Isaya 29
29
Zimbali zono zoyagana Yelusalemi
1Woyi hee, kuli likaya lya Yelusalemi,
lyono co cikumbicilo co Mulungu!
Woyi hee 'likaya lyono Dawudi yasita nghambi!
Ale, mulece mwaka monga,
hamba myejete yipulute,
nalyo liwe lijendeleye ne zisikukuu zalyo.
2Ninga hanyuma Mulungu koliletela
wongomele likaya lilyo lyono lyacemwaga,
“I cikumbicilo co Mulungu.”
Na mu mapango gago, colowa cililo no wukalale,
ne likaya lyose lyolokwihwana cikumbicilo
cono cihiliwe sakami cose.
3Nayo Mulungu kololihoma likaya,
yalipilime, yalizinjilize mbavu zose.
4Nalyo likaya lya Yelusalemi,
lyolowa kutakanya hasi nho munhu mono yena mhepo,
no wulonje walyo,
wolowa wa wupwepwe wono wukulawilila baho hasi mu manghundi.
5Ninga nago mapuga ge wajenzi i walugu wako,
golopemheluswa ne mbeho nhe manghundi.
Ne mapuga gawo ge wasilikale gono gakogofya,
golopemheluswa nhinicizo nhe mawaje.
6Ninga u Muwaha Mulungu we mihanga,
kolomuponyenyi anye mu mbali ze madidimo,
hamonga na ze matulo ge'si.
Mulungu kololeta libeho lyo mukukunzo,
hamonga no moto we malambi mawaha,
7no moto wuwo wolowongomeza wasilikale
wose we makungugo gose
gono gakulihoma likaya lya Yelusalemi,
likaya lye cikumbicilo co Mulungu.
Wolokongomezwa hamonga ne vitwalo vyawo vyose vyo wulugu,
hamonga ne vinhu vyawo vyose vyono wena navyo.
Vyose vyolokwajilila lukulu nha ndoto,
vyowa nhe vinhu vyono vyali kwihweswa du ne cilo.
8Ne makungugo gose gono golowa gekongholeye
hamonga ho galewane ne likaya lya Yelusalemi,
golokwihwana no munhu mono yadabuce,
alu yakulota yakulya ndigwa,
ninga kumbe kolo yakusinhuka mu zinhongo,
yakwagana nzala vyo yikutama du.
Hamba lunji nho munhu mono yena nyhilu muno muno ye malenga,
alu yakulota yakung'wa malenga,
ninga kumbe kolo yakusinhuka mu zinhongo,
yakwagana nyhilu ye malenga vyo yimwibate du.
Wu wula kucelelela kuli zo wusugulwe
9Na hono mwipele ku wulele nyo weneco,
na mbeka mocila kuwa walele!
Na hono mwipele ku wubofu nyo weneco,
na mbeka mojendelela kuwa wabofu!
Na mokwijela mugalile,
ninga kumbe ho si muwung'weye no 'jimbi yaye.
Kanyhi mokwijela mukupebesuka-pebesuka,
ninga kumbe ho si muwujezize bwete no wujimbi.
10Hambi Muwaha Mulungu
nha kamupelenyi nhongo ze lifwefwe,
ho mugone hawaha.
Kanyhi yali yiwanojeye wawizi wawe go meso ge wanhu,
ninga Mulungu yakondya kuwabofuza meso gawo.
11Ne zinhunizo zo wugubulilwe wose wo wuwizi, wowa muhundikwe kuli'nye. Wowa nhe zinghani ze citabu cono cigubikwe kanyhi cinamatizwe ne cinamatizo. 12Na hono mumupele munhu mono si yamanyile kusoma, mumutye yamusomelenyi, nayo ko mupitulenyi nha vyono mwene hamba si yamanyile yaye kusoma.
13Ninga nayo Muwaha Mulungu yalonga yakatya,
“I wanhu wawa, wenozaga nha wakuhemba nene,
ninga kumbe ne zinghani zawo ho zisina nhunizo yo yose,
ne zinhumbula zawo zili kunji caka.
Ne cogopo cawo ca kuli'ne nghani ya bwete du,
hambi wene nha wakutyatya wulajilize we wanhu,
hamonga ne myoto yono wayizoweye
nha vyono wakondya kwiyijiza.
14Ninga nane nowatowa nhinicizo kali kenji.
Na muli wanhu wawo we mahala,
wolelepa, nawo wasugu,
no wusugu wawo wowa wa bwete du.”
Witumbilo wa mu vilo vyono vikuza
15Ninga woyi hee,
kuli wanhu wono wakujela kumuhundika Muwaha Mulungu mahweso gawo!
Wakuzinoza zinghani zawo cinyele akuno wakwihwesa
nha vyono hasina yunji mono yakuwawona yaye,
hamba kuzimanya zono wakwituma ng'o.
16Wakuzipitulanya zinghani.
Alu mwene u muwumbi we nyungu ne lilongo,
ca hayi ciwaha?
Hamba cinhuci cono munhu yacinozize cono kanyhi comutya,
“Agwe yo si gwegwe mono nozize?”
Hamba lunji cimutye,
“Agwe hamba si wumanyile yaye na cono wukwituma?”
17Na zizo lono zowa zikali zijendeleye kulongwa,
cidaha cidodo du, mbago mbaha yogaluka mugunda,
nawo mugunda kanyhi wowa kwijela nha mbago mbaha.
18Na mwi'zuwa lilyo kolo lyaza,
i we ciziwi wolohulika kolo citabu cikusomwa kwe'zi yiwaha.
Nawo wono wali cibofu,
wono wekalaga mu wutitu,
meso gawo golonugula wasume kuwona.
19Nawo i waciwa, hamonga ne wanhu wenenenyhezi,
wolotuga kamonga nyemo yono Muwaha Mulungu,
u Mulungu mono yelile we Waisilayeli kalavyaga.
20Na mwizuwa lilyo lyolowa lyo lizuwa
lyo mudumo kuli wanhu wono wendile kuwewonela wayawo,
no kumubedegala Mulungu.
Ne wanyo wubi wose, wolokongomezezwa lukulu.
21Mulungu kolowongomeza wanhu wose
wono wendile kuwasonjeza-sonjeza wayawo.
Hamonga na wono wendile kuwahijila i wabeno lajilize,
na wono wendile kulonga zo wulambi
ho wawapamanjize iwanhu
we ling'ani walece kunozezwa i ling'ani yawo.
22Holeka nayo Muwaha Mulungu,
u Mulungu wa Isilayeli,
mono yamuponya Abulahamu mu magayo,
yakutya, nhavi, “Alu anye nyo wanhu wangu,
hamba si molokozwa cevu kanyhi,
sunga no wusu wenyu si wolosininghalila lukulu kanyhi so cevu.
23Nanye kolo mwawawona wana wenyu wono nolomupelenyi,
nhondo ho mulamanyila vyono,
ane yo nene Mulungu mono nelile,
u Mulungu wa Isilayeli.
Nanye baho ho mulamhelela lilumbo no kwikala mu cogopo cangu.
24Ne wanhu walele nawo wolotuga wizuce.
Ne wanhu wono wekalaga wakung'ung'ulika nhondo zose,
nawo wolokwenda kulanjizwa.”
Cigogo Bible © Bible Society of Tanzania, 2002.