Tsutɨarika 1
1
Naitɨ kemɨtiunetɨarie
1Tsutɨapai Kakaɨyari muyuawi
meta kwie kaniutawewieni.
2Kwie puyuxamuriekai meta pakumawekai,
hapa 'ameukateewa yɨriya penukanakai.
Kakaɨyari 'iyarieya#1:2 'iyari. Ya 'eka. haa heima
pɨyeyeikakai.
3Hikɨ Kakaɨyari mɨpaɨ kaniutayɨni: «Hekɨariya ke'uneni».
'Ana hekɨariya kaniuneni.
4Kakaɨyari hekɨariya 'aixɨa katiniuxeiya,
'ana yɨriyatsata kanipata.
5Hekɨariya «tukari» katiniuterɨwa,
yɨriyata «tɨkari».
Hikɨ kaniukɨyɨre, ximerita kanayani,#1:5 tukari. Huriyutsixi wahetsiemieme, xeitukari putsutɨarie 'akayuneku tau, 'atsita 'uxa'arieka 'epauka.
mexɨakame tukari kanayani.
6Kakaɨyari mɨpaɨ kaniutayɨni:
«'Amakuyewa ke'uneni haa hixɨapa
ke'ipata haa taheima mieme meta kwiepa mieme».
7Mɨpaɨ katiniuyɨni. Kakaɨyari 'amakuyewa kaniutawewieni,
mipataxɨanikɨ haa, tahetɨa mɨtamakakɨ,
taheimata muyemakakɨ.
8'Amakuyewa, Kakaɨyari «muyuawi» katiniuterɨwa.
Hikɨ kaniukuyɨre, ximerita kanayani,
Hutarieka tukari kanayani.
9Hikɨ Kakaɨyari mɨpaɨ kaniutayɨni: «Haa muyuawitɨa mɨtama
ke'uyukuxeɨrieni 'axeikɨa,
'uwakitɨ ke'ayani».
Kemutayɨ mɨpaɨ pɨtiɨyɨ. 10Muwaki «kwie» Kakaɨyari katiniterɨwa,
haa muyukuxeɨri «haramara» katiniterɨwa.
'Ixeiyatɨ Kakaɨyari «'Aixɨa pɨ'ane», kaniutayɨni.
11Hikɨta Kakaɨyari mɨpaɨ kaniutayɨni: «Ketiutineni kwiepa,
ke'utineni tupiriyate yuhatsiyarite hexeiyatɨ,
'iteɨrite yutakari kehexeiyatɨkani meta yuhatsiyarite.
Naitɨ xexuitɨ kemɨtiupitɨarie».
Mɨpaɨ katiniuyɨni. 12'Ana katiniutineni naitɨ,
tupiriyate yuhatsiyari hexeiyatɨ,
kɨyexi yu'ikwaxi yuhatsiyari hexeiyatɨ kanayani,
naitɨ kemɨtiupitɨarie.
Kakaɨyari mɨkɨ 'aixɨa katiniuxeiya.
13Hikɨ kaniukuyɨre, ximerita kanayani,
hairieka tukari kanayani.
14Kakaɨyari mɨpaɨta kaniutayɨni:
«Meke'utixuawere muyuawitsie hekɨariwiwamete,
meke'ipata tukari tɨkari,
mɨkɨ 'inɨari meke'akɨne
taxarita, witarita, 'ahurakaku, xexerixa, tukari meta wiyari,
'inɨariyari meke'akɨne.
15Muyuawitsie meke'utimerɨkani,
kwiepata memɨhekɨariwiekakɨ».
Mɨpaɨ katiniuyɨni. 16Kakaɨyari hutame mamariwaweme hekɨariwiwamete kaniutiwewieni,
xeime 'anekame tau tukarikɨ mieme,
xeimeta yakɨ tixawatɨme metseri tɨkarikɨ mieme,
meta xurawetsixi tɨkarikɨ miemete.
17Kakaɨyari hekɨariwiwamete muyuawitsie katiniwarukayatsa
memɨhekɨariwiekakɨ kwiepa.
18Pɨwarutiwewi mɨme matsi waɨkawa memɨmamariwawenikɨ tukarikɨ tɨkarikɨ,
hekɨariya memɨpatanikɨ.
Hikɨ Kakaɨyari «'Aixɨa pɨ'ane», kaniutayɨni.
19Hikɨ kaniukɨyɨre, ximerita kanayani.
Naurieka tukari kanayani.
20Mɨpaɨ kaniutayɨni Kakaɨyari: «Yumɨiretɨ haapa meketeye'uwani,
meketeheɨwɨtɨkani wikixi kwie heima
muyuawi kemɨyewa».
21Hikɨ Kakaɨyari katiniwarutiwewieni yunaime metemamariwaweme haramaratsie miemete,
meta yunaime memɨte'ayeneniere 'etsimepepetɨ memɨkuyuatɨka memɨyuxiɨtɨa haata paitɨ,
meta yunaime memɨte'awɨwawe,
yuxexuime kemɨtiwarupitɨa.
Hikɨ Kakaɨyari 'aixɨa katiniwaruxeiya.
22'Aixɨa kaniwaruyurieni mɨpaɨ 'utaitɨ:
«Xekeneyuxiɨtɨaka xekeneyumɨiriyani,
xekenehɨneni haapa haramaratsie.
Wikixi meta xekeneyɨmɨiriyani kwiepa».
23Hikɨ kaniukuyɨre, ximerita kanayani,
'auxɨwirieka tukari kanayani.
24Kakaɨyari mɨpaɨ kaniutayɨni: «Xekeneyɨmɨiriyani kwiepa yunaitɨ xemayeyuyurini,
yunaitɨ memɨteyutewatsinɨa, yeutari meta,
yuhukama memuku'uwa kwiepa, yunaime kememɨteheupaɨme».
Mɨpaɨ pɨtiuyɨ. 25Kakaɨyari yunaime katiniwarunetɨani memɨteyutewatsinɨa,
yeutari, yunaime yuhukama memɨteku'uwa,
yunaime kemɨtiwarupitɨa.
Kakaɨyari mɨpaɨ kaniutayɨni: «'Aixɨa pɨ'ane».
26Mɨpaɨta kaniutayɨni: «Tewi tepɨtawewieni
tahepaɨ tiyuxexeiyame tahepaɨ tiyɨkɨhɨaweme.
Pɨtiwata'aitɨani ketsɨte haramaratsie miemete,
wikixi meta muyuawitsie miemete,
yunaime memɨteyutewatsinɨa,
yeutari,#1:26 yeutari (tsiriyatari waniuki), naitsarie kwiepa (hepɨrayutsixi waniuki).
yunaime memɨka'ukɨniwawe
yuhukama memuku'uwa kwiepa».
27Kakaɨyari tewi kaniutawewieni yuhepaɨ 'anekame,
pitawewi 'inɨarieya mayanikɨ yuhepaɨ 'anekame.
'Uki meta 'uka pɨwarutiwewi.
28'Aixɨa kaniwaruyurieni mɨpaɨ 'utaitɨ:
«Xekeneyuxiɨtɨaka xekeneyɨmɨiriyani,
kwiepa xekenehɨneni xeketene'aitani.
Xepɨhɨritɨarieni ketsɨte haramaratsie miemete, wikixi yunaime muyuawitsie miemete,
yunaime memɨka'ukɨniwawe yuhukama memuku'uwa kwiepa».
29Mɨpaɨta katiniwarutahɨawe: «Ne nepɨxeyetuiri kwiepa mieme 'iteɨrite,
naime 'iteɨrite yuhatsiyari hexeiyakame,
naime 'iteɨrite yutakari yuhatsiyari hexeiyakame.
Mɨkɨ naitɨ xe'ikwai pɨrayani.
30Tupiriya nepɨxeyetuirieni, xe'ikwai mayanikɨ,
yunaitɨ yeutari kwiepa memɨtexuawe,
yunaitɨ wikixi muyuawitsie miemete
yunaitɨ memeumaketɨka kwiepa».
Kemutayɨ mɨpaɨ pɨtiuyɨ.
31Kakaɨyari naime katiniuxeiya tita mɨtiutiwewi.
«'Aixɨa pɨ'ane», kaniutayɨni.
Hikɨ kaniukuyɨre, ximerita kanayani,
'ataxewirieka tukari kanayani.
தற்சமயம் தேர்ந்தெடுக்கப்பட்டது:
Tsutɨarika 1: hch
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2020, Wycliffe Bible Translators, Inc.