Isaya 52
52
Mulungu koloyiponya Yelusalemi
1Gwe Yelusalemi, weze ne vilungo,
wuwuvwale wuwaha wako kanyhi!
Agwe 'gwe kaya lyono lyelile lyo Mulungu,
wivwikaje kanyhi nhojo yako!
Hambi i wanhu wono si wamumanyile Mulungu,
nha si wolokwinjilila lukulu kanyhi mu milango yako.
2Wikung'unhaje wilejehe 'gwe Yelusalemi,
winukaje wuwuce mu manghundi,
wikale mwi'goda lyako lyo wutemi!
Muwopole manyolo gono gali gamuwopilenyi
anye nyo wanhu wa Sayuni!
3Nayo Muwaha Mulungu we mihanga, yakuwalonjela wanhu wawa yakutya, “Anye mwaguzwa bwete ku wawanda, kanyhi mokombozwa bwete, si molavywa hamba sendi monga yaye. 4Na lono mwabitila kwikala ku Misili nha muli wajenzi, mwabita ko kwiyendela nyenye nyo weneco. Ninga Mwashuli yakamusolenyi kwe vilungo, yakamutegulenyi kutali, hamba si mwalipwa cinhu co cose yaye. 5Nalu kanyhi zikejela zo zi zilya na ku Babiloni. Anye mwasolwa, ninga hamba si mwalipwa cinji yaye. Na wose wono wakuwa kumutemenyi wakuwa kwilumba no kwivuna hamonga no kulajila lubedegalo kuli'ne. 6Ninga mu vilo vyono vikuza, agwe ho kolomanyila nha vyono ane yo nene Mulungu mono nalonga kuli'gwe.”
7Yo nghani yo wizine lono wukuwona munhu yakuza
yakolile mu matunda, yakuleta nghani swanu,
nghani yo mulamu!
Mono yakuganula zo wusume, yakuyitya Sayuni,
“Mulungu wako yo mutemi!”
8Nawo walindiliza likaya, wazozize hamonga so nyemo!
Hambi nha wakuziwona ne meso gawo weneco,
vyono Muwaha Mulungu yakuwuya ku Sayuni!
9Nanye nyo matongo ga Yelusalemi, muzoze so nyemo!
Hambi Muwaha Mulungu nha koliponya likaya lyakwe
no kuwasindamika wanhu wakwe.
10Muwaha Mulungu kolokwitumamila vilungo vyakwe
vyono vyelile, yawaponye wanhu wakwe,
ne yinze yose yoloziwona zizo.
11Mumanye vyono wose mwakondya kuwuka mu Babiloni,
anye wose mono muvidinghulaga viya vye Nyumba
yo Mulungu!
Kanyhi mulecele lukulu ku vipamiza vinhu vyavu,
Mutuluce muwuce, akuno mwelile.
12Ninga muhinzo wuwu,
mowa musina soko yo kuwucila musunho,
kanyhi mowa musina soko yo kwihema.
Hambi u Muwaha Mulungu u Mulungu wenyu nha yo
komutonjenyi no kumucitilenyi mbavu zose.
U mwitumami mono yatuga magazo
13Muwaha Mulungu yakutya nhavi,
“U mwitumami wangu kolomoteswa mu mulimo wakwe,
nayo kolotuga lilumbo yiwaha muno muno.
14Ne wanhu wenji watinuswa muno wali weza kumuwona,
hambi mumbwa yakwe
nha yali yihodanjice sunga yikawa vikamu kwijela nha munhu.
15Ninga aluno makungugo menji gomwizina
sunga ne watemi si wololonga cinji yaye so wizine.
Nawo wololanga no kwizuka cinhu cono wali
wakali nacimanya yaye.”
Cigogo Bible © Bible Society of Tanzania, 2002.