Isaya 41
41
Mulungu wo witumbilo kuli Isilayeli
1Mulungu yakutya nhavi,
“Anye nyo zi'si zo kutali,
munyamale du twii, muhulicize nene!
Anye mwiwikanizaje du,
mulete zinghani zenyu ku wuling'anizi,
hambi nha motuga cilejeho co kuzilolosa.
Cihangulizaje hamonga, ciduwane,
cimumanye mono yali ling'ani.
2Mwene nani lo mono yaleta wusume
ku wulawa kucilima no kumupela vilungo vyo wusume
hanhu ho hose hono yakubita?
Hamba nani mono kamupelaga vilungo
vyo kuwasumila watemi, hamonga ne makungugo?
No mumaje wakwe,
wukuwatemanga wagwa ho hasi,
wawa nha manghundi.
Ne zisonga zakwe zikuweyagaza nhe mawaje,
gono gakupemheluswa ne mbeho.
3Yakuwawinga no kukola yapolile.
Kanyhi yakuwa yamanyhile muno kuciza,
yakuwatyatya sunga mo mu nzila yono yali
yakali si nayikola kwe magulu gakwe!
4Mwene nani lo mono yazinoza zizi zijele?
Hamba nani mono yawuwika mwamulizo we zinghomo?
Yo nene, ane no Muwaha Mulungu,
yo nene mono nali nili baho ku wulawa ha mwamulizo,
kanyhi yo nene du no Muwaha Mulungu,
mono nowa baho ha ndumilizo ya zose.
5“Ne wanhu wose we zi'si zo kutali,
nha wakondya kuziwona zono netuma.
Alu nawo wenjilwa no woga, wakucicima so woga.
Holeka nawo luno, wekonghola no kuza.
6Nawo i wanghula wo kusesa,
alu wakwiyitaza no kwisinyhimika weneco wose.
7I waselemala nawo,
wakuwalonjela i watyana zahabu wakutya,
‘Ale mwetuma mulimo muswanu!’
Nayo mono yakucikulunjiza cihwani,
yakumusindamika mono yakucilunza-lunza
hamonga ne misumali, yakutya,
‘Ka! Mwene wacilunza viswanu si.’ ”
Na hanyuma, wawa kuvipanga vihwani hanhu
hamonga no kuvitowela ne misumali.
8“Ninga anye nyo Isilayeli,
anye muli wanhu mono nene namuhagulenyi,
anye nyo wana wo mwendece wangu Abulahamu.
9Nane nghamusolenyi ku wulawa ku mhelo ze yinze.
Nghamucemenyi ku wulawa ku zimhilimo zayo.
Nghamulonjelenyi nghatya,
Anye muli wetumami wangu.
Yo nene mono nimuhagulenyi,
hamba si nomutajenyi yaye.
10Holeka mulece kogopa,
ane nha nili hamonga nanye!
Ane yo nene Mulungu wenyu,
holeka mulece kogofywa na cinji co cose!
Ane nomupenyi vilungo, kanyhi nomutazenyi.
Nomudimenyi, kanyhi nomuponyenyi.”
11“Na wose wono wakumukolelwenyi likuwo,
wolosumwa no kukolwa cevu.
Na wose wono wakulewana nanye, wolofwa.
12Wajililile lukulu mono yinze, hamba kwijela kanyhi.
13Ane yo nene Muwaha Mulungu, u Mulungu wenyu,
mono nghumusikamyenyi nghutya,
Mulece kogopa, ane nomutazenyi.”
14Kanyhi Muwaha Mulungu yakutya,
“Anye nyo Isilayeli, hamba muwe muli wacefu,
kanyhi muli wasocele nhe nyongololo,
ninga mulece kuwa no woga,
hambi ane nha nomutazenyi.
Ane mono nelile, u Mulungu wa Isilayeli,
yo nene du mono nomuponyenyi.
15Ane nomunozenyi anye muwe nhe lituli
hamonga no mutwango wayo mupya,
nanye mogakobonga matunda no kugatenjelemula,
navyo vigongo vyotijinhika viwe manghundi.
16Nanye mogesa mucanyha,
nayo mbeho yogapemhelusa,
nago gokwiyagazwa ne civulavumbi.
Nanye baho nhondo, ho mosangalala,
hambi ane nha yo nene mono nili Mulungu wenyu
nanye nhondo, ho momhela lilumbo
ane mono nelile, u Mulungu wa Isilayeli.
17“Na kolo wanhu wangu wakulondola malenga,
lono malaka gawo ganyala so nyhilu ye malenga,
ane Muwaha Mulungu nowapitula wulombe wawo.
Ane no Muwaha Mulungu wa Isilayeli sinowaleka yaye.
18Nane nogatula makolongo gahulume
mu vigongo mu hanhu hakavu,
ne mivwilo ye malenga yihulume mu malolo.
Noligalusa linyika hawe malamba ga malenga,
ne yisi nghavu hawe ne mivwilo ye malenga.
19Noyicindya mibici ye mihagata mu nyika
hamonga ne mikungugu, ne mibici midodododo,
hamonga ne mizeyituni.
Ne mbago yotita mu yisi nghavu,
yowa mbago ye mibici ye minanasi ne minghulwa,
hamonga ne mibici yinji yinji.
20Nawo wanhu wose woziwona zizi,
wamanye nha vyono nene Muwaha Mulungu
yo nitumile zizi.
Nawo ho wokwizuka nha vyono Mulungu
mono yelile wa Isilayeli, yo yazinozize zizi zijele.”
Muwaha Mulungu yakuyibedegala milungu yo wulambi
21U Muwaha Mulungu, u mutemi wa Isilayeli yakutya,
“Nye nyo milungu ye makungugo,
ale mulete zinghani zenyu
Mulonje nghani zono mwina nazo!
22Ta muze mucilonjele zono zokwijela
mu vilo vyono vikuza,
nase ho ciwe cimanyiye lukulu kolo zikwijela.
Ale mulolose ha mwande yo wuling'anizi zono zapuluta,
mucilonjele ne nhunizo yayo.
23Kanyhi mucilonjele na zono zolokwijela hanyuma,
nase baho ho comanyila vyono kumbe
nanye muli milungu!
Kanyhi mosuma kucinozeza
nha vyono nyenye mwendile,
hamba swanu, hamba kuciletela matamwa,
mucimemye woga hamonga ne cogopo ca kuli'nye!
24Ninga ase cimanyile
nha vyono zose zono mukwituma,
yo nghani ya bwete du na wose wono wakumuhembenyi,
wakwikomaza wali wene du!
25“Ninga ane nakondya kumuhagula munhu yunji,
mono yekaye ku lubavu lwa kusumuka.
Nane nomutuma yayanzize milewo
yakwe ku lubavu lwa kucilima.
Nayo kowazumhila i watemi,
yawasambanjile nha malongo,
nho muwumba nyungu vyono kaluwaga lilongo lyakwe.
26Mwene, nani wa muli nyenye mono yali yakondya
kuzimanya zizi nha vyono zolokuza,
nase ho cimumanye?
Ninga ase cimanyile nha vyono,
hasina hamba monga wa muli nyenye,
mono yazilonga zizi,
hasina hamba yunji mono yamuhulicenyi mukuzilonga!
27Ane yo nene Muwaha Mulungu,
mono nali mulongozi kuyilonjela Sayuni zinghani zizi.
Kanyhi nghategula zinghani na ku Yelusalemi,
nghawalonjela nghatya,
‘I wanhu wenyu wakuza, wakuwuya kono kaya!’
28Nane nali neza kuyilanga milungu yiyo,
nghawona vyono yose, yisina cono yopitula,
hakawa hasina hamba yono yapitula zono nayiwuzaga.
29Holeka milungu yiyi yose, yo nghani ya bwete du,
siyosuma hamba kwituma cinji co cose
kanyhi yisina hamba vilungo bwete.”
Cigogo Bible © Bible Society of Tanzania, 2002.