Isaya 61
61
Luganuzi luswanu lo Wukombozi
1Muwaha Mulungu,
kamemya'ne no muhe wakwe.
Kasiwanula ho niwaganulile luganuzi luswanu i waciwa,
niwaponye wono wadejepe mu nhumbula
niwanzize zo wulecelwe wawo awalya i wahamywa,
no wulecelwe wa kuli wafungwa mu jela.
2Kanhuma ho niwalonjele vyono lipango lyafika,
lyono u Muwaha Mulungu kowaponyezya
wanhu wakwe, no kuwasumila kuli walugu wawo.
Kanhuma ho niwasindamice wono wali mu wusungu.
3Ho niwasangalaze no kuwapela nyemo
wanhu wose wono wali mu Sayuni,
wono wali wali mu wusungu no wukalale
wawuce mu wukalale, wembe lwimbo lo lukumyo.
Kanyhi wawe nhe mibici i mihadikwe no
Muwaha Mulungu mweneco.
Kanyhi wawe kwituma zo mugoloka.
Nayo Muwaha Mulungu ho yakumizywe muli zono yetuma.
4Kanyhi wologazenga ne makaya gono
gali gakondya kuwa matongo.
5Nye nyo wanhu wangu, i wajenzi wo wolomwitumamilenyi
kanyhi wo wolowa wo wadimi we mitugo zenyu,
no kumulimilenyi ne migunda yenyu,
hamonga no kuyilanjilila ne migunda yenyu ye zabibu.
6Nanye molowa mumanyice vyono muli
wakohani wo Muwaha Mulungu
i wetumami wo Mulungu wetu.
Kanyhi moloyisangalalila sawo ye makungugo,
akuno mukwilumba nha vyono yeza yenyu nyenye.
7Ne cevu cenyu colowucila lukulu.
Hambi lu nha molowa mwikaye mu yisi yenyu nyo weneco.
Ne sawo yenyu yolokonjelezeka kali kejete.
Ne nyemo yenyu yolowa ye cibitilila.
8Muwaha Mulungu yakutya nhavi,
“Ane nyendile ze ling'ani, kanyhi nizisulile
zo wuhizi na zo wiwonezi.
Nane nowahumbiliza wanhu wangu ko wihuwilwa.
Kanyhi nonoza nawo cilagane ce cibitilila.
9Kanyhi wolowa wamanyice muno muli makungugo.
Na muli wose mono kowawona, komanya nha vyono
wo wanhu wono nakondya kuwamotya.”
10Yelusalemi yisangalaliye muli zono
Muwaha Mulungu yazitumile.
Yehwana nha bibi halusi mono yenozeleze
yabite ku wutozwe.
Mulungu kakondya kuyivwika Yelusalemi
mwenda we mhonelo no wusume.
11Nha vyono zimbeyu zicindikaga ziwa kuwiluka,
ale nhavivyo no Muwaha Mulungu nayo
vyo kowaponya wanhu wakwe.
Ne makungugo gose gomukumya mwene.
Cigogo Bible © Bible Society of Tanzania, 2002.