ESITERI 2
2
Esiteri yakolwa mukali wu mwami
1Lwinyima, lwuvutima vwu mwami Ahasuero vwali nivwakageha, yaazizagilira kwizuliza aga Vashiti yaali naakori kandi aga yaali nalagi gakolwe kuye. 2Kunangwa valala ku vahaani viziganagani vu mwami avaari himbi ligali kuye, vamuvolera, “Leka avakaana avasoleri vagima, avaveeye ni ligondo lilahi ligali, valetwe ku ivi. 3Unyala kotovola vatumikiri kutura mu vuli kivala chu vwami vuvwo, na uvalage valeete avakaana valahi vi ligondo lilahi mu lidaala linene hano lia Susa. Uvaviiki munyumba ya vakali mu vulindi vwa Hegai, kiziri ulindaa avakali munyumba yu vwami; kandi vahevwe ivindu viosi viu kwinihizira kandi viokolomba amagondo gaavo gave amalahi. 4Maku uvuguli umukana musoleri mulahi wa uyanza na umukole kuva mukali woovo mu vugono vwa Vashiti.” Yaga gayaanziza umwami, na yakola ndio.
5Kunangwa yaali ho mu lidaala linene lia Susa, Umuyuda uwalangwa Modekai, muyayi wa Yairo. Yaatulaa mu ihiiri ya Benjamini, na yaali kisukururwi cha Kishi na Shimei. 6Lwu mwami Nebukadineza wa Babiloni yavugula mwami Jehoyakini wi Ivuyuda kuzia mu vuhambe kutura jerusalemi, harara numuganda gwa vahambe, Modekai yaali mulala kuvo. 7Modekai yaavilukiza mwana wa amwavo baba weve, uwalangwa Esiteri, uwi lieta lilie liu Luheburaina liali Hadasa. Mukaana uyu yaali mulahi wi ligondo liukuyanziza. Lwa aviivuli weve vaakuza, Modekai yamuvirukiza kuli mukaana weve.
8Lwu umwami yaali niyakatuliza lilago lilie lihia kandi ni liakalandizwa, avakaana vanyingi valetwa kuye ha Susa. Esiteri yaali mulala kuvo. Oyo kandi kuli avandi, yavikwa hasi huvulindi wa Hegai munyumba yu vwami aha vakali vamenya. 9Hegai yayanza Esiteri ligali kandi naamuveera ligali. Yaatanga vwangu kumuha amaguta gu kunihiza ligondo lilie kandi viu kulia viduukiru nivilahi. Yamuha havundu ahalahi ligali hokomenya munyumba yu vwami ya vakali vamenya mu, kandi natuma avakaana saba avaatovolwa kutura munyumba yu vwami, kumulinda nu kumutumikira.
10Esiteri yaali nakikiri kuvuula ihiiri yeeye kandi avinyumba yeeye, kigira Modekai yaali naamugayi kokora ndio. 11Vuli lidiku Modekai yegendagendizaa imbiri wu mugizi mbula aduuki kumanya kuli Esiteri azizagiliraa kandi ikizizaa kwekoleka kuye.
12Imbiri wa vuli mukaana yaali nakikiri kuzia ku mwami Ahasuero, yaduukanaa amale muhiga mulala gwaviikwa ho ku vakali kwinihiza nukwelomba ligondo. Imieli sita jaali ju kwinihiza na maguta ga manemane, na imieli jindi 6 jaali ju kwinihiza na maguta gafunyaa umwayu gu kunihiza avakali. 13Lwa vuli mukaana yaatura munyumba ya vakali vamenya kuzia munyumba yu vwami, yiviika choosi cha yenya kuzia nacho. 14Hamugorova umukana oyo yaazizaa munyumba yu mwami kandi umugamba gwalonda ku yahilwa munyumba yindi umwa vakali vamenya, ma aviikwa mu vulindi vwa Shashigazi, kiziri chu mwami icha linda vakali vandi vumwami. Umukana umali kutura ku mwami siyaali anyala kwirana kuye kandi mba, vugira mwami kumuyaanza ligali, kumulanga ku lieta lilie.
15Esiteri mukaana wa Abihaili, mukaana wa amwavo isi Modekai, wamuvilukiza kuli mukaana weve umwene, yayanzizwa na vosi avamulolaa. Lwi ing'inga yaduuka ya Esiteri kuzia ku mwami Hegai, uwasingiliraa inyumba ya vakali vamenya mu yamuvolera yiviiki vuzwa zinguvu zia yamuvolera yiviiki. 16Kunangwa mu mweli gwi likomi, ugwalangwa Tebezi, mu muhiga gwaakola saba gwi liamiiha liu mwami Ahasuero, Esiteri yahilwa ku mwami Ahasuero munyumba yu vwami. 17Umwami yamuyanza kuvita vakana vandi vosi, kandi Esiteri yatovolwa mu vandi vosi. Umwami yavika itaji yu vwamihi ku mutwi gwa Esiteri, ma naamukora mukali weve mu vogono vwa Vashiti. 18Maku mwami yalandiza lidiku liokososa muvivala via yamiha viosi. Yasamiha avandu vavura kutunga vusuuru. Yahaana vihaanwa viaduukanaa mwami ahaane. Yalomba lilia linene kigira luyali lwa Esiteri, naagenihiza vimiliri na vatumikiri veve voosi
Modekai ahonyia livamwoyo liu Mwami
19Lwa vakana vagima viivungiza harara ing'inga yakaviri, Modekai yaali niyikaaye ha kirivwa chu mwami kuli mulala ku vatumikiri veve. 20Esiteri yaali nakikiri kwivuula ihiiri yeye kandi avinyumba yeye. Modekai yamuvolera utavoolera mundu woosi amakuva yaga mba, na yamuhulira goosi kuli yamuhulira lwa yaali nakikiri umwana mukekeeke mu lilerwa lilie.
21Mu ing'inga ya Modekai yaali munene munyumba yu mwami, iviziri viviri, Bigizana na Tereshi avalindaa mu vwingiliru vwu kwingira mu ving'oze viu mwami, vaasinyikira mwami Ahasuero kali nivalohiza kumwita makiriri. 22Modekai yamanya amakuva yaga, ma navolera Esiteri umukali wu mwami, naye yamanya navolera umwami aga Modekai yaali nanyooye. 23Lwa makuva yaga giideerwa ganyoolekaa ndi gaveeye agiligali. Kunangwa vasaza vombi vaasungwa ku musaala. Mwami yalaga amakuva yaga gang'oodwe mu kitabu cha makuva guvwami chu vwamihi vwivwe.
©Bible Society of Kenya, 2019