Mika 4
4
Mtuwa Mlungu ndo mkolamlima gwa ponga
Isaya 2:2-4
1Mumashaka ga upeleru
Numba ya Mlungu yayiwera kulugongu halunyasulwi
na kuwera mtali kuliku migongu yoseri,
halugolosiwi pampindi pa vigongu
na wantu wa maisi hawalugenderi,
2wantu wa maisi hawizi na kutakula,
tugendeni kulugongu lya Mtuwa Mlungu,
tugendeni munumba ya Mlungu gwa Israeli,
su katufundi njira zakuyi,
na twenga tufati lagilu zakuyi.
Mana lagira hayilawi Sayuni na
shisoweru sha Mtuwa Mlungu aku Yerusalemu.
3Mlungu hakatozi pakati pa maisi gavuwa,
hakamuwi ndewi za maisi yagana makakala na ga kutali
nawomberi hawakuwi magumba gawu kuwera magembi,
na mikuki yawu kuwera hengu za kudumlira ntambi.
Isi hapeni ilikomi na isi yimonga,
pota hapeni walifundi kayi nkondu.
4Kila muntu hakalikali kwa ponga
pakati pa mitini na mizabibu yakuyi,
na kwahera muntu yanakawatiliziyi.
Mana Mtuwa Mlungu Yakana Makakala goseri katakula.
5Maisi gamonga gaguwira wamlungu wawu, kumbiti twenga tukuguwira na kukujimira gwenga Mlungu gwetu mashaka goseri.
Waisraeli hawawuyi kulawa muhamisiwu
6“Mtuwa Mlungu kalonga, lishaka lyankwiza, haniwajojoniri vibyeketu na yawaweriti muuhamisiwu, wantu walii weni niwakomangiti.” 7Vibyeketu awa ndo yanawasigali wakomu na walii yawatolwitwi muhamisiwu hawaweri isi yana makakala. Naneni Mtuwa Mlungu haniwakolimlima kulugongu lya Sayuni, kwanjira shaka ashi na mashaka goseri.
8Gwenga lugongu lwa Yerusalemu, gwee liboma lya Sayuni, mweni Mlungu katenda ulolera wa wantu wakuyi, handa muntu yakalolera kondolu wakuyi, gwenga haguweri kayi gumanika handa makashu na Yerusalemu hagukolimlima kayi. 9Hashi mwankulira kwa kubota? Toziya, mwahera mfalumi kayi? Mgambiziya gweni kawuka? Ntambugaa mlira kwa hinginiku, handa mawu yakiwula mwana? 10Mwenga wantu wa Yerusalemu, mliri na kugalagata kwa utama handa mawu yakiwula mwana. Toziya vinu hamuwuki mumji agu hamlikali mushiwala, hamugendi mpaka Babeli. Kumbiti Mtuwa Mlungu hakawakomboli mumakakala ga wankondu wenu. 11Maisi gamonga gajojonika kukukomanga. Pawalonga, mleki Yerusalemu guhalibisiwi na twenga tuwoni mahami ga mji agu! 12Kumbiti womberi wavimanandiri maholu ga Mtuwa Mlungu, pota werewa ndiri mpangu gwakuyi. Kuwera kawajojonira pamuhera, handa ng'anda pahala pa kukomera viboga.
13Mtuwa Mlungu kalonga, mwenga wantu wa Yerusalemu, mugoloki mwakawakomangi wankondu wenu! Haniwapanani makakala handa pongu yakana magoli ga shuma na ntimbangu za shaba. Haguwamegangi vipandi vipandi wantu wa maisi gamonga na lunda yagupatiti kwa wivi haguzijegi kwa Mtuwa Mlungu, Mtuwa gwa pasi poseri.
The Bible version in the Pogoro Language. @The Word for The World International and Pogoro Language translation. All rights reserved.