Hoseya 5
5
1Mwenga watambika, mpikanili! Mwenga Waisraeli mpikinili weri! Mpikanili mwenga lukolu lwa shifalumi! Mwenga yamfiruwa kutoza kwa kupendeleya ndiri, kumbiti muwera mgomiziwu aku Mizpa, na muwabata wavuwa kulugongu Tabori. 2Mubawa lirindi litali lya kuwagomiziya aku Shitimu. Kumbiti neni haniwakomi mwawoseri. 3Niwamana wantu wa Israeli toziya wafifika ndiri kwaneni. Mwenga mtenda vidoda na wantu woseri wa Israeli walidodisiya.
Hoseya kankukalipira guwira za wamlungu
4Vidoda vyawu viwalewelera nawamuwuyira Mlungu gwawu. Mnkati mwawu mmema vidoda, wamanandiri neni Mtuwa Mlungu. 5Kulitumba kwa Waisraeli kulanguziya ukontola wawu na ukontola wawu uwatenda wasindi kumguwira na wantu wa Yuda hawalikwali pamuhera nawa. 6Hawamlaviliri Mlungu tambiku ya kondolu na wang'ombi, kumsakula Mtuwa Mlungu, kumbiti hapeni wawezi kumpata, toziya kalitula gweka nawomberi. 7Wawera waminika ndiri kwa Mtuwa Mlungu, ata wana yawawera nawa wawu ndiri. Nawomberi hawahalibisiwi pamuhera na malambu gawu.
Nkondu pakati pa Yuda na Israeli
8Mgombi lugombugombu aku Gibeya na lipenka aku Rama. Mgombi shing'ola aku Beti aveni. Mwenga wantu wa Benjamini, toziya mnkondu gwenu kawera kumberi! 9Lishaka pandaviya makomangu Israeli hayiweri handa shiwala! Shanishibwera muwamu mwa makabila ga Israeli, ndo mlandu yagufira kulawira nakaka.
10Wakulu wa Yuda wawera yawagalambula mbaka za isi. Neni haniwamintili maya gangu handa malawa. 11Israeli wankutabisiwa na vintu vyakuyi vitolwa, toziya kafira kufata mirandu yahera mana. 12Haniwagamizi Waisraeli gambira mbekenyu ntambu yakaliya shigogu, haniwagamiziyi Yuda gambira yakaliya shigogu.
13Wantu wa Israeli pawavimaniti ulweri wawu na wantu wa Yuda pawavimaniti shironda shawu, nawomberi wagenditi Siliya kuluwa utanga kwa mfalumi mkulu, kumbiti mweni kawezandiri kulwaziya, na kuwaponiziya shironda shawu. 14Mana Mlungu hakaweri gambira simba kwa Israeli na Yuda. Namweni haniwapapulangi na kuwaleka, pakawatola kwahera gwakuwalopola.
15Hambuyi pahala pangu na kuwaleka wakomangwi mpaka wajimili likosa lyawu na kumbuyira.
The Bible version in the Pogoro Language. @The Word for The World International and Pogoro Language translation. All rights reserved.