Zakaliya 6
6
Malola ga msheshi ga mbutuka za kukwegwa na farasi
1Moniti malola gamonga kayi. Mwanja agu moniti mbutuka za msheshi za farasi pazilawa pakatikati pa migongu miwili ya shaba. 2Mbutuka ya kwanja ikwegwitwi na farasi msheri na ya pili ikwegwitwi na farasi mtitu, 3mbutuka ya tatu ikwegwitwi na farasi mwelu na ya msheshi ikwegwitwi na farasi gwa shilivu. 4Shakapanu nimkosiyiti ntumintumi gwa kumpindi ulii yakayoweriti na neni, “Mtuwa Mlungu yakana makakala goseri, mbutuka azi za farasi zyana mana gaa?”
5Ntumintumi gwa Kumpindi ulii kanankula, “Azi ndo rohu za msheshi za kumpindi zazigoloka kulongolu kwa Mtuwa Mlungu gwa isi yoseri na za nkulawa kugenda kutenda lihengu lyakuyi.”
6Mbutuka yayikwegwa na farasi watitu igenda muisi ya kushana, ilii yayikwegwa na farasi mweru igenda kwaguzyetera mshenji na ya farasi washilivulivu igenda kusika. 7Farasi awa pawalawiriti waweriti na hamu ya kugenda kuyilola isi. Malaika kawagambira, “Mgendi mwakayiloliloli isi!” Su wagenditi na kuyilolalola isi. 8Shakapanu ntumintumi gwa kumpindi ulii kayoweriti na neni kang'ambiriti kwa liziwu, “Guloli! Farasi yawagenditi isi ya kushana wanyamaziya maya ga Mtuwa Mlungu.”
Yoshuwa kankulumikwa
9Mtuwa Mlungu kayoweriti na neni pakalonga. 10Gutoli feza na zahabu kulawa kwa wantu yawahamisiwitwi, weni ndo Helidayi na Tobia na Yedaya weni wasoka kulawa Babeli. Lishaka liraa ali gugendi ukaya kwa Yosiya mwana gwa Sefaniya. 11Hagutoli madini ga feza na zahabu ayi, gunyawa lijenjeri lyeni haguvalasiyi mtambika mkulu Yoshuwa mwana gwa Yohosadaki. 12“Gumgambiri hangu, ali ndo lakatakula Mtuwa Mlungu gwa Mashonta, ayu ndo muntu yawamshema Lutambi na yomberi hakaweri na lutomoleru kulawa pahala pakuyi na kunyawa Numba Nkulu Nanagala ya Mlungu. 13Yomberi ndo yanakanyawi Numba ya Mlungu na hakapananwi ligoya lya shifalumi na kulikala mushiti shakuyi sha ukulu kukolamlima wantu wakuyi. Pakwegera na shiti sha ukulu sha mkolamlima ayu, hakalikali mtambika mkulu na woseri wawili hawatendi lihengu pamuhera kwa ponga.” 14Lijenjeri ali halitulwi munumba ya Mlungu kwa ligoya lya Helidayi na Tobia na Yosiya mwana gwa Sefania.
15Wantu yawalikala isi za kutali hawizi na kutanga kunyawa numba ya Mlungu. Na mwenga hamvimani handa Mtuwa Mlungu gwa mashonta ndo yakandagaliriti kwamwenga. Aga hagalawiri pamumjimira Mtuwa Mlungu gwenu.
The Bible version in the Pogoro Language. @The Word for The World International and Pogoro Language translation. All rights reserved.