Zimbazi 15
15
1Wupitule we mhola mhola, wutuzaga likuwo
Ninga nghani yono yikutamisa, yisagahazaga likuwo.
2Wulonje we wanhu we mahala,
wuwezaga wuswanu wo wizuce.
Ninga i walele, walongaga zo wulele.
3Nayo Muwaha Mulungu, kaziwonaga zose hanhu hose.
Kacigozaga wose, hono cikwituma ziswanu hamba 'mbi.
4Zinghani ze ngola, ziletaga wumi.
Ninga zinghani zo wiwanganile, zihodangaga nhumbula.
5Yo nghani yo wulele, kuzibedegala zono sogo yakufunda.
Ninga yo nghani swanu kugabocela mafundo gono yakukufunda.
6Wanhu we ling'ani, wazilanjililaga zisawo zawo.
Ninga i wabi, wajilizaga zisawo
zawo mu cipango co wugaye.
7We mahala, wo weyagazaga zo wumanye, sinhe walele.
8Nayo Muwaha Mulungu,
kendezwaga no wulombe we wanhu we ling'ani.
Ninga yagasulile makumbiko gono
wamulavizyaga i wanhu wabi.
9Zinzila ze wanhu wabi, Muwaha Mulungu yazisulile.
Mwene yawendile wono wetumaga zo mugoloka.
10Na hono witume zimbi, kotamiswa ko wulipicizwe.
Na hono wulece kuvumila wufundwe, kofwa.
11Kanyhi wumanye vyono, hamba yisi ye wafu,
siyosuma kumwimila Muwaha Mulungu,
ho yalece kusuma kuzimanya, zono zili mumo yaye.
Alu munhu ho kosuma nhawule,
kumuhundicila Mulungu, mahweso gakwe?
12Ne wanhu wabedegazi, si wendaga wufundwe yaye,
kanyhi hamba si wendile kuwuza nghani kuli we mahala.
13Ne wanhu nawo hono wawe wena nyemo,
kowawona wusu wawo wusangalaye.
Ninga hono wawe wena wukalale, wakwijela wasininghaye.
14Ne wanhu wono wena wizuce, wendaga kwiyijiza,
Ninga i walele, weyigutyaga no wulele wawo du.
15Mikalile yo muciwa, vilo vyose yiwezaga ya magayo.
Ninga i wanhu waseci, wekalaga nhondo zose wamotile.
16Yili ciba hono wuwe muciwa, akuno wumogopile Muwaha
Mulungu, si nha kuwa mugoli hamonga no wugaye.
17Kanyhi yili ciba kulya ndigwa ye mboga ye sunga du,
hamonga ne wanhu wono mwiyendile.
Sinho kulya nyama yono yijinile ha ciligati yo lusulo.
18Makuwo galetaga matemanuko.
Ninga wukangalizi, wuletaga mulamu.
19Na hono wuwe mudoba,
kokwitang'anila ne zimbali hanhu hose.
Ninga hono wuwe wuli muhidimbazi,
hamba si kogazika yaye.
20Nayo mwana we mahala, kamusangalazaga sogwe.
Ninga mwana mulele, kamukalazaga nyina yakwe.
Ninga we mahala, wetumaga zo mugoloka.
21Ne wanhu walele, wawusangalalilaga wulele wawo.
Ninga we mahala, wetumaga zo mugoloka.
22Weze wuli mupelu ku wubocela zo wufundwe,
holeka komoteswa.
Ninga hono wuwe wuli zeze,
kokwiyambuza go mweneco.
23Yiwezaga nyemo mbaha lecenyi, hono wupitule nghani
yono yinojeye, mu cipango cono cinojeye!
24Ne wanhu we mahala,
wayityatyaga nzila yono yiwatonganga ko ku wumi.
Ninga si wayityatyaga nzila yono yowatonga sunga kwi'fwa.
25U Muwaha Mulungu kozimwagulanga
zikaya ze wanhu wedunhumuzi.
Langa sawo yo mucekulu mufwile, koyidima.
26Nayo Muwaha Mulungu, yagasulile mahweso ge wanhu wabi.
Langa mwene kendezwaga ne zinghani za mu wendo.
27Na hono wijelele witujile sawo mu nzila yono si yinojeye,
wumanye vyono wukuwenjiza we mhuga yako mu magayo.
Holeka wulecele lukulu kulya mafupo,
holeka nagwe kowumipa vilo vinji.
28I wanhu we ling'ani, wamulaga kwihwesa, ho wapitula
Ninga i wabi wapitulaga musunho, no kuleta mazozo.
29I wanhu we ling'ani lono wakulomba,
Muwaha Mulungu kawahulicizaga.
Langa i wabi, si kawacelelelaga yaye.
30No wusu wono wina nyemo, wusangalazaga nhumbula.
Nazo zinghani ziswanu, ziletaga wusangalavu.
31Hono wuwe mupelu kuhulika zo wufundwe, wina mahala.
32Ninga hono wuwe wuli ng'anje ku wufundwe,
kokwitamisa go mweneco.
Na hono wuvumile kufundwa, kowa na nhumbula swanu.
33Ne cogopo ca kuli Muwaha Mulungu,
wo wijize we mahala.
Yikunojeye weze wuli mwinenenyhezi
lono wukali sinatuga lukumyo.
Cigogo Bible © Bible Society of Tanzania, 2002.