Yakuq 2
2
Myòqdong A Hkyin Lhum Râ Hkyô
1Ngá é gu-mang wuì ê, hpungwup shingkang bo é ngá-nhûng é Yhûmsîng Yesuq Hkrisidùq lé lùmjíng hkyô má, byu é myòqdong lé hkâhkyin lhum kó. 2Dangké, hîng lòqtsung tsung luî, réng é mèbu wùt é sû rayùq eq ajèq a-myha é mèbu wùt é asho awuî é sû rayùq gi, núngmòq é târâjong má wang lò kô é nghut le, 3haû réng é mèbu wùt é sû lé, núngmòq lhom wú mù je hkúnggâ é èq, “Shî xânghpoq nge wó é jowò má zùng aq.” dum, haû asho awuî é sû lé nghut jáng gi, “Mhó má yàp to aq.” haû su a nghut jáng, “Ngá é hkyî htâng má zùng aq.” ga taí kô é nghut le gi, 4núngmòq rayùq eq rayùq gamhkuî lhum luî, a ge é i‑myìt èq dòqdân é bang dùt lò bekô a nghut kó lhú?
5Ngò chyitdàp é gu-mang wuì ê, gyô yù keq, lùmjíng hkyô má wó sùt nyì luî, gidìq tô tô é mîngdán é silî wunlî lé, Yhang lé chyitdàp bang wó hkam yù sháng gàq ga, Garai Gasang gi, myigùng htoq mâ é asho awuî é bang lé hkyin yù bê a nghut kó lhú? 6Núngmòq kúm gi, asho awuî é sû lé a hpau a yùm kut pyám bekô nhung; wó bang sùt bang kúm gi, núngmòq lé zìk zo mù luî, yhûmsing é lòq èq yhang, târâ jihpûng shut she hkyut ló bekô, a nghut kó lhú? 7Núngmòq eq sêng é kô dik é myìng lé lháng, yhángmòq yhang rhoî dang taî bum akô, a nghut kó lhú?
8Haû mù luî, Chyúmdang má, “Náng gûng lé nàng chyitdàp é su, náng é chyáng nâm mâ é bang lé le chyitdàp àq.”#Nhông 19:18 ga luî, taî tô é hkóhkam târâ lé, núngmòq tsuq za châng é nghut le gi, núngmòq ge é hkyô lé kut nyî bê. 9Nghut kôlhang, byu é myòqdong lé núngmòq hkyin nyì kô é nghut le gi, núngmòq mara kut nyî gû nghut bê yánmai, haû târâ lé shut é bang lé su târâ jéyáng é huî nyì bekô râ nghut lhê. 10Byù ó yùq nghut le le târâ bànshoq lé cháng kôlhang, haú mâ é rahkat hkat lé shut pyám jáng gi, târâ bànshoq lé shut pyám sû dùt byùq râ nghut lhê. 11Hkâsu mù gâ le, “Su-myi sulàng hkâlú.”#Htoq Ló 20:14 ga luî, hkang tô é sû gi, “Byù lé hkâsat.”#Htoq Ló 20:13 ga luî le, taî tô ashî. Nàng su-myi sulàng a lú kôlhang, byù sat é sû nghut le gi, târâ lé shut é sû nghut bê.
12Haû su mù luî, núngmòq lé lhoqlhut kat é târâ dông jéyáng dòqdân é hui râ bang su, ru taî nyì keq; ru châng kut nyî keq. 13Hkâsu mù gâ le, shogyo myìt a bò sû gi, a shogyô é dông jéyáng dòqdân é hui râ nghut lhê. Shogyo nhikmyîn é hkyô kúm gi, jéyáng dòqdân é hkyô lé wó ông lùt râ nghut lhê.
Lùmjíng Myìt Eq Zui Saî É Hkyô
14Ngá gu-mang wuì ê, byù rayùq yùq, “Ngò gi, lùmjíng myìt bo lhê.” ga taî nyì kôlhang, múzó a bo lom é nghut le gi, haî a-kyû bò râ lhú? Lùmjíng myìt haû gi, yhang lé wó hkyi yù râ lhú? 15Gu-mang, gu-nhá rayùq yùq a chîn dùt nyi é eq nyí wui é zoshuq langhpyùt tô é nghut le, 16núngmòq chyáng mâ é rayùq yùq gi, yhángmòq é gùngsho má râ é hkyô haî le a byî é za, yhángmòq lé, “Núngmòq wùt é gùng lúm sháng gàq, zô é ûng gyi sháng gàq, nguì nguì ngón ngón ló keq.” ga taî é nghut le gi, hai a-kyû bò kôrâ lhú? 17Haû eq rajung za, lùmjíng myìt má múzó a bo é nghut le gi, shi é eq rajung za nghut nyi ri.
18Dum rahkyô gi, “Nàng gi, lùmjíng myìt bo ri; ngò gi, múzó bo lhê. Múzó a bo é náng é lùmjíng myìt ngo lé tûn shit wú aq; haú hkûn, ngá múzó èq ngá é lùmjíng myìt lé, nang lé ngò tûn shit râ nghut lhê.” ga luî, rayùq yùq taí râ nghut lhê. 19Garai Gasang rayùq za nghut é lé nàng lùmjíng rî-nhung! Nghut bê, haû gi, jô é hkyô nghut nyi ri; nàt gâng pé le haû su yhang lùmjíng mù gyùq nán nyi akô nghut ri.
20Kyoq a bo é byù bam ê, lùmjíng myìt má múzó a bo le akôm za nghut é hkyô lé, nàng sé nau lhê a nghut lhú? 21Ngá-nhûng é Îwa Abraham gi, hkungga gyàp htoq má yhang zo Isak lé shigu hkungga kut é hkûn lé, zui saî é múzó mai díngmán é sû gâ é lé wó yû bê a nghut lhú? 22Haû mù luî, yhâng é lùmjíng myìt gi, yhâng é múzó eq rahá za e ló é yánmai, lùmjíng myìt gi, jùp byíng lo é lé, nàng wó myâng bê nghut ri. 23Haû su mù, “Abraham gi, Garai Gasang lé lùmjíng bê nghut mù, yhang lé díngmán sû ga són byi bê nghut ri.”#A-pûn 15:6 ga luî, kâ tô é Chyúmdang gi, dik to bê. Dum, yhang lé Garai Gasâng é buìnùm hpó ga luî le myhíng byi bê. 24Haû mù luî, byù gi, lùmjíng é myìt èq baú za a nghut, zui saî é múzó èq mara hkyut san byi huî é lé, núngmòq bûn sê nyi akô.
25Haû eq rajung za, Rahap gâ é shiwa myhí gi, jówú su nhik lé lhom te yù mù luî, hkyô góhkat dông nhang kat pyâm é hkûn le, yhang zui saî é múzó mai díngmán é sû gâ é wó yû bê a nghut lhú? 26Haû su mù, gùngdu má sô a bo le gi, shi é eq rajung za, haû lùmjíng myìt má múzó jizó a bo le gi, shî gû nghut bê nghut ri.
ที่ได้เลือกล่าสุด:
Yakuq 2: znot
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2025, Wycliffe Bible Translators, Inc.