Gênesis 2
2
1Hiyáhoni Hoyakalu hali kamhaletatkalu tenhohne, tshiji, ptowru potukotka.
2Sete hohne rixinri ptowru potuko hkamhaleru rali kamhaletatka waneya rutuk-kamrurewletatka ptowruka hkamrureya.
3Waneya Hoyakalu kihlewaka htshinanwakatlu sete hohne rixinritka. Hoyakalu hitaklu sete hohne hapnanuxikalur-hohne rixyawaka klu tshinanu wale hohne potuko wale hkamrure rapnanuxyatka tshiji hkamhinixka mitshi.
Hoyakalu Hiyakoxyawaklu Jeji Piranapni
4Wane rix-kamhaletlu Hoyakalu tenhohne, tshiji.
5Hnikata kamhalexinixkalu hohne Tsru Hixikatshriwa Hoyakalu tenhohne, tshiji koxa, waneklu papko hikewani hitaklu, hike hiptshekawa klu tshinanu hi hyokanatawalu Hoyakalu hina. Hiyrun-koxa hike kamrurewaxyawalu tshiji.
6Seyni yatsinu tshiji tshikle hakanha hiyáhoni ruhakatkalu tshiji psoluka.
7Waneya Tsru Hixikatshriwa Hoyakalu kajpapahi kamhiylu jeji waneya jeji jripna rajpoka Hoyakalu hinnipha, rinniphakajyalu riwejinri hiyahokni jeji yinuwakatka riwejyawaka.
8Waneya Tsru Hixikatshriwa Hoyakalu hitaklu satu hitaklucha Éden tshinikowaka, tkatshi hichpajyawaka sreta, waneya wane rutaklu jeji hkamhaleru.
9Hoyakalu wan-hixkaklu ptowru hixatshri hahmuna kihleru sahiwhihlenutatshri hitaklucha hiptshejyawaka. Hitaklucha hanikajite rawa hahmuna hiwejikaluru heneklewatatshri hiwakatletatshri. Wanekoxlu satu hahmuna himaxyawakaplu kihleru hektut-koxa hiwakatletatshri.
10Wane koxlu satu wenu Éden hichpajikatshri, waleni hitaklucha hihakatshri, wanekni quatro skithayatkalu.
11Mitshikananu skitha hiwakni Pison. Walekni psol-tshijneko Havilá hyoliwjeta ouro hwiywaka tshijne.
12Wale tshijne hikamtuylo ouro. Wane koxlu phamluhalo hijhakaluro bdélio tshinkaluro hiyrunu sotlukaka kwenuru ônix tshinkaluru.
13Wenu wanestsi hajeru hiwakni Giom tshinkaluru. Walekni sajrukatkalu Cuxe tshijne.
14Wenu wanestsi hajeru hiwakni Tigre tshinkaluru. Xyekni Assíria tshijne tkatshi hichpajyawaka sreta hichpajikatshri. Wenu wanestsi hajeru Eufrates tshinkaluru.
15Waneya Tsru Hixikatshriwa Hoyakalu haniklu jeji waneya hitaklucha rutaklu, hitaklu ruslahyawakapa.
16Waneya Hoyakalu towutatkalu jeji wane htshinru:
— Ptowruk-hitaklu yehi hwatshri pnikanu, hike rixa,
17seyni hahmuna pimaxyawakaplu kihleru, hektutu hiwakatletatshri sahi hi pnikanu klu tshinanu pnijinihohneplu pimatanu pupnanutka.
Hoyakalu Hiyakoxyawaklo Suxo Piranapni
18Hiyrunu wane htshina Hoyakalu:
— Hi kihleru jeji walepka rixyawaka, nkamhanro suxo repixjeropa rumuklo potuko ptowru tshinanuko.
19Waneya rali kamhalexinixkalu tshiji ptowruka campo hajeru, ptowruka kamejiru teno hajeru, ranikna nikalune Adão nwaka, rexyawakapna kna hiwaka htshinanna. Ptowruneka nikalune Adão hitakhiwakata hiyáhoni wale hiwakakotkani.
20Jeji hiwakatlu ptowruka hejnune kammanrerupa, ptowruk-kamejiru teno yapatshri, ptowruka pa hixanu hocha hajeru, ptowruka hejnune retatka seyni hikeni rimotslo.
21Waneya Tsru Hixikatshriwa Hoyakalu hixkajyawaklu tshinanu rixapnewatatka jeji. Waneya hi rakot-hixapneta. Waneya rumkaka pchinika Hoyakalu kochpaklu hikwansathapu. Waneya hihitu ruchyamtatnaklu.
22Hikwansathapu hkostshejyalu jeji Hoyakalu, walekni suxo hkamhiya Hoyakalu. Waneya Adão nwaka raniklo suxo.
23Waneya wane htshina Adão:
— Ye! Twutkani suxo! Haptshi nohapu kamhikolo, tohitu nohitu kamhikolu. Thiwaka suxo klu tshinanu suxo, jeji psojitni.
24Wale tshinanu jeji hichotlu ruru, runro, hiyáhoni satumanepkaplu hhanunroyma.
25Wanna hepi malechkopirune jeji, suxo seyni hi hpatewkajyana.
தற்சமயம் தேர்ந்தெடுக்கப்பட்டது:
Gênesis 2: mpdBiblia
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil