Zimbazi 29
29
1Na hono wuwe wusina cihuliko,
nhondo zose lono wukutacilwa, lizuwa linji,
kolobenangwa hamba si koloponywa kanyhi.
2Hono wundajile mutemi mono yali ling'ani,
nane nokulajila wanhu wono wena wusangalale.
Na hono wundajile u mutemi mubi,
nane nokulajila i wanhu wono wena wukalale.
3Hono wuwe wendile mahala,
mbeka sogo kokwendezwa nagwe.
Kanyhi yo nghani ya wulele,
yo munhu kwitumamila sawo kuli wacekulu wasenyha.
4Na hono mutemi yawe yali mu ling'ani,
sunga ne likungugo lyowa lili vilungo.
Ninga hono yawe mwenda sawo,
koyongomeza yisi yakwe.
5Na hono wuwe wuli mwiyendezi kuli wendece wako,
wukwitega mutego go mweneco.
6Ne wanhu wabi, weyigwizaga mu wubi wawo.
Akuno i wanhu we ling'ani, wasangalaye kanyhi welecele.
7Nayo munhu we ling'ani yazimanyile
zono zimunojeye yawatendele waciwa.
Ninga i wanhu wabi, si wazimanyaga zizo.
8Ne wanhu wono si webedegazi
wasagahazaga wuma mwi'kaya.
Ninga i wanhu we mahala, wapozaga makuwo.
9No munhu we mahala, hono yamusitace mulele,
u mulele kowa kuseka du,
kanyhi kowa yazozize du akuno yakuliga.
10I wanhu wono wendile wuwulaji,
wamusulaga u munhu we ling'ani.
Ninga we ling'ani wowucitila wumi wo munhu we liwala lilyo.
11Ne wanhu walele, welajilaga makuwo gawo calinze.
Ninga we mahala, wali ngola, akuno wena no wiyimizi.
12Na hono mutemi yawe muhulicila zo wulambi,
ne wetumami wakwe wose wowa walambi.
13U muciwa no mugazi, wose yo nghologo monga,
u Muwaha Mulungu nha yawapela meso wose vyono wejete.
14No mutemi mono kawaling'anizaga viswanu waciwa,
kotema vilo vinji muno.
15Kutacila hamonga no kufunda,
co cinhu ciswanu kuli wana.
No mwana hono yalece kutendelwa zizo,
komukoza cevu nyina ku soko yakwe.
16Na hono i wanhu wabi wawe wo watemi,
no wusutye wonjelezekaga.
Ninga we ling'ani wokwikala walanjiliye wufwe we wanhu wawo.
17Wumufundaje mwanago,
nagwe kokwilumbila muli mwene.
Nayo hamba si kokukoza cevu yaye.
18Ne likungugo hono lilece kuwa no wutonji wo Mulungu,
liwezaga yikungugo lyono lisina wulajilize.
Yo mumoti munhu mono yebate lilajilizo lyo Mulungu.
19Si kosuma kumufunda mwitumami na nghani du,
ku soko hamba yawe yakukwizuka zono wukumulonjela,
ninga si kohulika.
20Ciba kumwitumbila u munhu mulele,
si nha kumwitumbila u munhu mono kelonganjilaga du,
wu wula kwamula kwihwesa.
21Na hono wumuzoweleze mwitumami wako,
ku wulawa wudodo wakwe,
wuwe kumupela du cono yakusaka,
mwi'zuwa linji,
kolo kwisolela du mweneco vinhu vyako.
22Ne wanhu wono wena makuwo ge mbela mbela,
waletaga wuma hamonga ne mazozo.
23Ne wanhu wedunhumuzi, wosuma kukuletela lifwa.
Ninga hono wuwe mwinenenyhezi, wokupela lilumbo.
24Nayo u muyagwe no muhizi, kesuzaga wumi wakwe.
Na hono yalonje ze mbeka mu mahakama,
kotuga wulipicizwe.
Nayo hono yalece kwituma nhavivyo,
Mulungu komulijita.
25Nawo woga wo kuwogopa wanhu, wuletaga mutego.
Ninga hono wumwitumbile Muwaha Mulungu,
kowa wupolile.
26Ne wanhu wose wasakaga watuje wendezwe kuli mutemi.
Ninga kosuma kutuga ling'ani kuli Muwaha Mulungu du yali wene.
27I wanhu we ling'ani, wawasulaga i wabi,
nawo i wanhu wabi, wawasulaga i wanhu we ling'ani.
Cigogo Bible © Bible Society of Tanzania, 2002.