा अबिउद रहै, अबिउदके बेटा एल्याकिम रहै, एल्याकिमके बेटा आजोर रहै। आजोरके बेटा सादोक रहै, सादोकके बेटा आखिम रहै, आखिमके बेटा एलिउद रहै। एलिउदके बेटा एलाजार रहै, एलाजारके बेटा मतान रहै, मतानके बेटा याकूब रहै। याकूबके बेटा उहे योसेफ रहै, योसेफके पतनी मरियम रहै। मरियम येशूके मयाँ रहै, जकरा ख्रीष्ट कहैछै। एरंके अब्राहमसे दाऊद राजातक चौदह पुस्ता भेलै। दाऊद राजाके समयसे इस्राएलीसब बेबिलोन देशमे कैदी बन्याके लजैल समयसे पहेला ओत्ते चौदह पुस्ता रहै। आर इस्राएलीसब बेबिलोन देशमे कैदी बन्याके लजैल समयसे ख्रीष्टके समयतक चौदह पुस्ता भेलै।


येशू ख्रीष्टके जनम हुऐसे पहेला एरं भेलै: ओकर मयाँ, मरियमके मगनी योसेफके संगे भेलै रहे, मगर ओकरसिके बिहा हुऐसे पहलहैसे मरियम पवित्र आत्माके शक्तिसे गर्भवती भेलै रहे। ओकर हुएवाला पति, योसेफ, भला आदमी रहै आर मरियमके सार्वजनिक रुपसे बेज्जत नैकरे चाहैके कारणसे चुपचाप ओकरसे मगनी तोडैके निर्णय कैल्कै (कहिनेकी ऊ बिहाके पहलहैसे गर्भवती भेलै रहे जे धरमशास्त्रके विरुद्धमे रहै)। मगर ऊ जब यी बातसब विचार कर्ते रहै, तब ओकर सपनामे परमेश्वरके स्वर्गदूत देखा पड्लै आर ओकरा एरं कहैल्कै, “योसेफ, दाऊद राजाके वंश, मरियमके पतनी बनाबैले नैडर, कहिनेकी पवित्र आत्माके शक्तिके द्वारा ही ऊ गर्भवती भेलै छे। ऊ एकटा बच्चा जनमैतौ आर तुहें ओकर नाम येशू राखिहैं, कहिनेकी ऊ आपन आदमीसिके ओकरसिके पापसे बचैतै।” परमेश्वरके वक्ता यशैयाके द्वारा येशू ख्रीष्टके जनमके विषयमे कहेल परमप्रभुके वचन पुरा हुऐले यीसब भेलै छे। यशैया एरंके लिखल्कै छे:
“देख्, एकटा कुमारी लडकी गर्भधारण कर्तै,
आर ऊ एकटा बच्चाके जनम देतै,
आर ओकर नाम इम्मानुएल राख्ल जैतै,
जकर मतलब छै, ‘परमेश्वर हमरसिके संगे छै।’ ”
योसेफ निनसे जाग्लै, आर स्वर्गदूतके कहेल जुगुर ऊ मरियमके बिहा करिके आपन घर ल्याके ऐलै। जबतक मरियम बच्चा नैजन्मैल्कै तबतक ऊसब कोनो किसिमके वैवाहिक सम्बन्ध नैराखल्कै। योसेफ बच्चाके नाम येशू राखल्कै।

Makinig sa मत्ती 1