၂ သ့းစၤလနံ 2
2
ပၠၤအကၱကဲာ်တပွဲၤ
1သဲပူၤသဲဝ့ၤတစီာ်, အဘဲာ်ကၠးဘၱာ်စဲာ် ယ့ၣ်ရှူးခရၱာ်ကလ့ၤလၤကၱာ်ယဳၤပျဳာ်ကဲာ်အဝၱၤအကဲနဳၤ, ယတၤမီၤဘဲာ်သံကယဳၤလီၤ. 2တဲၤကလှီးနံၤ သံဒဳကဘၱာ်စဲာ်ကလၤကဲၤနဳၤ, အီၣ်ကၱာ်ပီၢ်မဲးတဲၤ သးတဝၱၢ်တဝ့ၤကၱာ်တဲၤဘဲာ်ရှဳဘဲာ်မၤမဲး. တဲၤအယဳၤအဝၱၤအကဲနဳၤ, ပၠၤကကမဳၤသရီ ဝၤယၱၢ်ဘဲာ် ဝံအတဲၤယၱၢ်ဘဲာ်မၱာ်ဝၱၤ, ဝၤဒီထိးလၤဓဳၤမၱာ်ဝၱၤ, ဝၤဝှ့းနံၤသံစဲာ်ပရဳအပူၤအဒီၣ်ကနဳၤမၱာ်ဝၱၤလီၤ. 3အံာ်ပီၢ်မဲး ပၠၤလှီးနံၤပျဲးနံၤသံဒဳတဲၤတမံတမံၤ, ပၠၤတပွဲတပွဲၤမဲး. မၤနဲၢ်, တချူးကၱာ်ဘၱာ်စဲာ်အမူၤနံၤဘဲာ်နှၱနီးနဳၤ, တဲၤထးဒ့ဒီၣ်ဓဳၤအကဓူၤကါ တချူးအီၣ်ထာ်နှၱနီး, ကၱာ်ပၠၤအကၱကဲာ်မဲၤလှီကဓူ, ထဲၢ်အကလ့ၤဒဳလရာ်တပွဲၤကပီးထာ်ဝ့ၤလီၤ. 4စကပဲၢ်ထာ်ယၱၤစန့ၤဒဳကယါ အမံၤထာ်နံၤဘၱာ်စဲာ်, တဲၤထဲၢ်ပၠၤသဘူၣ်ထာ် သဘဲထာ်လဳစါစဲးတစီာ်နဳၤအခဳး, စကထာ်ဒ့ဒီၣ် ဘၱာ် စဲာ်အလဝ့ၤတစီာ်နဳၤ. စကလ့ၤနံၢ်ဆးနါလၤအီၣ်ဒဳ ကဘၱာ်စဲာ်အတဲၤလှူၣ်ရှံၣ်အပူၤ, ကၱာ်စကဒီၣ်လၤ စန့ၤကဘၱာ်စဲာ်လီၤ.
5ဘ့ယအီၣ်ကိာ်ဝ့ၤသံကါအခဲနဳၤ, ယဒီဆးတယွဲၤယွဲၤ အံာ်သံတဲၤဝၱၤတဲၤကဲအယဳၤတစီာ်နဳၤ, သံတကမဳၤထာ်နံၤပ့ၤနီးဧါ. 6စာ်ဘိထဲၢ်တဲၤကတမဲၤပီၢ်အန့ၤခဳနူၤယဳၤနှၱနီးအနံၤခံ, တဲၤအမဲၤဒၱာ် ဒါအီၣ်ဝ့ၤ, ကၱာ်အနဳၤမၱာ်တၤနဲၢ်နဳၤသံသၱာ်ဟဲတပွဲး. တဲၤအဆဳအခဲကဘဲာ်ကီ ပၠၤအကၱကဲာ်မဲၤလှီ ကဓူၤတပွဲၤပီးထာ်နဳၤ. 7ခဳနူၤယဳၤ တဲၤကၱကဲာ် မဲၤလှီကမ့ၤအ့းလိၤဟူၣ်ဇီၤကဲၤ, နီၣ်သီနှီနူၤ, အမဲၤဒၱာ်ဒါတဲၤတပွဲၤကဘဲာ်သဳးတပီၤထဳခၣ်လဲးတဲၤ ကမဲၤဘဲာ်ကီအန့ၤ. 8အနဳၤတပျာ် ပၠၤအကၱ ကဲာ်မဲၤလှီကဓူၤတပွဲၤပီးထာ်ကီ, ကၱာ်ဘ့ဘၱာ်စဲာ် ယ့ၣ်ရှူးလ့ၤလၤနဳၤ, စကမဲၤသံအံာ်လၢ်ဝၤကၱာ်စဧီၢ်ဗူအတဲၤသဲးထာ်လီၤ. ဘၱာ်စဲာ်အတီၤအသ့းကမဲၤလှဲမဲၢ်ကဲလဳၢ်ကီစဲာ်လီၤ. 9ပၠၤအကၱကဲာ်မဲၤ လှီကဓူၤတပွဲၤကဖၱးနံၤမဳၤဒဲးလၱးအစိသလဲ, ကၱာ်စကဒဲလၱၢ်ထာ်ကီတဲၤစီးကျံး, တဲၤထဲးတမိၢ်တမှါ အပျဲးနံၤတဲၤအမဳအမဳၤ, 10ကၱာ်စကလှီးနံၤပျဲး နံၤကီပၠၤဒဳအဘဲာ်သံဘဲာ်လှဲမဲၢ်ဟဲးဝၱၢ်ဟဲးကဲသ့ပွ့ၤ တစီာ်လီၤ. စဲာ်တစီာ်ကသံဘဲာ်လှဲမဲၢ်ဘဲာ်ကီ ဒဳအတဘဲာ်လီၢ်, တဖၱးနံၤတဲၤတၱၢ်တဲၤမှးထဲၢ်အယဳၤ က့ၤစာ်က့ၤစဲာ်နီးအစဲနဳၤ. 11ဒဳတဲၤနဳၤအခဳးအစဲ, ကဘၱာ်စဲာ်ကသဓဳလ့ၤကီတဲၤကမဳၤဒဳအသဲကမဲးစဲာ် အစိသလဲမဲၤတဲၤဒဳစပူၤတစီာ်ကၱာ်စကဘူၣ်လဳၢ်သဳး လဳၢ်သးတဲၤအပျဲးတစီာ်နဳၤအနံၤခံ, 12ကၱာ်ပၠၤထဲၢ်အတဘူၣ် တဲၤတၱၢ်တဲၤမှးနီး, ကၱာ်အမဲၤ မီၤမဲၤမၤအံာ်အန့ၤတဲၤခီၣ်ဝဲၤတစီာ်နဳၤ, ကဘဲာ်စံး ရးကီကိအပွဲၤလီၤ.
သံဘဲာ်ရိၤထာ်ဒဳတဲၤယဳၤက့ၤစာ်က့ၤအနံၤခံ
13သဲပူၤသဲဝ့ၤဘၱာ်စဲာ်ယ့ၣ်ရှူးဘဲာ်လီၢ်တစီာ်, ဝၤမီၤထါအံာ်ကဘၱာ်စဲာ်အလှူၣ်အတါ ဒဳသံ ခဳးသံစဲလီၤ. မၤနဲၢ်, ကဘၱာ်စဲာ်ရိၤထာ်အူဆူးသံ အကနံၤဘဲာ်တဲၤယဳၤက့ၤစာ်က့ၤဒဳကဘၱာ်စဲာ်အသး စါထံအစိသလဲအပူၤ, ဒဳသံဘူၣ်ကဲၤတဲၤတၱၢ် တဲၤမှးအခဳးအစဲ, သံကကဲာ်ထာ်ဘဲာ်ပၠၤစါထံနဳၤ. 14ဘ့ဝၤဒီဆးသံတဲၤသးလဳၢ်သးလၤအံာ်အဝၱၤ အကဲနဳၤ, ကဘၱာ်စဲာ်ယဳၤကဲၤသံ စာ်ဘိထဲၢ်သံကနံၤဘဲာ်ပီၢ်ဘၱာ်စဲာ်ယ့ၣ်ရှူးခရၱာ်အတီၤအသ့း နဳၤ. 15ကနဳၤအခဳးအစဲ, သဲပူၤသဲဝ့ၤတစီာ်, ဆီထဳးမှ့းမှ့းပီၢ်, ဖၱးကျဳၤပီၢ်တဲၤတၱၢ်တဲၤမှးထဲၢ်ဝၤ သဲာ်လှိသံ, ဒဳတဲၤဒီထိးလၤအပူၤကၱာ် ဒဳဝၤတဲၤဝှ့း နံၤသံ စဲာ်ပရဳအပူၤတစီာ်နဳၤ.
16ဘၱာ်စဲာ်ယ့ၣ်ရှူးခရၱာ်ကၱာ်ပာ်ဘၱာ်စဲာ် ထဲၢ် အဘဲာ်လီၢ်ကဲာ်အလှူၣ်အတါအစဲ, သံကနံၤဘဲာ် ဒီဧဲၤသးအတဲၤခူတဲၤဟဲအပ့အဇီၤကၱာ်တဲၤမူၤလဲၢ် ဆးရှံအမှ့းအကျဳၤ, 17အံာ်ခဳးအံာ်အါသံ ကၱာ် မဲၤဆိးထာ်သံသဳးသံသး စာ်ဘိထဲၢ် သံကမဲၤပီၢ် တဲၤအအဲးကၱာ်သံကဒီၣ်ပီၢ်တဲၤအဘဲာ်လီၢ်နဳၤ.
Geba Roman New Testament © Bible Society of Myanmar, 2021.