Manobo, Western Bukidnon - 2001 Edition (NT) Drama

Manobo, Western Bukidnon - 2001 Edition (NT)

Ne zutun he andew mid-awà si Jesus diyà te valey, ne midhendiyà te ranew ne mibpinuu ziyà te veyvey zutun. Ne zuen mezakel he menge etew he midtig̵um diyà te kandin. Ne g̵eina te utew zan mezakel, mid-untud si Jesus te avang ne zutun mebpinuu. Ne is menge etew, diyè dan dà te veyvey is ebpememineg kandin. Ne zutun mezakel is impenurù din kandan pinaag̵i te menge sempità.
Ke sikandin te, “Duen etew he midhendiyà te pemuleey zin su ebpemula. Ne zutun te kebpemula zin duen benì he nengeulug diyà te zalan, ne heini migkaan te menge tagbis. Ne zuen daan benì he nengeulug ne nemekeuntud diyà te menge vatu he utew zà menipis is tanà he nekeapid dutun te menge vatu. Ne haazà petuluy zà midtuvù su menipis haazà is tanà. Asal hein mid-andew, neg̵angu petuluy haazà is menge pinemula su mevavew zà is nesenevan te zalid dan. Ne zuen daan benì he nengeulug diyà te tanà he menge zug̵iyen is menge sagbet dutun. Ne mibmemelayat heini is sagbet ne mibpengulembezan dan haazà is pinemula. Ne zuen daan benì he ziyà mengeulug te meupiya he tanà ne nemeg̵as mulà heini. Duen dutun menge pinemula he mibeg̵as te tigketluan. Ne zuen daan dutun menge pinemula he mibeg̵as te tigkeneman. Ne zuen daan dutun pinemula he mibeg̵as te tignenggatus.” Ne mid-uman megkag̵i si Jesus te, “Sevuta niw heini is nezineg niw.”


Ne mid-uvayan si Jesus te menge sumusundan din, ke sikandan te, “Hengkey is ketezengan ke maan is migamit ka te menge sempità dutun te kebpenurù nu te menge etew?” Ne midtavak kandan si Jesus te, “Sikan is in-eles dengan mehitenged te kedhadì te Megbevayà, impesavut en keniyu te menge sumusundan ku, iyan, is duma he menge etew, id-eles heini kandan. Su is etew he neketuu wey zuen kedsavut din, ed-umanan pa te Megbevayà te kedsavut su wey mehustu is kedsavut din. Iyan, sikan is kenà edtuu, id-awà te Megbevayà diyà te kandin sikan is deisey he nesavut din. Umba ebpenurù a kandan pinaag̵i te menge sempità. Su edtengteng dan, iyan, kenè dan ebpekeahà, he ke và dà egkeg̵iya, ebpemineg dan, iyan, henduen be te wazè dan mekezineg su kenè dan edsevuten. Netuman en diyà te kandan kes insurat ni Esaias he migkag̵i te Megbevayà su ke sikandin te,
‘Ebpurung dan ebpemineg, iyan,
kenè dan ebpekesavut.
Ebpurung dan edtengteng,
iyan kenè dan ebpekeahà.
Su heini he menge etew,
midmezesen is isip dan.
Edsebpengen dan is telinga zan,
edlipezengen dan is menge mata zan.
Su emun kenà,
ebpekeehè dan
ne ebpekezineg dan,
ne egkesavut dan
is hustu ne edsarig dan
kedì ne edlibriyen ku sikandan.’ ”
Ne mid-uman megkag̵i si Jesus te, “Iyan, sikiyu mulà, dekelà utew is kelipey niw su metau kew ed-ahà wey metau kew ebpemineg. Isipa niw heini he zengan mezakel is ebpeneuven wey menge tumutuu te Megbevayà he egkesuat pezem he meehè dan heini is egkeehè niw wey mezineg dan heini is egkezineg niw en, iyan, wazà itug̵ut kandan.”


Ne mid-uman megkag̵i si Jesus te, “Pemineg kew wey niw mesavut is kehulug̵an kayi te sempità te keag̵i te etew he ebpemula. Ke zuen menge etew he egkezineg dan is lalag mehitenged te kedhadì te Megbevayà, iyan, kenè dan edsevuten, ne iring haazà te venì he ziyà mengeulug te zalan. Edlepew si Setanas ne ed-eg̵awen din haazà is lalag he nezineg dan. Ne is benì he ziyà mengeulug te menipis he tanà he zivavew te vatu, ne iyan is Lalag te Megbevayà he is nemekezineg duen, ne utew zan egkesuati te ebpemineg. Iyan, kenà egkeheg̵et is kedtuu zan ne kenà egkeug̵et ke egkeumahan sikandan te samuk wey ke kemeresayan be tenged te kedewata zan te Lalag te Megbevayà, edlikù dan diyà te zaan he ulaula zan. Ne sikan is benì he ziyà mengeulug te tanà he zug̵iyen is menge sagbet dutun, iyan is Lalag te Megbevayà he iyan nemekezineg duen is menge etew he ebpemineg, iyan, egkelipatan dan tenged te menge seeng dan kayi te kelibutan wey tenged te kegkesuat dan te selapì. Ne tenged kayi is Lalag te Megbevayà, kenà ebpulus diyà te kandan. Ne sikan is benì he ziyà mengeulug te meupiya he tanà, ne iyan is Lalag te Megbevayà he is nemekezineg duen, nesavut dan, ne ebpulus diyà te kandan. Is duma, ne ebpulus te zeisek diyà te kandan; ne is duma, ne ebpulus te malù dekelà; ne is duma, ebpulus te utew zekelà diyà te kandan.”

Ne impenurù daan ni Jesus is selakew pa maan he sempità. Ke sikandin te, “Is kedhadì te Megbevayà, ne iring te etew he zuen impemula zin he meupiya he pinemula ziyà te pemuleey zin. Ne sengekezukileman dutun te nekelipezeng sikandin, nekeuma is kuntada zin ne midsewezan dutun te kuntada zin haazà is pemuleey zin te menge veg̵as te mezaat he pinemula ne human med-ulì. Ne hein midtuvù haazà is meupiya he pinemula, midtuvù daan haazà is mezaat he pinemula. Ne zutun, is menge sulug̵uen dutun te etew, midhendiyè dan te kandin ne ke sikandan te, ‘Datù, iyan tew impemula ziyà te pemuleey nu is meupiya he pinemula, ne hendei vuwa ebpuun heini is memezaat he pinemula?’ Ne midtavak haazà is etew te, ‘Iyan mibpemula zuen sikan is kuntada ku.’ Ne ke sikandan te, ‘Ebpemezuten dey ve wey ke kenà?’ Ne ke sikandin te, ‘Kenè niw zè pa, su kela ke mekeragkes sikan is memeupiya. Ebpesegdanen tew zè pa taman te egkeuma is tirag̵un, ne human ku ibpepemazut te ebpemenlegtey is memezaat he pinemula, ne ibpepemagkes ku kandan su ebinsulan. Ne is memeupiya he pinemula, ibpezerengdeng ku mulà is beg̵as dan.’ ”


Ne impenurù en maan ni Jesus is selakew pa he sempità. “Is ked-iseg kebmahabet te edhedian te Megbevayà,” ke sikandin, “ne iring te pinemula he utew zeisek is lisu. Ibpemula heini te etew ziyà te pemuleey zin ne ke edtuvù ne edekelà, egkehimu he iyan utew zekelà te langun he menge pinemula he edlumbayen. Iring kezekelà te kayu ne egkeletunan te menge tagbis ne egkeseselag̵an dan is menge subpang dutun.”
Ne impenurù ni Jesus kandan is selakew pa maan he sempità. Ke sikandin te, “Is kebmezakel te edhedian te Megbevayà, ne iring daan te tapey. Su ke zuen bahi he ebaal te supas egkuwaan din is tapey ne idsahug din te sengebisin he erina. Ne edtulin haazà is erina,” ke si Jesus.
Ne heini is langun, ne impenurù ni Jesus diyà te mezakel he menge etew pinaag̵i te menge sempità. Minsan hengkey he impenurù din kandan, ne pinaag̵i te sempità. Umba neveelan din heini su egketuman kes netagnà dengan te ebpeneuven te Megbevayà he edhenduen te,
“Ibpenurù ku kandan is menge sempità.
Ibpenudtul ku kandan is in-eles dengan
puun pa te kedlimbag̵a te kelibutan
taman en guntaan.”

Ne zutun mid-ewaan ni Jesus haazà is mezakel he menge etew ne midseled sikandin diyà te valey. Ne is menge sumusundan din, midtelukun dan kandin, ne ke sikandan te, “Luwasa nu kenami ke hengkey is kehulug̵an te menge mezaat he pinemula ziyà te kamet he zuen te sempitè nu.” Ne midtavak si Jesus te, “Siak is Kakey te Menusiyà, iyan a sikan is etew he ebpemula te meupiya he pinemula. Haazà is pemuleey, ne iyan heini is kelibutan; ne haazà is menge meupiya he pinemula, ne iyan heini is menge etew he ebpahadì te Megbevayà; ne sikan is menge mezaat he pinemula, ne iyan is menge sakup ni Setanas. Ne sikan is kuntada te etew, ne iyan en si Setanas. Ne is tirag̵un, iyan is ketepusan he timpu; ne sikan is ebpemenlegtey, iyan is menge velinsug̵uen te Megbevayà. Ne haazà is ebezuten dan he menge mezaat he pinemula he ebinsulan dan, iyan haazà egkehitavù keuzemà te ketepusan he timpu, su siak is Kakey te Menusiyà, edsug̵uen ku is menge velinsug̵uen ku ne id-awè dan puun te g̵inhedian ku is ebpemenuley wey is ebpemen-ulaula te mezaat. Ne zutun idtimbag sikandan diyà te hapuy ne zutun ebpemekekulahì dan ne ebpemekengingitel zan tenged te utew zan ebpemekedsendit. Ne zutun, is menge metazeng mulà, iring te andew is anlag dan diyà te g̵inhedian te Amey zan he Megbevayà. Sevuta niw heini is nezineg niw.
Is kedhadì te Megbevayà ne iring daan te vulawan he inggadung diyà te pemuleey. Duen etew he neketuredu zutun ne midtembunan din umani he utew sikandin nelipey ne mid-ulì ne imbelegyè din is langun he menge azen din ne midlikù dutun ne mibpemasa zin haazà is pemuleey.
Is kedhadì te Megbevayà, ne iring daan te etew he ebpemasa te menge utew meupiya he mahal he ebelieg̵en he egngezanan te perlas. Ne ke egkeehè din is sevaha he perlas he utew pa mahal, ibelegyè din is langun he azen din ne ebpemesahan din haazà.
Ne is kedhadì te Megbevayà he ziyà te langit, ne iring te laya he intaan diyà te ranew wey mekeutel te minsan hengkey he kelasi te pait. Ne emun mezakel en he menge pait is ebpekeahuk dutun, eguyuzen te menge etew haazà diyà te g̵eunan. Ne ebpinuu zan su ed-eramen dan is memeupiya zutun te pait ne id-ahuk dan diyà te menge ambung. Ne is kenà meupiya, idtimbag dan. Ne keuzemà te ketepusan he timpu, iring kayi is egkeulaula su ebpenhipanew is menge velinsug̵uen te Megbevayà ne edtepizen dan is menge lalung wey menge metazeng he etew. Ne is menge lalung, idtimbag dan diyà te hapuy. Ne sikan is menge lalung, ne ebpekekulahì dan wey ebpemekengingitel tenged te utew zan ebpemekedsendit.”
Ne mid-insaan ni Jesus is menge sumusundan din te, “Egkesavut niw ve heini is egkeg̵iyen ku?” “Uya, Datù, egkesavut dey,” ke sikandan. Ne mid-uman megkag̵i si Jesus te, “Ne tenged kayi,” ke sikandin, “ke zuen menunudlù te kesug̵uan he nekesundan te hadì tew he Megbevayà, ebpekeiring sikandin te etew he zekelà is ketig̵eyunan din diyà te valey zin. Su kenà iyan dà igkepenurù din is kinezaan, kekenà, igkepenurù din daan is beg̵u.”


Ne hein nepasad ni Jesus haazà is kebpenurua zin kandan kayi te menge sempità, mid-awà sikandin dutun ne mid-ulì diyà te inged din. Ne ziyà te simbahan mibpenurù din is menge etew zutun. Nengeinuinu is menge etew he mibpemineg kandin. Ke sikandan te, “Hentei vuwa is nekepenurù kandin? Maan is metau sikandin ebaal te menge egkein-inuwan? Anak dà sikandin te pandey. Ne si Maria is iney zin; ne menge hazi zin, ensi Santiago, si Jose, si Simon, wey si Hudas. Ne is menge etevey zin, ne zini zaan sikandan ebpen-ubpà. Maan is metau sikandin wey maan is ebpekehimu sikandin te egkengein-inuwan he iring kayi?” Ne tenged kayi wazè dan medtuu kandin. Ne zutun migkag̵i sikandin diyà te kandan te, “Is ebpeneuven te Megbevayà, kenà sikandin edtehuzen te menge etew ziyà te keugelingen din he inged; iyan, diyà te menge zuma he inged edtehuzen mulà sikandin,” ke si Jesus. Umba kenà mezakel is impeehè din dutun he egkein-inuwan su wazè dan kedtuu kandin.

Makinig sa Mateo 13