Isaya 35
35
Nzila yo Wusiwanulwe
1Hambi nyika nha yosangalala.
Ne maluwa gobonhola mu mbago.
2Nayo nyika yolokwimba no kusangalala so nyemo,
hambi nha yolowa yanoga yawa swanu
nhe matunda ga Lebanoni,
na kanyhi yowa yina moso nhe migunda ya
Kalimeli na Shaloni.
Ne wanhu wose woloyiwona nhojo yo Muwaha Mulungu.
Kanyhi wolowuwona wuwaha ne vilungo vyakwe.
3Muyipele vilungo miwoko yono yisoceye,
hamonga ne mafugamilo gono gakucicima so wusocele.
4Muwalonjele wono wena nhumbula nyoga, mutye,
“Ale, mweze ne vilungo, mulece kuwa na woga!
Mulungu kokuza no kumuponyenyi
kokuza yawalipicize walugu wenyu.”
5Ne wabofu wolonuguzwa meso, wawone,
nawo we ciziwi, wolosuma kuhulika.
6Nawo we citewe, wolozumha-zumha no kuvina,
nawo wono wali cibwibwi, wolokwimba na nyemo.
Vikolongo vye malenga vyolohuluma mu nyika.
7No musawawa wono wuli moto,
wolopituka wuwe yilamba,
ne yisi nghavu, yolomema mivwilo ye malenga.
Ne hanhu hono macewe gekalaga,
holocindika mahanze, hamonga ne madete-lulenga.
8Kanyhi baho holowa na nzila mbaha,
ne nzila yiyo yolocemwa “Nzila yo Wele.”
No munhu mubi si koloyikola nzila yiyo
langa yowa ku soko ye wanhu wono wayityatizye
hamba wawe walele,
ninga si wokwajilila mu nzila yiyo.
9Ne masimba si golowa mumo yaye
hamba malimu makali, si goloyikola nzila yiyo.
Langa wawo du wono Muwaha Mulungu
yakondya kuwaponya wawo du
wo woloyikola nzila yiyo wakuwuya ku kaya.
10Nawo wolokwinjila mu Yelusalemi wasangalaye,
wakwimba ne mazi mawaha so nyemo,
wolowa wasangalaye cibitilila,
hambi wukalale no wusungu
nha vyolowucila lukulu muli wene.
Cigogo Bible © Bible Society of Tanzania, 2002.