Zimbazi 31
31
Wulanjizwe kuli Mutemi
1Azi zo nghani zono mutemi Lamuyeli yafundwa no nyina, yatya,
2“Agwe yo gwegwe du mwanangu we cilume monga,
mono namulomba kuli Mulungu,
nayo yakamhela.
Alu magu, hamba nghulonjele nityeci?
3Ninga 'ne nghukutya vyono,
wulecele lukulu kumalila vilungo vyako vyose mu wusenyha,
ne sawo yako yose mu wacekulu,
hambi zizo nha zawahodangaga sunga ne watemi.
4Holeka wuhulicize gwe mwanangu Lamuyeli,
i watemi si wanojeye wawe wagalo
'jimbi, hamba kuwa no wusulumizi wo wugalo 'jimbi.
5Ku soko hono wawe wagala wujimbi,
hobaho hamba si wakukumbucila kanyhi zo wulajilize,
kanyhi hamba si wakucelelela ze ling'ani ye wanhu.
6“Holeka, wugalo 'jimbi,
wuwanojeye wanhu wono wakufwa,
na wono wali mu wukalale.
7Wawo langa wo wanojeye wang'we,
ho wasemwe zo wuciwa wawo,
no wukalale wawo.
8Wulonje zo wuling'anize,
so wono si wosuma kwilonjela weneco.
Wuwataze wono wasina wutazi,
ho watuje ling'ani yawo.
9Holeka, wulonje ku soko yawo zinghani zawo,
kanyhi weze wuli muling'anizi we ling'ani.
No kuwatendela ze ling'ani i waciwa na wono wanjiye.”
U mugolece muswanu mono yakwiliye
10Na mbeka kukamu kumutuga mugolece mono yakwiliye! Hambi nha yena wuguzi wukamu muno si nha vibwe vyo wuguzi wukamu! 11Nayo mugolece we liwala lilyo, sunga no mulume wakwe, kawezaga yamwitumbiye. Kanyhi hamba si kolo ciwapa yaye.
12Na mu myaka yose yo wikalane wawo, hasina
hambe 'zuwa lyono mugolece yamukalaza mulume wakwe.
13Langa mwene vilo vyose, kekalaga yakunoza myenda
yo wukunzeje we zingholo, hamonga na ye bafuta.
14Kanyhi kakongholaga ndigwa ako na ako,
yakuyileta mu kaya, kanozaga nhe wasuluza
wa mu ngalawa yo wukwawi.
15Na kanyhi kelawaga kwinuka hakali mitondo muno
muno, ho yawikanize ndigwa so we mhuga yakwe,
hamonga no kumugawila u mwitumami wakwe we cicekulu,
milimo yono kokwituma.
16Kalondolaga mugunda, kawa kuwugula ne zipesa
zono yali yakwawa, hanyuma kawa kuhadika zabibu.
17Kanyhi muhidimbazi muno mu milimo,
yali vilungo kanyhi mwitumi.
18Nayo kawezaga yamanyile ne vifo vye vinhu vyose
vyono kanozaga.
Nayo ketumaga milimo sunga lizuwa ligwila.
19Mwene kabotaga mweneco kwe miwoko yakwe,
no kuhona myenda yakwe kwe miwoko yakwe.
20Kanyhi kawawonelaga lusungu i waciwa
na wono wali mu wanjile.
21Na mu madaha ge cinyuli, mwene hamba si
kehwelelaga yaye, hambi we mhuga yakwe wose,
nha wena myenda yono yowapela civuce.
22Kahonaga mweneco ne mitote yo kutandika mucanyha
ye vitanda, kanyhi, kavwalaga myenda yo lugandu.
23No mulume wakwe, yo munhu we lilumbo.
Kanyhi yo yumonga wa muli walongola mu'si.
24Kanyhi kahonaga myenda ne misipi, kawa
kuwaguziza i wasuluza.
25Yo mucekulu mono yali vilungo, kanyhi yena
lilumbo, hamba si kehwelelaga za mu vilo vyono vikuza.
26Kanyhi, yendile kulonga ko wupolo zinghani ze mahala.
27Kanyhi mwene kekalaga yakwipiganza, yakuwalondolela
visakwa we mhuga yakwe.
28Ne wana nawo, wendezwaga muno, nayo mulume wakwe,
kamulumbaga muno.
29Mulume wakwe katezaga, “I wacekulu wenji,
mbeka wagolece waswanu, ninga agwe
wuwacizize wawo wose.”
30Nawo wuhijila mbejele, wina zo wukoci,
nawo wuswanu wo wulangwe, wa bwete.
Ninga mucekulu mono kamogopaga Muwaha Mulungu,
yuyo langa, kotuga lilumbo.
31Wumulumbaje mugolece wako, muli zose zono
yakwituma. Nayo, holeka kotuga lukumyo hali wanhu wose.
Cigogo Bible © Bible Society of Tanzania, 2002.