Isaya 50
50
1Muwaha Mulungu yakutya,
“Alu mukwihwesa nha vyono nali nawawinga wanhu wangu,
nha vyono munhu kamupelaga mucekulu wakwe talaka?
Alu ceti ce talaka ho cili hayi lo?
Hamba mukwihwesa nha vyono nali nawaguza ku wuhamywe lo,
nho munhu mono kaguzaga wanagwe ku wuwanda?
Ng'o ye!
Anye mwabita ku wuhamywe ku soko yo wubi wenyu,
mwabita kuko, ku soko ye masutya genyu.”
2Alu so cici wanhu wangu si wanhuciza
lono nawabitila ho niwaponye?
Na so cici lo, na lono nawacemaga,
hamba si wanyidika yaye?
Hamba wakuwona ane nili musocele
si nosuma kuwaponya lo?
Alo wene si wamanyile nha vyono
ndahile kulilajiliza lilenga linyale lwa kamonga,
no kuganyaza makolongo, yiwe nyika,
ne zisomba za mumo zifwe so wula malenga.
3“Kanyhi na vyono nosuma kuganoza mavunde gawe matitu,
hawe nha ho cili cililo co kuwalilila wono wafwiye.”
I cihuliko co Mwitumami wo Muwaha Mulungu
4Nayo Muwaha Mulungu nha yanyijiza zono nolonga,
ho sume kuwasikamya wono wakataye muno.
Nhondo zose hakali mitondo,
kanozaga niwe muhidimbazi kuzihulika zono yakunyijiza.
5Muwaha Mulungu yamhelile wizuce,
nane nghali namubeza, hamba kumuleka yaye.
6Nawapitucila mugongo wangu wanhu wono wanhowaga,
na lono wanhovulaga, ane si nawemila yaye,
sunga na lono wanghulaga zindevu zangu no
kunhowa mu wusu wangu.
7Ninga hamba nhavivyo,
matovulo gawo si ganhamisa yaye,
hambi u Muwaha Mulungu we mihanga
nha yamhela wutazi.
Nane nghekamiliza, nghagakangalila.
Hambi nha nali manyile vyono si nokozwa cevu,
8hambi Mulungu nha yali behi nane.
Na vyono kanyhi kombala ane sina wubi.
Hambi nani kanyhi mono kokwijelela yesumanize nane?
Ale, yaze cibitane ku mahakama yakasitace!
9Hambi Muwaha Mulungu we mihanga
nha yo kasumilaga 'ne.
Alo nani kanyhi mono konyitya nili musutyi?
Wono wakusitaka wose nha wotiza,
wosakala wose nho mwenda wono wulijigwe ne makuni.
10Nanye wose mono mumuhulice Muwaha Mulungu,
no kuzihulika zinghani zo mwitumami wakwe,
mumanye nha vyono mokola mu nzila yo wutitu tuku.
Ninga anye mumwitumbile du Muwaha Mulungu
mumwegamile Mulungu wenyu.
11Nanye wose mono mwikalaga mukwihwesa zo wuhile
wubi wo wuhodanga lilumbo lye wayenyu,
nyenye yo mokwiyongomeza no
wuhile wenyu wubi nyo weneco.
Nayo Muwaha Mulungu yo kozinoza zizo ziwe nhavivyo.
Nanye molotuga magayo mawaha muno muno.
Cigogo Bible © Bible Society of Tanzania, 2002.