Zimbazi 13
13
1U mwana we mahala,
kahulicizaga wijize wo sogwe.
Ninga mwana mubezi,
si kavumilaga masutya gakwe.
2Ne wanhu waswanu,
wopegwa vihumbilizwa vyawo,
mu nghango ye mefumo gawo.
Ninga i walambi wekalaga,
wadabuciye wugazi du.
3Wilanjilile kuli zono wukulonga.
Wuwukamise wumi wako.
Ninga munhu mono si kelanjililaga mu milonjele yakwe,
keyongomezaga mweneco.
4Ne nhumbula yo munhu mudoba,
hamba yisulumile cinji,
si kosuma kucituga yaye.
Ninga munhu muhidimbazi,
katugaga vyose vyono kasakaga.
5We ling'ani, yawusulile wulambi.
Ninga u mubi,
ketumaga makani ga cevu kanyhi ga soni.
6Ling'ani, yiwacitilaga we ling'ani.
Ninga wubi, lyo lifwa lye wabi.
7Wanhu wanji wenozaga nha wagoli,
ninga kumbe ho wanghwenzele.
Na wanji wenozaga nha wanghwenzele,
ninga kumbe ho wagoli.
8U mugoli ketumamilaga sawo yakwe kwiponya wumi wakwe.
Ninga hasina mono kamogofyaga munghwenzele.
9Ne wanhu we ling'ani wehwanile limuli lyono
likumulika muno.
Ninga i wabi, wehwanile tala yono yizimile.
10Wusisi, wuletaga wiwanganile.
Holeka yili ciba kulondola wutazi,
hambi nha go mahala.
11Mu nghango ye mbela mbela
yono wukuyisawila sawo yako,
yo nghango kanyhi yono koyajiliziza musunho.
Ninga mono kakongholaga ko wupiligazi,
kokonjelezeka.
12No witumbilo wono wutinyaga kwijela,
wutamisaga nhumbula.
Ninga kolo yakutuga cono yakucisaka,
baho nhumbula yakwe yisangalalaga muno.
13Na hono wugabeze mejizo maswanu,
ale kokwiletela wugaye.
Ninga hono wugavumile, kowa mu mulamu.
14Ne mejizo ge mahala, wo muvwilo wo wumi.
Nago gokutaza wiponye wumi wako lono wuli mu mbali.
15Wizuce wuswanu wuletaga mahweso ge lihewa.
Ninga wawo wono si wehuwilwa,
wali mu nzila yo wuhodanjice.
16I wanhu we mahala,
nhondo zose wamulaga kusimya, wehwesa,
lono wakali si netuma cinji.
Ninga i walele weyagazaga wulele wawo.
17U mutumwa mubi kaletaga wiwanganile.
Ninga wono wetumbilwaga waletaga mulamu.
18Munhu wowose mono si kendaga kulanjizwa kowa muciwa
no kukozwa cevu.
Ninga mono kavumilaga wulanjizwe, kotuga lilumbo.
19Ninga yo nghani swanu hono wucituje cono kusakaga!
Ninga i wanhu walele,
walemaga kuwuka mu wituma zimbi.
20Wilunzaje na we mahala,
nagwe kotuga mahala.
Ninga hono wilunze ne walele,
kokwajilila.
21Magaziko, gawatyatililaga i wabi,
hanhu hose.
Ninga we ling'ani,
wohumbilizwa ne vinhu viswanu.
22No munhu muswanu kowa ne sawo yono kosuma
kuwalecela ne wezukuluwe.
Ninga sawo ye wabi yiwutilwaga we ling'ani.
23Ne migunda yono si yilimwaga,
yolela ndigwa nyinji ku so waciwa.
Ninga i wanhu wono si wali ling'ani wahodangaga vinhu.
24Na hono wulece kumutowa mwanago lono yakusutya,
wumusulile.
Ninga hono wuwe wumwendile, komufunda.
25I we ling'ani wekalaga wena ndigwa yono yiwakwiliye,
Ninga i wabi, wekalaga wali nzala vilo vyose.
Cigogo Bible © Bible Society of Tanzania, 2002.