Zabuli 78
78
Mulungu ne wanhu wakwe
1Ale hulicizenyi wijize wangu,
anye nyo wanhu wangu,
muteje likutu muhulicize zinghani zangu.
2Ane nolonga nanye mu nzila ye vihwanicizo,
nomulolosezenyi ze zifumbo ze katali,
3ze zinghani zono cazihulika,
kanyhi no kuzimanya,
zinghani zono walezi wetu waciloloseza.
4Nase hamba si coleka kuwasimuliziza,
i wana wetu, cowasimuliziza lulelo,
lono lukuza kuli zo wuwaha wo Muwaha Mulungu,
kuli ze mapoto gakwe gono yagetuma.
5Hambi nha yawika wulajilize kuli Waisilayeli,
na kuli lulelo lwa Yakobo,
yakasimya wuhomelezi.
Yakawalajiliza walezi wetu,
vyono wawejize ne wana wawo malajilizo gakwe.
6Ho wanhu we ndelo yono yikuza wagamanye,
heya, i wanhu wono wolelwa hanyuma, wagamanye,
nawo ho wawejize i wana wawo.
7Nawo ho wasume kumwitumbila Mulungu,
ho walece kugasemwa i metumo go Mulungu,
langa ho wagebatilile lukulu i malajilizo gakwe.
8Walece kuwa nha vyono wali i walezi wawo,
wono wali wabedegazi kanyhi wafyuzi,
lulelo lono lusina wulunji we nyikala, wono wukamile,
u lulelo lono lusina wihuwilwa kuli Mulungu.
9I wanhu wa Efulayimu, mwizuwa lyo wulugu,
wakatiza wakawuya ne nyuma,
akuno ho webate no wupinde hamonga ne zisonga mu mawoko.
10Si wasaka kwibata cilagane co Mulungu,
kanyhi walema no kugatyatya malajilizo gakwe.
11Wakasemwa zono Mulungu yali yetumile,
ze mapoto gono yali yawalajila.
12Yanoza mapoto hali walezi wawo,
mwilolo lya Sowani mu yisi ya Misili.
13Yalitemanula lilenga, yakawalowosa wene,
yakaganoza malenga geme wima nhe lijinji.
14Mu mapango ge misi,
yawatonga ne livunde ninga mu cilo cose,
yawatonga no wuzelu wo moto.
15Yagapandula matalawe mu nyika,
yakawang'wesa malenga, mu wulawa mu visolo.
16Kanyhi yalavya malenga wulawa mwi'talawe,
yakagahulumya nha makolongo.
17Ninga hamba nhavivyo,
vyo wakacila du kumusutizya Mulungu,
sunga na mu nyika,
wakamufyulila u Mulungu Mono Yalawiliciye.
18Wakamujela Mulungu mu zinhumbula zawo,
wakusaka wapegwe ndigwa yono weneco wasakaga.
19Wamulonga Mulungu wakutya,
“Alu mwene mbeka,
Mulungu kosuma kucipela ndigwa mu muno mono nyika?
20Hamba yiwe, heya mbeka yatowa litalawe,
malenga gakahuluma nhe kolongo,
ninga aluno ma, mbeka kosuma kucipela ndigwa,
hamonga no kuwapela wanhu wakwe nyama?”
21Nayo Muwaha Mulungu yali yeza kuzihulika zizo,
yakawa kukolwa ne likuwo,
likuwo lyakwe likawakolelwa i wana wa Yakobo,
no kumwinucila Isilayeli,
22vyono si wamwihuwila Mulungu,
hamba kwihuwila kose vyono kosuma kuwaponya.
23Ninga hamba yiwe nhavivyo,
yagalajiliza mavunde ga kucanyha,
yakayidigula milango ya ku wulanga,
24yakawagwisiza Mana ho walye,
yakawapela wuhemba wa ku wulanga.
25Hodu wakalya ndigwa ye wamalayika,
nayo Mulungu, yakawapela ndigwa,
mu nghango nha vyono wasaka.
26Yakayinoza mbeho ya kucilima yipute muno muno,
na kwe vilungo vyakwe, yakayitonga mbeho ya kutakama,
27yakawaletela zindeje nyinji muno wanhu wakwe,
zikawa nyinji kotya musawawa wa mwi'lenga,
28ne zindeje zizo zikagwa haciligati ye nghambi yawo,
zikapilima mahema gawo gose.
29Ne wanhu wakalya wakeguta.
Mulungu yawapela cono wasakaga.
30Ninga na lono wali wakali wena,
no wuhile wo kulya,
ne ndigwa lono yali yikali mu milomo yawo,
31lo lulo baho likuwo lyo Mulungu,
likawacila, Mulungu,
yakawawulaga i wanhu,
wono wali wali vilungo muli wene,
yakawagwisa ne wazelelo wa Isilayeli.
32Ninga hamba nhavivyo,
vyo wakacila du kumusutizya Mulungu.
Si wehuwila yaye,
hamba yawe yali yetuma mapoto mawaha.
33Holeka Mulungu nayo,
yakavidumulila i vilo vyawo nho muhe,
ne myaka yo wikale wawo,
mu wugaye wo kogofya.
34Na mu nghango yono yajendelelaga kuwawulaga,
awalya wono wasigalaga,
wakajendelela kumupitucila,
wakanena wubi wawo wakamupitucila Mulungu,
kwe zinhumbula zawo zose.
35Wakumbucila vyono Mulungu, yo mudimi wawo
na vyono u Mulungu Mudaha Vyose,
yo mukombozi wawo.
36Ninga wamukonga Mulungu, na muli zose zono
wamulonjelaga, zali za wulambi du.
37Hamba si wali wehuwilwa kuli mwene,
hamba si wasuma no kwibata cilagane cakwe.
38Ninga hamba nhavivyo, Mulungu yakawa yali
lusungu, yakawanenela wubi wawo,
hamba si yawongomeza yaye.
Yeyimila likuwo lyakwe kali kenji, hamba si
yalileceleza likuwo lyakwe limukole muno.
39Mwene yakumbucila vyono wene wawa wanhu du,
wehwanile mbeho yono yipulutaga yiwa kwajilila.
40Wihwesaje ta,
kali kalinga wamufyulilaga mu nyika!
No kumukalaza mumo mu nyika!
41Wakamujela Mulungu kali kenji muno muno,
wakamukalaza muno muno yuyo,
Mono Yelile wa Isilayeli.
42Hamba kukumbucila i vilungo vyakwe,
hamba za mwizuwa alilya lono yawaponya,
mu miwoko ye walugu wawo,
43lono yetumila mezino mawaha mu yisi ya Misili,
hamonga ne mapoto ga mwilolo lya Sowani!
44Yagahundusa malenga ga mu makolongo,
gakawa sakami,
Wamisili ho walece kutuga malenga go kung'wa.
45Yawagumilila mawumbi ge mahazi gono gawagaza,
hamonga ne mabula gono,
gawambuza wakatuga wambuce wuwaha.
46Yakazikombola zi nzije,
zikalya vilimwa vyawo,
hamonga no kuyihodanga migunda yawo.
47Yayihodanga migunda yawo ya mizabibu,
ne mvula ya mabwe,
hamonga ne mikuyu yawo ne mbeho nghali muno.
48Yawulaga zing'ombe zawo,
ne mvula ye mabwe zingholo zawo,
yakaziwulaga ne limuli.
49Yalileka likuwo lyakwe liwazize,
hamonga no wukali, ne simbili no wugaye,
hamonga ne litewa lye wamalayika wawulaji.
50Hamba si yalimila likuwo lyakwe,
hamba si yenda kuwatetela yaye,
langa yawawulaga no wutamwa we lihuhuji.
51Kanyhi yawawulaga i wana wose wa Misili,
i walongozi kulelwa, heya,
ndawililo ye vilungo vyawo mu mahema ga Hamu.
52Hanyuma yawahamya wanhu wakwe,
nhe zingholo, yakawalongoza ku nyika,
nhe litewa lye zimitugo.
53Yawajendya wapolile, hamba si wogopa yaye,
langa lilenga likawagubiciza walugu wawo.
54Nayo yakawahamizya ku yisi yakwe,
yono yelile, mu matunda gono yagateka mweneco,
kwe vilungo vyakwe.
55Yagawinga makungugo ku mwande yawo,
yakawapela Isilayeli yisi zawo ziwe zawo,
yawapela no wikalo we zimbeyu zakwe.
56Hamba nhavivyo, wakacila kumujela,
no kumufyulila Mulungu Mono Yalawiliciye,
hamba si webata zo wuhile wakwe yaye.
57Wakawa wasina cihuliko, hamba kuwa wehuwilwa,
wakawa nha vyono wali wenha walezi wawo,
wakayumba-yumba nhe songa yono si nghangale.
58Wamukalaza Mulungu,
mu wuhemba milungu yinji mu wuhembi wawo,
holeka wamunoza Mulungu yawe,
no wivu ku soko ye makumbicilo ge milungu yawo,
ye vihwani.
59Nayo Mulungu yali yeza kuziwona zizo,
hodu yakakolwa ne likuwo,
no kumulemela lukulu Isilayeli.
60Yakawuleka no wikalo wakwe wa ku Shilo,
wikalo wono yali yekaye muli wanhu.
61Yakalileka ne Lisanduku lye Cilagane,
lisolwe ne walugu,
Lisanduku lyono lina vitanjilo vye vilungo vyakwe,
hamonga no lukumyo lwakwe.
62Yawasimbila wanhu wakwe mweneco,
yakawakombola ho wawulagwe ne walugu wawo.
63Ne wazelelo wawo wose, wakamalicila ku wulugu,
i wahinza nawo, wakekala si wawatujile,
wo kuwatola yaye.
64I wakohani wawo nawo, wakawulagwa wose,
ne i wacekulu zawo, si wakombolwa ho wawalilile yaye.
65Ninga ku ndumilizo yayo,
u Muwaha Mulungu yakenuka nha yakulawa mu nhongo,
nha citung'ati mono yasangalazwe ne divayi.
66Yakawatowanga walugu wakwe,
no kuwagomola ne nyuma,
yakawakozeza cevu lukulu cibitilila.
67Hamba nhavivyo ninga, yayilema mhuga ya Yusufu,
hamba si yawahagula wo mulango wa Efulayimu.
68Langa yawahagula wo mulango wa Yuda,
kanyhi yakalyenda muno ne litunda lya Sayuni.
69Nayo yakayizenga Nyumba yakwe kuko,
yikawa yinha nho wikalo wakwe ku wulanga,
yikawa yihwanile ne yinze,
yono yayisimya yikamile cibitilila.
70Yamuhagula Dawudi mwitumami wakwe,
mono yamusola ku wulawa kwi dimo,
71yamucema lono yali yali mu wudima litewa
lyakwe, yakamunoza ho yamudime Yakobo,
mono lye kungugo lyakwe,
yawadime Isilayeli wanhu wakwe.
72Nayo Dawudi yakawadima,
mbeka kwe nhumbula yakwe yose,
hamonga no kuwatonga ko wunghula,
wuwaha muno muno.
Cigogo Bible © Bible Society of Tanzania, 2002.