Zabuli 2
2
U Mutemi muhagulwa wo Mulungu
1Alu socici wanhu we makungugo,
wakuleta zo wutilibule?
Nhawule wanhu wakwihehemeza bwete?
2Watemi wa mononze wakwiwikaniza,
wawaha nawo wakwiheha hamonga,
ho wamubedegale Muwaha Mulungu,
hamonga no mwitilwa mafuta wakwe muhagulwa!
3Wakutya, “Alenyi ciyiwuse mu wulongola wawo,
kanyhi cigawopole ne manyolo gawo!”
4Nayo Muwaha Mulungu mono yali ku wulanga,
yakuwaseka no kuwezwajiza.
5Holeka kolonga nawo kwe'kuwo,
no kuwogofya ko wukali.
6“Namutemya mwitilwa mafuta wangu,
yatemile ku Sayuni,
litunda lyangu lyono lyelile!”
7Nayo mwitilwa mafuta yakutya,
“Nowanza wuhile wo Muwaha Mulungu.
Muwaha Mulungu yanonjela yakatya,
‘Agwe wuli mwanangu, zuwali nghulela.
8Ale wulombe kuli'ne
nane nokupela makungugo gawe wuhazi wako,
ne yinze nayo yose yiwe sawo yako.
9Nagwe kowapondanjiza ne nghome ya cuma,
kanyhi kowatulanga nha nyungu yo muwumbi!’ ”
10Holeka 'lu anye nyo watemi,
mwitumamilaje mahala,
hulicizenyi uwukagwe wuno,
anye mo wawaha we yinze.
11Ale, mumwitumamilaje Muwaha Mulungu kwe cogopo,
mucicime kanyhi mumufugamile,
12hono mulece kunoza nhavivyo,
mwene kosimba nanye mokongomezwa,
hambi likuwo lyakwe nha lyakaga nhinicizo.
Nyemo mbaha kuli wose wono wakwihundika muli mwene!
Cigogo Bible © Bible Society of Tanzania, 2002.