Isaya 7
7
Mulungu yakumusindamika Mutemi Ahazi
1Kukawa mu vilo vya Ahazi u mwana wa Yotamu, kanyhi u mwizukulu wa Uziya, lono yali yatemile mu Yuda, wulugu wukaza. Lezini u mutemi wa Siliya, na Peka u mwana wa Lemaliya u mutemi wa Isilayeli, watemi wawa, wakayihoma Yelusalemi, ninga si wasuma kuyiteka yaye. 2Nayo Ahazi mutemi wa Yuda, yali yeza kuhulika nha vyono walugu walawa Siliya, nawo wakondya kwinjila mu yisi ya Isilayeli, hodu mwene Ahazi, hamonga ne wanhu wakwe, wakawa kutuga woga wuwaha muno, wakawa kwanza kucicima kotya mibici yono yikuputwa ne libeho.
3Muwaha Mulungu yakawa kumulonjela Isaya, yakamutya, “Alu wumusolaje Sheyali-yashubu u mwanago mubitane nayo, kuli mutemi Ahazi. Momwagana Ahazi ha nzila hono ho wali i wahona myenda, ha ndumilizo ye likololozi lyono liletaga malenga ku wulawa ku cilamba ca ha ka canyha. 4Wukamulonjele vyono yetuze du, hamba yalece kuwa na woga, hamba kuzilika mu mutima wakwe. Hambi likuwo lyo mutemi Lezini ne wanhu wakwe wa Siliya, hamonga na wo mutemi Peka, nha gasina mbali yo yose, hambi nha wenha vizinga vyejete vyono vikufungha lyosi du. 5Hambi Siliya hamonga na Isilayeli no mutemi wawo, nha wanoza maheho. 6Hambi nha wakuhila wayisole Yuda, wawogofye wanhu, ho wamutemye u mwana wa Tabeli.
7“Ninga ane no Muwaha Mulungu,
nghumulonjelenyi nha vyono zizi si zokwijelela lukulu.
8Ku sokoci?
Yili vilungo yicize Damesiki,
na vyono likaya lyayo liwaha hamonga ne Damesiki yeneco,
nha yisina vilungo yicize mutemi Lezini.
Nayo Isilayeli mu myaka makumi mutandatu ne 'hano,
yowa yakondya kupondangwa yilece kuwa yikungugo.
9Hamba nhavivyo,
nayo Isilayeli nha si yili vilungo yicize Samaliya,
ne likaya liwaha lya Samaliya,
hamonga ne Samaliya yeneco,
nayo si yili vilungo yicize mutemi Peka.
“Holeka hono wulece kwihuwila,
mbeka hamba si kosuma kusikamywa.”
Citanjilo ca Imanuweli
10Muwaha Mulungu yakamulonjela kanyhi Ahazi yakatya, 11“Ale, wumulombaje Muwaha Mulungu, u Mulungu wako, yakulajile citanjilo Ne citanjilo cico, cosuma kwijela ku wulawa kusi muno, ku yisi ye wafu, hamba kucanyha muno ku wulanga.” 12Nayo mutemi Ahazi yakapitula yakatya, “Aa, ng'o! Ane si nosaka wundajile citanjilo, hambi nha si nghwenda nimujele Muwaha Mulungu.” 13Ku soko yiyo, nayo Isaya yakapitula yakatya, “Ale, hulicizenyi ta anye mo mhuga yo mutemi Dawudi. Yo nghani 'mbi muno kuli'nye lono mukuwuhodanga wukangalizi we wanhu, alu mukwihwesa mosuma kuwuwusa no wukangalizi wo Mulungu hongo? 14Ale, du, ninga Muwaha Mulungu mweneco komupelenyi citanjilo. U muhinza kodinghula 'nda, nayo kolela mwana wa cilume, ne litagwa lyakwe kocemwa ‘Imanuweli.’ ” 15Na mu vilo vyono mwana yuyo kolowa yawahapa, no kumanya kuhagula zimbi ne ziswanu, i wanhu lulo wolowa kung'wa mele, no kulya wuci. 16Ninga hamba na lono vilo vivyo vikali nafika, i zi'si ze watemi wawo wejete Lezini na Peka, wono wakukogofya, zolowa zakondya kulekwa zili bwete. 17Ale, alu Muwaha Mulungu kokuletela gwegwe ne wanhu wako, hamonga ne we mhuga yo wutemi vilo vye magazo mawaha muno, kuciza magazo gose gono gamuzizenyi, ku wulawa lono wutemi wa Isilayeli wetemanulila mu wutemi wa Yuda. Ne magazo gago, kologaleta Lezini mutemi wa Ashuli.
18“Ne vilo vivyo kolo vikuza, Muwaha Mulungu kolowacemeleza wanhu wa Misili, waze wenji muno nha mahazi, ku wulawa kutali mu zimhelo ze likolongo lya Nile, hamonga ne wanhu wa Ashuli, nawo waze wenji muno nhe zinzuci. 19Wolomata mu malolo, na mu zimhango na mu mabwe, nawo wolomema hanhu hose mu vititika vye mamivya, sunga na mu wudimilo we zi mitugo.” 20“Ne vilo vivyo kolo vikuza, Muwaha Mulungu, kolomutuma muceti we zimvwili ku wulawa ku nhumbi ye likolongo lya Efulata, u mutemi wa Ashuli! Nayo kolomucetenyi zindevu zenyu, ne zimvwili za mu mitwe yenyu, hamonga no wembe wa mu miwili yenyu. 21Na mu vilo vivyo kolo vikuza, hamba no mulimi, mono kowa yena ng'ombe ndodo monga, hamonga na mhene nyejete du, 22kolowa kutuga mele menji du muli zizo, munghango nha vyono kowa kusaka. Na mbeka, wawo wono wolosigala womi mu'si, wolowa kutuga mele menji du, hamonga no kulya wuci winji muno.”
23“Na mu vilo vivyo kolo vikuza, migunda miswanu ye mizabibu, yono yina mizabibu elufu monga mugati yayo, yono yina cifo ca fweza elufu monga, yolowa yisopile masukuzi gose hamonga ne mabijili. 24Ne wanhu wolowa kubita wena ne mapinde gawo ne zisonga, wawa kupelemba mumo. Na mbeka yisi yose yolomema mabijili du, hamonga ne mbago ye mamivya. 25Na mu vigongo mose mono mwalimwagwa zindigwa, molocindika mabici ge mamivya, gono munhu si kosuma kwinjila. Langa wolowa wudimo wa ng'ombe du ne zingholo.”
Cigogo Bible © Bible Society of Tanzania, 2002.