Zimbazi 27
27
1Wulece kwidunhumulila kuli zono kozinoza mitondo,
Hambi nha si wuzimanyile,
zono zokwijela haciligati ya lulu ne mitondo.
2Kanyhi, wulece wanji wo wakukumye,
ninga wulece kwikumya wuli wene.
3Libwe yizito, nawo musawawa muzito.
Ninga u munhu mulele mono yendile kusagahaza nghani,
muzito muno yacizize vivyo vyose.
4Likuwo si litetelaga, kanyhi lihodangaga.
Ninga hamba nhavivyo,
si lyokwihwana no munhu we mvivi.
5Ciba hono wumutacile munhu calinze,
si nha kumuleka yehwese vyono agwe si wumuceleleye.
6No mwendece wako hamba yakutamise,
nagwe hamba si kowona vibi yaye.
Ninga hono mulugu wako yakujelece muwoko wakwe mwi'wega,
komutya, “Wuka 'gwe!”
7Na hono wukali wigute, hamba wuci si kowusaka yaye.
Ninga kolo wadabuka, hamba ndigwa yiwe yili cisungu,
agwe koyiwona yili muzinzi du.
8No munhu mono sikekalaga ha kaya yakwe yatule,
yehwanile ndeje yono yikuyumba-yumba ako na ako,
kutali ne linhuli lyayo.
9Nago mafuta go muzinzi,
hamonga ne mhunjile swanu,
visangalazaga nhumbula.
Ninga mazozo, gahodangaga mulamu wa mu nhumbula.
10Wulece kuwaleka weyendi wayago,
hamba weyendi wo sogo.
Na kanyhi hono wuwe wuli mu wugaye,
wulece kulondola wutazi kuli nduguyo.
Kanyhi wukumbucile nha vyono,
mwiyendi muyago mono mwikalane behi nayo,
yuyo yo kosuma kukutaza, si
nho nduguyo mono yekaye kutali nagwe.
11Gwe mwanangu, weze ne mahala,
nane holeka nosangalala.
Nane nowa nina lipitulo,
kuli munhu wowose mono kohosa 'ne.
12Ne wanhu wo wizuce, wawonaga zimbali zikuwaziza,
hodu, wawa kwilega.
Ninga u munhu mono yasina mahweso,
mwene kokwiyinjiza,
ninga hanyuma kanyhi yawe kukalala.
13No munhu mono kowa mulele,
sunga yehuwize nha vyono komulipila u mujenzi migawa yakwe,
ayo yuyo yimunojeye sawo yakwe yisolwe,
yipinjikwe so migawa yiyo.
14Na mono yendile kwilawa no kumwinusa mwendece wakwe
ne 'zi yikali muno muno,
wuwo wowalwa nha wulijite kuli mwene.
15No mugolece mono yali zozo,
yehwanile nhe mvula ye lihwela.
16Alu kosuma kumunyamaza na nzila ci?
Wule, hono wukulanga,
wujelile ne 'zuwa linji kuyimila mbeho,
hamba kufumbata mafuta mu muwoko wako?
17Ninga nase co wanhu,
ciyijizizaga kuli wanhu wayetu,
nha vyono cuma cinolaga cuma ciyagwe.
18Na hono wuwukamise mukuyu wako,
holeka kolya ne mana gayo.
No mwitumami nayo,
hono yamulanjilile viswanu muwaha wakwe,
ale, nayo kotuga lilumbo.
19Nha vyono kusumaga kwiwona wusu wako mu malenga,
lono wukugalanga.
Ale, nhavivyo nagwe,
vyo kosuma kwiwona mu nhumbula yako go mweneco.
20No wusulumizi wo munhu,
wihwanile ne yinze ye wafu, yono si yigutaga.
21Lilumbo lyo munhu, nalyo likuwa kujelwa,
nha vyono moto wujelaga zahabu na fweza.
22Hamba wumutowe mulele,
sunga yawe yali behi no kufwa,
ninga si kosuma kuwutowa wulele wakwe sunga wumuwucile.
23Wuhidimbale kuzidima ngholo ne zing'ombe zako,
ko wulanjilizi muno.
24Hambi sawo, nha si yikalaga cibitilila.
Hamba makungugo du nago,
si gekalaga cibitilila.
25Na lono wukutema mahanze go kunyaza so ng'ombe,
kanyhi mu cipango cico,
weze kutema ne mahanze ga mu vigongo,
lono wukali wulindiye mahanze kanyhi gawiluce.
26Nagwe kosuma kwinozeza myenda,
mu wulawa mu wukunzeje we zingholo zako.
Na kosuma kugula mugunda,
ne zipesa zono zolawa mu wuguzi we zimhene zako zinji.
27Ne zimhene zono zosigala,
kowa kuzikama mele,
gono gomukwilenyi nyenye wose,
mu mhuga yako,
hamonga ne wetumami wako we cicekulu.
Cigogo Bible © Bible Society of Tanzania, 2002.